وسىدان 30 جىل بۇرىن 1989 جىلعى 28 اقپاندا الماتىداعى جازۋشىلار وداعى عيماراتىنىڭ الدىندا وتكەن ميتينگتە «نەۆادا-سەمەي» انتيادرولىق قوزعالىسىن قۇرۋ تۋرالى شەشىم قابىلداندى.
العاشقى قازاقستاندىق ۇكىمەتتىك ەمەس ۇيىمنىڭ يدەيالىق شابىتتانۋشىسى تانىمال جازۋشى, اقىن جانە ديپلومات ولجاس سۇلەيمەنوۆ بولدى. ول 1989 جىلعى ماۋسىمدا سسسر دەپۋتاتتارىنىڭ 1-سەزىندە ۇيىمنىڭ ماقساتتارى, مىندەتتەرى مەن تالاپتارىن باياندادى.
1991 جىلعى 29 تامىزدا سەمەي سىناق پوليگونىندا يادرولىق سىناقتاردى توقتاتۋ ءۇشىن كۇردەلى كۇرەس تابىسپەن اياقتالدى. وداقتىق ورتالىقتىڭ كەلىسۋىن كۇتپەي, قازاق كسر-نىڭ پرەزيدەنتى نۇرسۇلتان نازارباەۆ «سەمەي يادرولىق پوليگونىن جابۋ تۋرالى» جارلىققا قول قويدى. قازاقستان جاپپاي يادرولىق قارۋسىزدانۋعا ناقتى قادام جاسادى: سەمەي يادرولىق سىناق پوليگونى جابىلدى - جويعىش كۇشى جانە قيراتۋ يادرولىق الەۋەتى بويىنشا الەمدە 4-ءشى ورىندا بولعان بولاتىن.
«نەۆادا-سەمەي» قوزعالىسى الەمدىك دەڭگەيدە قازاقستاننىڭ تابىستى انتيادرولىق ساياساتىنىڭ ىرگەتاسىن قالادى. تاۋەلسىزدىك العاننان بەرى ءبىزدىڭ مەملەكەتىمىز يادرولىق قارۋدى تاراتپاۋ, قارۋسىزدانۋ جانە قارۋ-جاراقتى باقىلاۋدىڭ عالامدىق پروتسەسىنە بەلسەندى تۇردە قاتىسىپ, ءتيىستى حالىقارالىق ينستيتۋتتار مەن مەحانيزمدەردى نىعايتۋعا بەرىك ۇمتىلىس تانىتتى. قازاقستاننىڭ وسى سالاداعى جاۋاپتى ساياساتى الەمدىك قوعامداستىقتا ەلىمىزدىڭ وڭ ءيميدجىن قالىپتاستىرۋعا عانا ەمەس, سونىمەن بىرگە جاھاندىق قاۋىپسىزدىكتى نىعايتۋعا ايتارلىقتاي ۇلەس قوسادى. الەمدەگى قارۋسىزدانۋ ۇدەرىسىندەگى اعىمداعى توقىراۋدى جەڭۋ ءۇشىن قازاقستان يادرولىق قاۋىپتى ازايتۋعا جانە يادرولىق قارۋدان ازات الەمگە كوشۋگە باعىتتالعان جاڭا باستامالارمەن ۇنەمى اينالىسادى.
2015 جىلى بۇۇ باس اسسامبلەياسىنىڭ 70-سەسسياسىندا ەلباسى نۇرسۇلتان نازارباەۆ بۇۇ-نىڭ 100-جىلدىعىنا يادرولىق قارۋسىز الەمگە قول جەتكىزۋ جونىندەگى باستامانى ۇسىندى. يادرولىق وتىن تسيكلىنا كوپ جاقتى كوزقاراستاردى جۇزەگە اسىرۋ ءۇشىن قازاقستان ءوز اۋماعىنا ماگاتە-ءنىڭ باقىلاۋىمەن تومەن بايىتىلعان ۋران بانكىن ورنالاستىردى.
بۇدان باسقا, يادرولىق سىناقتارعا جاپپاي تىيىم سالۋ تۋرالى شارتقا كۇشىنە ەنۋىنە جاردەمدەسۋ ماقساتىندا قازاقستاننىڭ كوشباسشىسى اتوم حالىقارالىق جوباسىنا (Abolish Testing – Our Mission) باستاماشىلىق جاسادى. وسى يننوۆاتسيالىق جوبانىڭ اياسىندا الەمنىڭ كەز-كەلگەن تۇرعىنى الەم ۇكىمەتتەرىنە يادرولىق سىناقتاردان باس تارتۋعا جانە كەلىسىمنىڭ كۇشىنە ەنۋىنە قول جەتكىزۋگە شاقىراتىن ونلاين-پەتيتسياعا قول قويا الادى.
ءبىزدىڭ ەلىمىزدىڭ وسى سالاداعى ايتارلىقتاي جەتىستىگى بۇۇ-نىڭ سەمەي پوليگونىن جابۋلى كۇنى 29 تامىزدى حالىقارالىق يادرولىق سىناقتارعا قارسى ءىس-قيمىل كۇنى رەتىندە جاريالاۋى دەپ ايتۋعا بولادى.
بۇدان باسقا, تاراتپاۋ جانە يادرولىق قارۋسىزدانۋ سالاسىندا قازاقستاننىڭ كورشىلەس ەلدەرمەن بىرلەسە, الەمدە بەسىنشى بولىپ قۇرىلعان ورتالىق ازياداعى يادرولىق قارۋدان ازات ايماق قۇرۋ, سونداي-اق بۇۇ-نىڭ يادرولىق قارۋسىز الەمنىڭ جالپى دەكلاراتسياسىن قابىلداۋ تۋرالى ۇسىنىستار جانە تاياۋ شىعىستا يادرولىق قارۋدان ازات ايماق قۇرۋدى قولداۋ سياقتى باستامالارى زور ماڭىزعا يە.