وڭىرلىك كوممۋنيكاتسيالار قىزمەتىندە وتكەن بريفينگتە اقمولا وبلىسى اكىمىنىڭ ورىنباسارى مارات يعاليەۆ وڭىردەگى تۋريستىك سالانىڭ بۇگىنگى جاعدايى جونىندە ايتىپ بەردى.
مەملەكەت باسشىسى ەل حالقىنا ارناعان ءوز جولداۋىندا ءبىزدىڭ باي تابيعات پەن مادەني الەۋەتتى پايدالانۋ ءۇشىن ءتۋريزمدى دامىتۋعا ەرەكشە نازار اۋدارۋ قاجەتتىگىن اتاپ وتكەن بولاتىن. تۋريزم اقمولا وبلىسىندا ەرەكشە ورىنعا يە. ءوز كەزەگىندە بۇل ءوڭىر قازاقستان رەسپۋبليكاسىنداعى تۋريستىك اۋماق كوشباسشىلارىنىڭ بەستىگىنە كىرەدى.
– وبلىستاعى تۋريزم سالاسىندا 700-دەن ارتىق كاسىپورىن جۇمىس ىستەيدى. وتكەن جىلى ءبىزدىڭ وڭىرگە دەم الۋعا 1,1 ميلليون ادام كەلدى. 2018 جىلدىڭ قاڭتار-قىركۇيەك ايلارىندا وسى سالادا قىزمەت كورسەتۋ كولەمى 1,6 پروتسەنتكە ءوسىپ, 270 مىڭ ادامعا جەتتى. كورسەتىلگەن قىزمەت كولەمى 5,5 ميلليارد تەڭگەنى قۇرادى. وڭىردە «بۋراباي», «بۇيراتاۋ» جانە «كوكشەتاۋ» مەملەكەتتىك ۇلتتىق تابيعي پاركتەرى مەن قورعالجىن مەملەكەتتىك تابيعي قورىعى, 900 مادەني ەسكەرتكىش ورنالاسقان. 2017-2020 جىلدارى ششۋچينسك - بۋراباي كۋرورتتى ايماعىن دامىتۋ جوسپارىنىڭ ءىىى كەزەڭى اياسىندا بيىلعى جىلى بۋراباي اۋداندىق پب عيماراتىنىڭ, كاۆالەريا ۆزۆودىنىڭ نىسانى مەن پوليتسيا قىزمەتكەرلەرىنىڭ 100 پاتەرلىك تۇرعىن ءۇيىنىڭ قۇرىلىسى اياقتالادى. ۆيزيت ورتالىعىنىڭ بازاسىندا تاريحي ولكەتانۋ مۋزەيى مەن بوتاي مادەنيەتىنىڭ مۋزەيى, «جايلاۋ» ەتنو اۋىلى مەن اۆتوكەمپينگتەر اشىلدى. ستريت-فۋد جۇيەسى ۇيىمداستىرىلدى. «AsiaWaters» كومپانياسى ەمدىك قاسيەتى بار «Qulager Burabay» جاڭا اسحانا سۋىنىڭ ونەركاسىپتىك ءوندىرىسىن جولعا قويدى, - دەدى مارات يعاليەۆ.
سونداي-اق, قىزمەت باعاسىن تومەندەتۋ ءۇشىن تۋرپاكەتتەر ساتۋ جانە 50 پايىز جەڭىلدىك بەرەتىن BurabayCity Pass ەلەكتروندىق جۇيەلەرى ەنگىزىلدى. كۋرورت قوناق ۇيلەرى باتىس وبلىستاردىڭ 12 كاسىپوداق ۇيىمىمەن كەلىسىم-شارت جاساپ, وتكەن ماۋسىمدا 1293 ەڭبەككەر دەمالدى. بۋراباي كەنتىندەگى جاڭا شاعىن اۋداننىڭ قۇرىلىسى باستالىسىمەن باس كوشە مەن ورتالىق الاڭ اباتتاندىرىلدى. بۋراباي كولى جاعالاۋىنا ەكى اللەيا سالىندى. قوقىستى ىرىكتەپ جيناۋ جوباسى جۇزەگە اسىرىلۋدا. «love Burabay» جازۋى تۇرىندەگى شاعىن ساۋلەتتىك مۇسىندەر مەن اقپاراتتىق جول كورسەتكىشتەرى ورناتىلعان. وبلىستىق اكىمدىك پەن «قازاۆتوجول» ۇك» اكتسيونەرلىك قوعامى اراسىنداعى قول جەتكىزىلگەن كەلىسىم اياسىندا وبلىس اۋماعىندا حالىقارالىق ستاندارتتارعا سايكەس, «KazWay» مودۋلدىك سەرۆيستەرىنىڭ 9 پاۆيلونى ورناتىلعان. سەرۆيس ساپاسىن جاقسارتۋ ماقساتىندا سەرتيفيكاتتالعان قوناقۇي سانى جەتى ەسە كوبەيىپ, 26 نىساندى قۇرادى.
«Hotel Plaza» قوناق ءۇيى كەشەنىندە قازاقستاندا تۇڭعىش رەت «سەرۆيس پەن تۋريزم اكادەمياسى» اشىلدى. تسيفرلاندىرۋدى ەنگىزۋ اياسىندا تۋريستىك اقپاراتتىق ورتالىق اقمولا وبلىسىندا تۋريستىك الەۋەت جونىندە ءۇش تىلدەگى جاڭا ينتەرنەت-رەسۋرس ەنگىزدى. «Visit Aqmola» موبيلدىك ۇسىنىسى قۇرىلدى. وعان ءوڭىردىڭ بەلگىلى ورىندارىنىڭ QR-كودى كىرەدى. تۋريستەردى تارتۋ ماقساتىندا تۇراقتى نەگىزدە يميدج قالىپتاستىرۋ بويىنشا جۇمىس جۇرگىزىلۋدە. ونىڭ ىشىندە, ءوڭىردىڭ ءتۋريزمىن ەلىمىز بەن شەتەلدە اقپارات قۇرالدارىندا ناسيحاتتاۋ جۇمىستارى قولعا الىنۋدا. وتكەن جىلى ءوڭىردىڭ تۋريستىك الەۋەتىن ناسيحاتتاۋعا باعىتتالعان 27 شارا, شەتەلدىك جانە قازاقستاندىق تۋروپەراتورلار, ينۆەستورلار مەن باق وكىلدەرى ءۇشىن 12 اقپاراتتىق-جارنامالىق تۋر وتكىزىلدى. 2018 جىلدىڭ باسىندا اقمولا وبلىسى 4 حالىقارالىق جانە 1 رەسپۋبليكالىق كورمە مەن فورۋم وتكىزىلدى. بۋراباي كۋرورتى تارتىمدىلىعىن قامتاماسىز ەتۋ جانە جىل بويى بيزنەستى تارتۋ ماقساتىندا «Four seasons» تۇجىرىمداماسى جۇزەگە اسىرىلۋدا. وتكەن جىلى تۋريستىك ينفراقۇرىلىمدى دامىتۋ ماقساتىندا 32 ينۆەستيتسيالىق جوبا جۇزەگە اسىرىلىپ, 340 جۇمىس ورنى اشىلدى.
بايقال ءبايادىل,
«Egemen Qazaqstan»
اقمولا وبلىسى