كوكشەتاۋدا مەملەكەتتىك قىزمەت كورسەتۋ ەلەكتروندىق فورماتقا اۋىستىرىلىپ جاتىر

جەرگىلىكتى ورگاندار كورسەتەتىن 202 قىزمەتتىڭ 118-ءى, ياعني 60 پروتسەنتكە جۋىعى ەلەكتروندىق فورماتقا اۋىستىرىلعان.  

– باستى ماقساتىمىز دا وسى. مەملەكەتتىك قىزمەتتتەردى ەلەكتروندىق فورماتقا اۋىستىرۋ. بۇل پورتال ارقىلى كورسەتىلەتىن قىزمەت تۇرلەرى حالىقتىڭ وڭ كوزقاراسىنا يە بولۋدا. ەڭ كوپ كورسەتىلەتىن قىزمەت ءتۇرى ول دەنساۋلىق ساقتاۋ سالاسى.  جاعىمدى جاڭالىعىمىز, وسى جىلدىڭ قاڭتار ايىنان باستاپ 3 مەديتسينالىق انىقتاما تەگىن بەرىلۋدە. ياعني, ءبىر مەرزىمدى قۇپيا ءسوز بەن لوگين ارقىلى ىسكە اسادى, - دەدى وبلىس اكىمى اپپاراتى مەملەكەتتىك قىزمەتتەردىڭ ۇسىنىلۋىن تالداۋ ءبولىمىنىڭ جەتەكشىسى داناگۇل جۇمابەك.

ءبىر مەرزىمدى قۇپيا ءسوز بەن لوگين ارقىلى ءار ازامات نەكەگە تۇرۋعا ءوتىنىش تە بەرە الادى. اتاپ وتەرلىگى, حالىق اراسىندا تسيفرلىق مادەنيەتتى دامىتۋ ماقساتىندا وتكەن جىلدىڭ جەتوقسان ايىندا كوكشەتاۋ قالاسىندا حالىققا تسيفرلى قىزمەت كورسەتۋ ورتالىعى اشىلعان.

– بۇل ورتالىقتىڭ تيىمدىلىگى بىرىنشىدەن, حالىق ەلەكتروندىق فورماتتا وزدىگىنەن قىزمەت تۇرلەرىن الا الادى. وزدەرىڭىز كورىپ وتىرعانىڭىزداي, حالىق اراسىندا بۇل قىزمەت ءتۇرى سۇرانىسقا يە. حالىققا قىزمەت كورسەتۋ ورتالىقتارىندا قىزمەت تۇرلەرىن كورسەتۋدە وزگەرتۋلەر ەنگىزىلۋدە. ياعني, كورسەتىلەتىن قىزمەتتەردىڭ 60 پروتسەنتى وزىنە قىزمەت كورسەتۋ بۇرىشتارىنا اۋىستىرىلماق. ال, قالعان 40 پروتسەنتى وپەراتورلاردىڭ كومەگىمەن ىسكە اسپاق. «قولجەتىمدى اكىمدىك» جوباسىن ىسكە اسىرۋدامىز,–دەيدى وبلىس اكىمى اپپاراتى مەملەكەتتىك قىزمەتتەردىڭ ۇسىنىلۋىن تالداۋ ءبولىمىنىڭ جەتەكشىسى.

«قولجەتىمدى اكىمدىك» جوباسى شەڭبەرىندە كوكشەتاۋ جانە ستەپنوگورسك قالالارىنىڭ اكىمدىكتەرى  عيماراتتارىنىڭ ءبىرىنشى قاباتىندا حالىقتان ءوتىنىش قابىلداۋ ءۇشىن قولايلى الاڭدار اشىلۋدا. بۇگىندە وبلىس تۇرعىندارى ءۇشىن «سمارت اقمولا» تسيفرلاندىرۋ كەڭسەسى بارلىق سۇراقتار بويىنشا وتىنىشتەر قالدىرۋ قوسىمشاسىن دا ازىرلەۋ ۇستىندە.    

بايقال ءبايادىل,

«Egemen Qazaqstan»