پەداگوگيكالىق ءبىلىم ورداسىندا ستۋدەنتتىك پارلامەنت قۇرىلدى. ستۋدەنتتىك پارلامەنت – بارلىق قوعامدىق بىرلەستىكتەردىڭ باسىن بىرىكتىرىپ, جاستاردى الەۋمەتتىك قولداۋدا, جاستار اراسىندا دۇرىس مورالدىق-پسيحولوگيالىق ورتا قالىپتاستىرۋعا, ۋنيۆەرسيتەت قابىرعاسىنداعى ۇيىمداستىرۋ-باسقارۋ جۇمىستارىن دامىتۋعا باسشىلىق جاسايتىن بولادى.
جاقىندا ۋنيۆەرسيتەتتە ستۋدەنتتىك پارلامەنت توراعاسىن سايلاۋ ءوتتى. سايلاۋعا 3 كانديدات ىرىكتەلىپ ءتۇستى, ولار ستۋدەنتتەر اراسىندا ءوز جوبالارىن ناسيحاتتاپ, ەكى اپتا ۇگىت جۇمىستارىن جۇرگىزدى.
سايلاۋ كۇنى ءبىلىم ورداسى عيماراتىنىڭ ەكىنشى قاباتىندا ءۇش سەكتسيالى كابينالار, بيۋللەتەن تاستايتىن جاشىك ورناتىلىپ, سايلاۋشىلارعا بيۋللەتەن تاراتاتىن 5 ۇيىمداستىرۋ القاسى تاعايىندالدى. داۋىس بەرۋ تاڭەرتەڭگى 08.00-دەن تۇسكى 13.00-گە دەيىن جالعاستى.داۋىس بەرۋگە 800-دەي ستۋدەنت قاتىستى.
سايلاۋ ناتيجەسى بويىنشا باسىم داۋىس جيناعان پسيحولوگيا جانە پەداگوگيكا فاكۋلتەتىنىڭ 2 كۋرس ستۋدەنتى تولەگەنوۆا ايزات ستۋدەنتتىك پارلامەنت ءتورايىمى بولىپ قابىلداندى.
«بيىل ەلباسىمىزدىڭ باستاماسىمەن بەلگىلىنگەن جاستار جىلى ۋنيۆەرسيتەت ستۋدەنتتەرىنىڭ ومىرىنە جاڭا سەرپىن, جۇمىستارعا جاڭا باعىت بەرۋ ماقساتىندا ستۋدەنت پارلامەنتى ۇيىمىن قۇردىق. پارلامەنت الدىنا كوپتەگەن ماقساتتار قويىلعان. ولاردىڭ قاتارىنا جاستار ساياساتىن جۇزەگە اسىرۋ, ستۋدەنتتىك ورتانىڭ ۇستازدار مەن ۋنيۆەرسيتەت باسشىلىعىمەن تىعىز بايلانىستا بولۋىن قامتاماسىز ەتۋ, ۋنيۆەرسيتەت ستۋدەنتتەرى اراسىندا ۇجىمدىق مادەنيەتتى قالىپتاستىرۋ, ستۋدەنتتەردىڭ الەۋمەتتىك ومىرگە بەلسەنە ارالاسۋىنا, سالاماتتى ءومىر سالتىنىڭ جاستار اراسىندا ماڭىزعا يە بولۋىنا, ستۋدەنتتەردىڭ جاستار ۇيىمىنا مۇشە بولۋىنا, قوعامدىق جۇمىستارعا بەلسەنە قاتىسۋىنا ىقپال ەتۋ سەكىلدى كوپتەگەن ماسەلەلەر كىرەدى. كوپتەگەن ستۋدەنتتەر وزدەرىنىڭ قۇقىعىن دا بىلمەيدى, ولاردىڭ مۇددەلەرىن قورعاۋ دا پارلامەنت جۇمىسىنىڭ ءبىرى بولادى» دەيدى ستۋدەنتتىك پارلامەنت ءتورايىمى ايزات.
ءنازيرا جارىمبەت,
«ەگەمەن قازاقستان»
قوستاناي