1 ناۋرىز كۇنى قازاقستاندا العىس ايتۋ كۇنىن تويلايدى. وسى كۇنگە وراي اقتوبە وبلىسىنىڭ بارلىق ەلدى مەكەندەرىندە كەڭ اۋقىمدى قايىرىمدىلىق اكتسياسى ۇيىمداستىرىلدى. 3 مىڭنان اسا اقتوبەلىككە جالپى سوماسى 27,2 ملن. تەڭگەگە الەۋمەتتىك كومەك كورسەتىلدى. بۇل تۋرالى اقتوبە وبلىسى اكىمىنىڭ ءباسپاسوز قىزمەتى حابارلادى.
وبلىس اكىمى وڭداسىن ورازالين قاتىسقان باستى رەسمي سالتاناتتى شارا اقتوبەدەگى «قازاق حالقىنا مىڭ العىس» ەسكەرتكىشىنىڭ الدىنداعى الاڭدا ءوتتى. مۇندا ۇلتتىق تاعامداردىڭ جارمەڭكە-كورمەسى مەن ازىق-ت ۇلىك جارمەڭكەسى ۇيىمداستىرىلىپ, وعان وبلىستىڭ بارلىق اۋداندارى قاتىستى.
سالتاناتتى شارانى «قازاق ەلىنە مىڭ العىس» تەاترلاندىرىلعان كورمەسى اشتى. وبلىستاعى بارلىق 18 ەتنومادەني بىرلەستىكتىڭ وكىلدەرى بي جانە مۋزىكالىق نومىرلەرىمەن ساحناعا شىقتى. ولاردىڭ ارقايسىسى العىستارىن ايتىپ, ءار ءتۇرلى تىلدە ءوز وتانى – قازاقستاندى ماداقتادى.
«العىس ايتۋ كۇنى – بۇل بارلىق ۇلىس وكىلدەرىنىڭ ءبىر-ءبىرىن جانە بارلىعى بىرىگىپ قازاق حالقىنا تولىققاندى مەملەكەتتە, حالىقارالىق كەلىسىم مەن بەيبىتشىلىك ورناعان ەلدە ءومىر ءسۇرىپ جاتقاندارى ءۇشىن العىستارىن بىلدىرەتىن كۇن. بۇل ريزاشىلىق ءبىزدىڭ ءاردايىم جۇرەگىمىزدە, بىراق ءبىز بۇگىن ونى جۇمىلا, اسىرەسە قازاقستانعا قونىس اۋدارعان حالىقتاردىڭ وكىلدەرى بولىپ بىلدىرە الامىز»,- دەدى قازاقستان كارىستەرى قاۋىمداستىعىنىڭ اقتوبە فيليالى توراعاسى كونستانتين تسحاي.
«تاۋەلسىزدىك جىلدارى, تاريحي وتانعا ورالۋ مۇمكىندىگى تۋعان كەزدە اقتوبەلىك بولگارلاردىڭ ەشقايسىسى كەتپەدى, ويتكەنى وسى كۇنگە دەيىن العاشقى قونىس اۋدارۋشىلاردىڭ ۇرپاقتارى تۇرىپ جاتقان كىشكەنە اۋىلدارى – بولگاركانى وزدەرىنىڭ كىشى وتاندارى دەپ سانايدى. وسى ءبىر مەرەكە كۇنى حالقىمنىڭ اتىنان بىزگە وتان بولعان ۇلى دالاعا ۇلكەن العىسىمدى بىلدىرەمىن»,- دەدى وبلىستىق «ۆيارا» بولگار ەتنومادەني بىرلەستىگىنىڭ باسشىسى اناستاسيا پودوليانوۆا.
اقتوبەلىكتەردى قۇتتىقتاعان ءوڭىر باسشىسى العىس ايتۋ كۇنى ءبىزدىڭ ورتاق تاريحىمىزعا دەگەن قۇرمەت, بۇكىل قازاقستاندىقتىڭ ءبىر-بىرىنە دەگەن مەيىرىمدىلىگى, دوستىعى پەن ماحابباتى مەرەكەسى ەكەنىن اتاپ ءوتتى.
«وتانداستارىمىزدىڭ ىقىلاسىنىڭ ارقاسىندا وسى ءبىر مەرەكە كۇندەرى مۇقتاج وتباسىلارعا قايىرىمدىلىق كومەك كورسەتۋدە ۇلكەن جۇمىستار جۇرگىزىلۋدە. ءبىزدىڭ بارلىق قالتالى ازاماتتارىمىزعا, كاسىپورىن باسشىلارى مەن جالپى جۇرشىلىققا يگى ىستەردى جۇزەگە اسىرۋعا بەلسەندى تۇردە قاتىسقاندارى ءۇشىن العىس بىلدىرگىم كەلەدى. بىزدەر وسىنداي جوبالاردى بىرلەسە جۇزەگە اسىرا وتىرا ءوزىمىزدىڭ اۋىزبىرشىلىگى مەن تاعدىرىنا بەي-جاي قارامايتىنىمىزدى كورسەتەمىز»,- دەدى و.ورازالين.
ول ءوز سوزىندە الەۋمەتتىك باعدارلانعان مەملەكەت پەن قوعامنىڭ دامۋى – ەلباسىنىڭ باستى باسىمدىقتارىنىڭ ءبىرى ەكەنىن ەسكە سالدى.
««نۇر وتان» پارتياسىنىڭ جۋىرداعى سەزىندە ەل پرەزيدەنتى قازاقستاندىقتاردىڭ تۇرمىس ساپاسىن جاقسارتۋعا قاتىستى بىرقاتار تاپسىرمالار بەردى. پرەزيدەنتتىڭ بارلىق باستامالارى مەن تاپسىرمالارى ءاربىر قازاقستاندىقتىڭ كۇتكەنى مەن ۇمىتىنە جاۋاپ بەرەدى, الدىمىزدان ەلىمىزدىڭ ءارى قاراي دامۋىنىڭ جاڭا پەرسپەكتيۆالارىن, ءاربىر ازاماتتىڭ بولاشاعىن اشادى. سوندىقتان, بىزدەر, اقتوبەلىكتەر, پرەزيدەنت قويعان تاپسىرمالار كەشەنىن ورىنداۋ ءۇشىن بارلىق شەبەرلىگىمىز بەن كۇشىمىزدى سالۋىمىز كەرەك. ەلدەگى بەيبىتشىلىك, قوعامدىق كەلىسىم مەن ۇلت بىرلىگىن نىعايتۋ كوبىنە ءبىزدىڭ جۇمىسىمىزدىڭ ساپاسىنا بايلانىستى»,- دەپ اتاپ ءوتتى وبلىس اكىمى.
حالىقتىڭ الەۋمەتتىك جاعىنان وسال توبىن قولداۋ اياسىندا ەتنومادەني بىرلەستىكتەردىڭ وكىلدەرى مەن كاسىپكەرلەر ەلۋ مۇقتاج وتباسىعا بارىپ, ازىق-ت ۇلىك تابىس ەتتى.
العىس ايتۋ كۇنى ەلىمىزدە 2016 جىلدان باستاپ مەملەكەت باسشىسىنىڭ قازاقستان حالقى اسسامبلەياسىنىڭ XXII سەسسياسىندا ايتقان باستاماسىمەن اتاپ ءوتىلىپ كەلەدى.