پارلامەنت سەناتىنىڭ توراعاسى قاسىم-جومارت توقاەۆ فينليانديانىڭ سىرتقى ساۋدا جانە دامۋ ءمينيسترى, قازاقستان مەن فينليانديانىڭ ساۋدا-ەكونوميكالىق ىنتىماقتاستىق جونىندەگى ۇكىمەتارالىق كوميسسياسىنىڭ تەڭ توراعاسى اننە-ماري ا.ۆيرولاينەندى قابىلدادى.
توراعا جوعارى دەڭگەيدەگى جۇيەلى ساياسي ۇنقاتىسۋعا نەگىزدەلگەن قازاقستان-فينليانديا قاتىناستارىنىڭ ەرەكشە سيپاتىنا توقتالدى. ق.توقاەۆ مەملەكەت باسشىسى ن.نازارباەۆتىڭ 2018 جىلى حەلسينكيگە ساپارىنىڭ ناتيجەلى بولعانىن جانە وندا كوپتەگەن ەكىجاقتى كەلىسىمگە قول قويىلعانىن اتاپ ءوتتى.
پارلامەنت جوعارعى پالاتاسىنىڭ باسشىسى سەناتتىڭ ءوزارا پارلامەنتارالىق ءىس-قيمىلدى تەرەڭدەتۋگە مۇددەلى ەكەنىن اتاپ ءوتىپ, فين دەپۋتاتتارىن قازاقستانعا ساپارلاپ كەلۋگە شاقىردى.
اننا ماري ۆيرولاينەن ق.توقاەۆتى ساۋدا-ەكونوميكالىق ىنتىماقتاستىق جونىندەگى ۇكىمەتارالىق كوميسسيانىڭ 11-ءشى وتىرىسىنىڭ قورىتىندىسى تۋرالى حاباردار ەتتى. ونىڭ پىكىرىنشە, كولىك, لوگيستيكا, ەنەرگەتيكا, تسيفرلاندىرۋ جانە ءبىلىم بەرۋ سالالارى ءوزارا ءتيىمدى ىنتىماقتاستىقتىڭ باسىم باعىتتارى بولىپ تابىلادى. «قازاقستان - ورتالىق ازياداعى قوزعاۋشى كۇش بولىپ وتىر. كوپتەگەن فين كومپانياسى ءوز تاجىريبەسىمەن بولىسۋگە دايىن», - دەدى فينليانديا سىرتقى ساۋدا جانە دامۋ ءمينيسترى.
ق.توقاەۆ فين ەلىنىڭ ءبىلىم بەرۋ جۇيەسىنىڭ تيىمدىلىگىن ايتا كەلىپ, الەمنىڭ ءبىلىم بەرۋ كەڭىستىگىنە كەڭىنەن تانىلعان تاجىريبەنى زەردەلەۋگە قازاقستاننىڭ مۇددەلى ەكەنىنە توقتالدى.
«فيندەردىڭ زاڭ شىعارۋدى جۇزەگە اسىرۋ, سونداي-اق قۇقىق ۇستەمدىگىن قامتاماسىز ەتۋ, سىبايلاس جەمقورلىققا قارسى كۇرەس, جالپىعا بىردەي يگىلىكتى قوعام قۇرۋ ۇلگىسىن ىسكە اسىرۋ تاجىريبەسى ءبىز ءۇشىن زور ىقىلاس تۋعىزادى», - دەدى سەنات توراعاسى.
پارلامەنت جوعارعى پالاتاسىنىڭ توراعاسى مەملەكەت باسشىسى نۇرسۇلتان نازارباەۆتىڭ الەۋمەتتىك قولداۋدى كۇشەيتۋ جانە قازاقستاندىقتاردىڭ ءومىر ءسۇرۋ ساپاسىن جاقسارتۋ جونىندەگى «نۇر وتان» پارتياسىنىڭ XVIII سەزىندەگى اسا ماڭىزدى باستامالارى تۋرالى ايتىپ بەردى.