«حالىققا كومەك»: جاڭا جوبا جايىقتاعى جاعدايدى زەردەلەيدى

مەملەكەت باسشىسىنىڭ پارتيانىڭ XVIII سەزىندە اتاپ وتكەن تاپسىرمالارى اياسىندا جۇزەگە اسا باستاعان «حالىققا كومەك» جوباسى جەرگىلىكتى جەرلەردەگى پروبلەمالارعا جەدەل ارەكەت ەتۋدى كوزدەيدى. اتىراۋداعى جايىق وزەنىندە قالىپتاسىپ وتىرعان جاعداي دا «Nur Otan» پارتياسىنىڭ نازارىندا.

«Nur Otan» پارتياسى وبلىستىق فيليالى توراعاسىنىڭ ءبىرىنشى ورىنباسارى نۇرلىبەك وجاەۆ پەن ۆەدومستۆوارالىق كوميسسيانىڭ توراعاسى, وبلىس اكىمىنىڭ ورىنباسارى الىبەك ناۋتيەۆ وتكەن جىلدىڭ جەلتوقسان ايىندا جايىق وزەنىندە بالىقتىڭ قىرىلۋ سەبەبىن انىقتاۋعا جۇمىلدىرىلعان مەملەكەتتىك ورگاندار باسشىلارىنىڭ ەسەپتەرىن تىڭدادى.

اتىراۋلىقتاردى جايىقتاعى بالىق ءولىمى الاڭداتىپ وتىر. وسى وقيعا بويىنشا ەكى قىلمىستىق ءىس قوزعالدى, تەرگەۋ ءجۇرىپ جاتىر. كوكتەم كەلىپ, كۇن جىلىنا باستاسىمەن وزەن جاعالاۋىنا بالىق ولەكسەلەرى جينالىپ قالدى. پارتيانىڭ قوعامدىق قابىلداۋىنا كوپتەگەن تۇرعىندار مۇددەلى ورگانداردىڭ وسى ماسەلەنى شەشۋ بويىنشا اتقارىپ جاتقان ناقتى شارالارى جونىندە حالىقتى اقپاراتتاندىرىپ وتىرۋدى سۇراپ حابارلاسقان.       

- پارتيا مۇشەلەرى جايىق جاعالاۋىن قوقىستان تازارتۋعا ارنالعان جالپىقالالىق سەنبىلىككە قاتىستى. ءبىر كۇننىڭ ىشىندە 52 توننا قوقىس, 4,3 توننا ءولى بالىق جينالدى,-دەدى نۇرلىبەك وجاەۆ.

كەزدەسۋ بارىسىندا وزەندە بالىق قىرىلۋىنىڭ سەبەپتەرىن انىقتاۋ جايى «Nur Otan» پارتياسىنىڭ نازارىندا ەكەنى جانە كۇن سايىنعى مونيتورينگ قورتىندىسى پارتيانىڭ وبلىستىق فيليالىنا جىبەرىلەتىنى تۋرالى ايتىلدى.

- بازارلاردا, ساۋدا ورىندارىندا بالىق ونىمدەرىن ساتۋ نۇكتەلەرىنە باقىلاۋدى كۇشەيتۋ تۋرالى تاپسىرما بەردىك. قازىر جاعداي تۇراقتى. كۇن سايىنعى مونيتورينگ وزەن سۋىندا نورمادان اۋىتقۋ جوق ەكەنىن كورسەتىپ وتىر. ساتۋعا شىعارىلعان جانە جاڭا اۋلانعان بالىقتارعا زەرتحانالىق سىنامالار بۇزۋشىلىقتاردى انىقتامادى. مەديتسينالىق مەكەمەلەرگە بالىق ونىمدەرىنەن ۋلانۋ, ينفەكتسيالىق اۋرۋ دەرەگىمەن تۇسكەندەر تىركەلگەن جوق,-دەپ اتاپ ءوتتى نۇرلىبەك وجاەۆ.

ۆەتەرينارلىق قىزمەت بالىق ونىمدەرىن ساتاتىن 41 ساۋدا نۇكتەسىن باقىلاۋدا ۇستاپ وتىر. بالىق اۋلاۋ ورنىنان ساتۋ نۇكتەسىنە دەيىنگى جانە تۇتىنۋشىعا جەتكەنگە دەيىنگى ارالىقتىڭ بارىنە مونيتورينگ جۇرگىزىلەدى.

سونداي-اق, بيىل جازدا جايىق وزەنىنە عىلىمي زەرتتەۋ جۇمىسى باستالادى. جەرگىلىكتى بيۋدجەتتەن وسى ماقساتقا 80 ملن تەڭگە قارالعان. وزەن جاعدايى ماحامبەت اۋدانىنان باستاپ كاسپي تەڭىزىنە قۇيىلاتىن جەرگە دەيىن زەرتتەلەدى دەگەن جوسپار بار. سول جۇمىستاردىڭ ناتيجەسىندە مۇددەلى ورگاندارعا ناقتى مىندەتتەر جۇكتەلەدى.

باقىتگۇل باباش,

«Egemen Qazaqstan»

اتىراۋ