ورال قالاسىندا موڭكە ۇلى كوشەسىندەگى كوپ قاباتتى ۇيلەردىڭ بىرىنە كانادالىق سۋ تازارتقىش «Black powder» ماگنيتتى سۇزگىسى ورناتىلدى. جاڭا قوندىرعىنىڭ تيىمدىلىگى مەن ناتيجەسى ەكى ايلىق سىناقتان كەيىن تەكسەرىلەتىن بولادى.
- قوندىرعىنىڭ قۇرىلىمى وتە قاراپايىم, قۇبىرداعى سۋ وتە قۋاتتى قوس ماگنيت تاياقشانىڭ اراسىنان وتەدى. سول كەزدە سۋ قۇرامىنداعى تات, تەمىر وكسيدى ت.ب. تۇتىلىپ قالادى. بۇعان ەلەكتر قۋاتى, قوسىمشا شىعىن كەتپەيدى. تۇرعىنداردىڭ تۇتىنۋ تاريف باعاسى دا وزگەرمەيدى. پيلوتتىق جوبا بويىنشا بۇل سۇزگى ازىرگە تەگىن ورناتىلىپ وتىر, - دەيدى «جايىقجىلۋقۋات» مەكەمەسىنىڭ وندىرىستىك-تەحنيكالىق ءبولىم باستىعى بولات باتاەۆ.
بۇل قوندىرعىنى ەلىمىزگە اكەلىپ, قازاقستاندىقتاردىڭ يگىلىگىنە ۇسىنىپ جۇرگەن - «تۇرعىن ءۇي كوممۋنالدىق شارۋاشىلىعىن جاڭعىرتۋ مەن دامىتۋدىڭ قازاقستاندىق ورتالىعى» اق ەكەن. بۇل ۇيىم كانادالىق Black Powder Solutions Inc. كومپانياسىمەن ارادا مەموراندۋم جاساپ, قازاقستان رەسپۋبليكاسىنىڭ كوممۋنالدىق شارۋاشىلىعىن دامىتۋ ءۇشىن بىرلەسكەن جوبالاردى جۇزەگە اسىرۋعا كىرىسكەن.
اكتسيونەرلىك قوعامنىڭ باتىس قازاقستان وبلىسىنداعى فيليالى توراعاسى نۇرلان مىرزاعاليەۆتىڭ ايتۋىنشا, Black Powder Solutions ماگنيتتى سەپاراتورلارىنىڭ كومەگىمەن تازارتىلعان سۋ ادام دەنساۋلىعىنا پايدالى بولۋىمەن قاتار, قۇبىرلاردىڭ قىزمەت ەتۋ مەرزىمىن 1,5-2 ەسە ۇزارتۋعا مۇمكىندىك بەرەدى. بۇل تەحنولوگيا 18 جىل بۇرىن ويلاپ تابىلعان, بۇگىندە الەمنىڭ 40 ەلىندە قولدانىلادى. ال قازاقستان بويىنشا ازىرگە ەكى-اق قالادا: اقتاۋ مەن ورال شاھارىندا ورناتىلعان. پيلوتتىق جوبا وڭ ناتيجە بەرگەن جاعدايدا, جوبانى باسقا وڭىرلەردە ىسكە اسىرۋ ماسەلەسى قارالاتىن بولادى.
قازبەك قۇتتىمۇرات ۇلى,
«Egemen Qazaqstan»
باتىس قازاقستان