تۇركىستان وبلىسى سايرام اۋدانىندا جاڭادان مۇراجاي سالىنىپ جاتىر. اۋداندىق قۇرىلىس ءبولىمىنىڭ تاپسىرىسى بويىنشا بوي كوتەرىپ جاتقان نىساننىڭ جالپى قۇنى – 86 ملن 492 مىڭ تەڭگە. 2018 جىلدىڭ تامىز ايىندا باستالعان قۇرىلىس جۇمىستارى بيىل پايدالانۋعا بەرىلەدى دەپ جوسپارلانعان. تۇركىستان وبلىسى اكىمىنىڭ ءباسپاسوز قىزمەتىنىڭ سايرام اۋدانىنا ۇيىمداستىرعان پرەسس-تۋرى كەزىندە جۋرناليستەر وسىنداي يگى ءىستىڭ كۋاسى بولدى. بۇل تۋرالى تۇركىستان وبلىسى اكىمىنىڭ ءباسپاسوز قىزمەتى حابارلادى.
«مۇنداعى شارۋالار كۇز ايلارىندا باستالعان. اۋا رايىنا بايلانىستى قۇرىلىس قارقىنى ازداپ باياۋلادى. الايدا كۇننىڭ ەرتە جىلىنعانىن پايدالانىپ, ءتيىستى جۇمىستاردى دەر كەزىندە اتقارىپ الدىق. قازىرگى تاڭدا نەگىزگى شارۋالار اياقتالدى, ىشكى ارلەۋ ىسىنە كىرىستىك. ءساتىن سالسا, ءساۋىر ايىندا پايدالانۋعا بەرىلەدى دەگەن جوسپار بار. قۇرىلىس جۇمىستارىنا جەرگىلىكتى 26 ازامات تارتىلعان. قولدانىپ جاتقان قاجەتتى ماتەريالداردىڭ بارلىعى ءوزىمىزدىڭ ەلدەن شىققان ونىمدەر», – دەدى ۋچاسكە باستىعى باتىر تولەگەنوۆ.
سالا ماماندارىنىڭ سوزىنشە, مۇراجايدى سالۋداعى ماقسات – تاريحى تەرەڭدە جاتقان اۋدانداعى قۇندى جادىگەرلەردى, ءوڭىردىڭ تاريحىنان سىر شەرتەتىن ءتۇرلى تاريحي بۇيىمداردى جيناقتاپ, ءبىر جەرگە شوعىرلاندىرۋ. زاماناۋي ۇلگىدە بوي كوتەرىپ جاتقان عيماراتتا قۇندى دۇنيەلەردى ۇزاق ساقتاۋ ءۇشىن مۇراجايعا لايىق بارلىق تالاپتار ساقتالاتىن بولادى. ايتا كەتەيىك, تاريحي اتاۋدى يەلەنگەن اۋداندا بۇرىن-سوڭدى ارنايى سالىنعان مۇراجاي بولماعان.