بيىل حالىق اقىنى, ابايدىڭ شاكىرتى تولەۋ كوبدىكوۆتىڭ تۋعانىنا 145 جىل تولىپ وتىر. وسىعان وراي وبلىس اكىمى دانيال احمەتوۆتىڭ ۇسىنىسىمەن باسپاعا ازىرلەنگەن «اباي الەمى» كىتاپتار توپتاماسى اياسىندا اقىن تولەۋ كوبدىكوۆ كىتابىنىڭ تۇساۋكەسەرى ءوتتى. كىتاپ «اتاندىم ءوز تۇسىمدا تولەۋ اقىن» دەپ اتالادى. بۇل كىتاپتى باسپاعا ازىرلەگەن سەمەي قالاسىنىڭ تۇرعىنى, اباي مۇراجايىنىڭ عىلىمي حاتشىسى, اقىننىڭ نەمەرەسى شىنار مۇراتقىزى.
- «اتاندىم ءوز تۇسىمدا تولەۋ اقىن» كىتابى ابايدى زەرتتەۋشىلەر ءۇشىن اسا قاجەتتى تاپتىرماس دۇنيە,-دەدى شىنار مۇراتقىزى ءوز ەستەلىكتەرىمەن بولىسە كەلە,-اتامىز تولەۋ- ۇلى اقىن ابايدىڭ وزىمەن بىرنەشە رەت جۇزدەسىپ, اقىل-كەڭەسىن العان. كوپتەگەن دەرەكتەردى وقىرمان قاۋىم وسى كىتاپ ارقىلى تانىسىپ, بىلە الادى. ابايتانۋشى قايىم مۇحامەدحانوۆ تولەۋ كوبدىكوۆتى «ابايدىڭ اقىن شاكىرتتەرىنىڭ ءبىرى» دەپ باعالاعان. جاسىنان ابايدان ءتالىم العان تولەۋ اقىننىڭ ساقتالعان جانە ءبىرازى جارىق كورگەن تاريحي ولەڭدەرىنىڭ باسىن قۇراپ, وسى كىتاپقا تولىقتاي ەنگىزۋگە تىرىستىم. سوعىستان كەيىنگى جىلدارى جازعان 1945 جىلعى «اباي» پوەماسى جانە 1946 جىلعى «قازاقستان» اتتى كولەمدى تولعاۋلارى ءالى كۇنگە دەيىن حالىق جادىندا.
اباي كىتاپحاناسىندا وتكەن تۇساۋكەسەر راسىمگە ارنايى كەلگەن جارما اۋدانىنىڭ تۇرعىنى, اقىننىڭ شوبەرەسى ەسەنتاي قۇلجانبەكوۆ اتاسى تۋرالى ەستەلىك اڭگىمەلەرىمەن ءبولىستى. سونداي-اق, «اباي الەمى» سەرياسى جوباسىنىڭ باس رەداكتورى, جازۋشى, «قۇرمەت», «پاراسات» وردەندەرىنىڭ يەگەرى مەدەۋ سارسەكە جانە شاكارىم اتىنداعى مەملەكەتتىك ۋنيۆەرسيتەتىنىڭ كافەدرا مەڭگەرۋشىسى اراي جۇندىباەۆالار جيىنعا قاتىسۋشىلارعا اقىننىڭ ونەگەلى ومىرىمەن قاتار, شىعارماشىلىق جولىنان, پوەزياسىنان مول ماعلۇماتتار بەردى. شاراعا قالامىزدىڭ زيالى قاۋىم وكىلدەرى, اقىننىڭ تۋىستارى جانە قازاق يننوۆاتسيالىق-گۋمانيتارلىق زاڭ ۋنيۆەرسيتەتىنىڭ, م.و.اۋەزوۆ اتىنداعى پەداگوگيكالىق كوللەدجىنىڭ ستۋدەنتتەرى قاتىستى.
راۋشان نۇعمانبەك,
«Egemen QAZAQSTAN»
سۋرەتتى تۇسىرگەن اۆتور
سەمەي