قىزدار ۋنيۆەرسيتەتىندە « ۇلى دالانىڭ ۇلى قىزدارى» اتتى ايماقتىق سايىس وتەدى

«رۋحاني جاڭعىرۋ» باعدارلاماسى اياسىندا ۇيىمداستىرىلاتىن سايىس الماتى قالاسىنداعى جوعارى وقۋ ورىندارىنىڭ ستۋدەنتتەرى اراسىندا جۇرگىزىلمەك.

جاندار اساننىڭ ايتۋىنشا, ينتەللەكتۋالدى وليمپيادا 5 اينالىمنان تۇرادى.

العاشقى كەزەڭدە ءار كوماندا ءوزىنىڭ ۋنيۆەرسيتەتى مەن مۇشەلەرىن  تانىستىرىپ, كوماندانىڭ اتىن قورعايدى.

«تاريحي حرونولوگيا» اتتى ەكىنشى اينالىمدا ءار كوماندا ۇياشىقتاردىڭ ارتىندا جاسىرىلعان تاريحي داتالاردىڭ ماعىناسىن دۇرىس اشۋى ءتيىس. بۇل ساندار ۇلى دالانىڭ ۇلى قىزدارىنىڭ ءومىرى مەن قوعامدىق-ساياسي قىزمەتىمەن بايلانىستى. كوماندالار دۇرىس  جاۋاپ بەرگەنىنە قاراي ۇپاي ەنشىلەيدى.

ءۇشىنشى تۋردا قاتىسۋشىلارعا « ۇلى دالانىڭ قاھارمان قىزدارى» تاقىرىبىنداعى ارنايى بەينەتاسپاعا تۇسىرىلگەن ساۋالدار قويىلادى.

«تاريحي تەرمينولوگيا» اتتى ءتورتىنشى اينالىمنىڭ شارتى بويىنشا ءار كوماندا تاريحي تەرميندەرگە 3 دەڭگەي نەگىزىندە انىقتاما بەرۋى ءتيىس. 1-دەڭگەي «قولا قاقپا», 2-دەڭگەي «كۇمىس قاقپا» جانە 3-دەڭگەي «التىن قاقپا» دەپ اتالادى. تولىق جاۋاپ بەرگەن كوماندا عانا ءۇش قاقپانى اشقان بولىپ, تولىق باعالانادى. ءۇشىنشى قاقپانىڭ سۇراعى اعىلشىن تىلىندە قويىلادى, سايكەسىنشە كوماندالار  سۇراقتارعا اعىلشىن تىلىندە جاۋاپ بەرەدى.

سوڭعى كەزەڭ «وي تولعاۋ» دەپ اتالادى. بۇل اينالىمدا ەل تاريحىنداعى ەسىمدەرى ۇلىقتالعان ۇلى قىزدار تۋرالى ەسسە سۇراقتار جەرەبە نەگىزىندە ءار كوماندا جەتەكشىسىنە ۇلەستىرىلەدى. شارت بويىنشا سايىسكەر تاپسىرمانى ورىنداۋعا بەرىلەتىن 10 مينۋتتا 100 سوزدەن كەم ەمەس ەسسە جازۋى ءتيىس. ەسسەنىڭ جازۋ بارىسىندا قاتىسۋشىنىڭ جەكە كوزقاراسىنىڭ كورىنىسى, فاكتىلەر, تەوريالىق نەگىزدەمەسى, تەرميندەردى قولدانۋى, لوگيكالىق زاڭدىلىقتاردىڭ ساقتالۋى, سالىستىرۋ جانە باعالاۋ, قورىتىندىلاۋ ادىستەرىن قولدانۋى باستى نازارعا الىنادى.

زياتكەرلىك وليمپيادا قازاق تىلىندە جۇرگىزىلەدى. كوماندانىڭ قۇرامى «تاريح» ماماندىعىندا وقىمايتىن 3 ستۋدەنتتەن جاساقتالۋى شارت.