شىمبۇلاقتا وتەتىن فريستايل-موگۋلدان الەم كۋبوگىنىڭ فينالدىق كەزەڭى تۋرالى نە بىلەمىز؟

موگۋل دەگەنىمىز نە؟

موگۋل – توبەشىكتى بوكتەردەن تاۋ شاڭعىسىمەن قۇلديلاپ, ترامپليننەن سەكىرۋ ەلەمەنتتەرىن ورىندايتىن فريستايل سپورتىنىڭ ءبىر ءتۇرى. قىسقى وليمپياداداعى ەڭ قىزىقتى باسەكەلەر تاپ وسى موگۋلدان وتەدى. FIS ۇيىمداستىراتىن فريستايلدان الەم كۋبوگى 1980 جىلدان بەرى جىل سايىن ءوتىپ كەلەدى. 

الماتىداعى الەم كۋبوگى كەزەڭى 2018/2019 جىلعى ماۋسىمداعى موگۋلشىلاردىڭ ەڭ سوڭعى جارىسى بولماق. سپورتشىنىڭ كۋبوكتىك كەزەڭدەگى جيعان ۇپايلارى ارقىلى جالپى ەسەپتەگى ورنى انىقتالادى. «شىمبۇلاقتا» الەم كۋبوگىنىڭ جەتىنشى كەزەڭى ءوتىپ, بيىلعى ماۋسىم قورىتىندىسى بويىنشا كىمدەردىڭ توپ جاراتىن ايقىندالادى. 

الەم كۋبوگىنىڭ قاتىسۋشىلارىن تورەشىلەر قالاي باعالايدى؟

موگۋلشىلار باسەكەسىنە جەتى تورەشى قازىلىق ەتەدى. سپورتشىنىڭ ونەرىنە باعا بەرەردە ءۇش فاكتورعا باسا نازار اۋدارىلادى: بۇرىلىستاردى ورىنداعانى ءۇشىن بەرىلەتىن ۇپاي – 50 %, سەكىرۋ ەلەمەنتىنە بەرىلەتىن ۇپاي – 25 %, جىلدامدىعى ءۇشىن بەرىلەتىن ۇپاي – 25 %. 

پاراللەلدى موگۋلعا تورەلىك ەتۋدە ازداعان وزگەرىستەر بار. جەتى تورەشىنىڭ ەكەۋى سەكىرۋ ەلەمەنتتەرىن, بىرەۋى جىلدامدىقتى, تورتەۋى بۇرىلىستاردى باعالايدى. ءاربىر تورەشى 0-دەن 5-كە دەيىنگى ارالىقتا ۇپاي بەرىپ, ەكى سپورتشىنىڭ كورسەتكىشىن باعالايدى. مەيىلىنشە كوپ ۇپاي العان سپورتشى جەڭىسكە جەتەدى. 

قايدا وتەدى؟

الەمدىك دەڭگەيدەگى جارىستى «شىمبۇلاق» تاۋ-شاڭعى كەشەنى قابىلدايدى. اتالعان كۋرورت تمد ەلدەرىندە عانا ەمەس, شەتەلدەردە دە ۇزدىكتەر قاتارىنا ەنەدى. جىل سايىن «شىمبۇلاق» بوكتەرىنە الەمنىڭ ءار تۇكپىرىنەن قوناقتار اعىلاتىنى جاسىرىن ەمەس. 2017 جىلى «شىمبۇلاقتا» موگۋلدان ۋنيۆەرسيادا اياسىنداعى جارىس ءوتىپ, ءبىزدىڭ سپورتشىلارىمىز التىن القا تاعىنعان بولاتىن. سودان بەرى حالىقارالىق سپورتتىق ۇيىمدار مۇندا تۋرنير ۇيىمداستىرۋ ساپاسى جوعارى ەكەنىن بايقادى. 2018 جىلى حالىقارالىق شاڭعى سپورت تۇرلەرى فەدەراتسياسى موگۋلدان الەم كۋبوگىنىڭ فينالدىق كەزەڭىن وتكىزۋدى قازاقستانعا سەنىپ تاپسىردى. 

تراسسا قايدا ورنالاسقان؟

«شىمبۇلاق» تاۋ-شاڭعى كۋرورتىنداعى تراسسا «كونۋس» بوكتەرىندە ورنالاسادى. جارىس وتەتىن ايماققا تۋريستەر جىبەرىلمەيدى. ال «شىمبۇلاقتا» شاڭعى تەۋىپ جۇرگەن قوناقتاردىڭ بارلىعى جارىستى تىكەلەي تاماشالاي الادى. 

قاشان جانە نەشەدە باستالادى؟

تۋرنير 2-3 ناۋرىز كۇندەرى وتەدى. ەكى كۇن بويى جانكۇيەرلەر مەن كورەرمەندەر الەمدەگى ۇزدىك سپورتشىلاردىڭ جارىسىنا كۋا بولماق. 2 ناۋرىز كۇنى جەكەلەي سىنداعى, 3 ناۋرىز كۇنى پاراللەلدى موگۋلداعى جەڭىمپازدار مەن جۇلدەگەرلەر انىقتالادى. كۋبوكتىك دودانىڭ ءبىرىنشى كۇنىندە جارىس استانا ۋاقىتىمەن 09.45-تە باستالادى. فينالدىق باسەكەلەر 13.30-عا جوسپارلانعان. كەلەسى كۇنى جارىس 11.55-تە باستالادى. ماراپاتتاۋ ءراسىمىن قوسا ەسەپتەگەندە ەكى كۇنگى جارىس 15.00-گە دەيىن سوزىلادى. 

بيلەت الۋ كەرەك پە؟

بيلەت الۋ قاجەتتىلىگى تۋىندامادى. بار بولعانى, «شىمبۇلاققا» جەتىپ, «سكي-پاسس» الساڭىز جەتكىلىكتى. وزىڭىزگە ىڭعايلى ورىنعا وتىرىپ, ۇلكەن ەكراندار ارقىلى جارىستى تاماشالاساڭىز بولادى. ەگەر شىنايى جانكۇيەر بولساڭىز, تراسسانىڭ جانىندا تۇرىپ, سپورتشىلارعا قولداۋ كورسەتۋگە مۇمكىندىك بار. بۇل كۇنى باسقا بوكتەرلەردە شاڭعى تەپسەڭىز دە, ەش كەدەرگى جوق. 

قاي ەلدىڭ سپورتشىلارى قاتىسادى؟

الماتىداعى فينالدىق كەزەڭدە 13 ەلدىڭ وكىلدەرى باق سىنايدى. اتاپ ايتار بولساق, اۆستراليا, ۇلىبريتانيا, گەرمانيا, قازاقستان, كانادا, قىتاي, وڭتۇستىك كورەيا, رەسەي, اقش, فينليانديا, فرانتسيا, شۆەتسيا جانە جاپونيا سپورتشىلارى قورىتىندى كەزەڭدە جۇلدەگە تالاسادى.

سپورت جۇلدىزدارىنان كىمدەر بار؟

الماتىعا اۆستراليالىق ەنتوني دجاكارانىڭ كەلمەيتىنى بەلگىلى بولدى. ول الەم كۋبوگىنىڭ جالپى ەسەبىندە ەكىنشى ورىندا تۇرعان سپورتشى. ەنتوني حرۋستال گلوبۋسقا تالاسا المايدى. «شىمبۇلاقتان» قازاق جانكۇيەرلەرى وليمپيادا چەمپيونى ميكاەل كينگسبەري (كانادا) مەن پەررين لاففون (فرانتسيا), الەم چەمپيونى يۋليا گالىشەۆا (قازاقستان) جانە 2017 جىلعى الەم چەمپيونى يكۋما حيروشيما (جاپونيا) باستاعان تانىمال سپورتشىلاردى كورە الادى. 

قازاقستان كومانداسىنىڭ باس باپكەرى ەلەنا كرۋگلىحينا الماتىداعى دوداعا ۇلتتىق قۇراما سپورتشىلارى تولىق قاتىساتىنىن مالىمدەدى. ولارعا تەك جانكۇيەر قولداۋى قاجەت. 

قازاقستان كومانداسىنىڭ قۇرامى: يۋليا گالىشەۆا, دميتري رەيحەرد, پاۆەل كولماكوۆ, اياۋلىم امىرەنوۆا, الەكساندر گەبەرت, كونستانتين گورلاچەۆ, سەرگەي رومانوۆ, ولەگ تسينن.

الماتىداعى الەم كۋبوگى كەزەڭىنىڭ ايىرماشىلىعى قانداي؟

«شىمبۇلاقتا» مۇنداي ءىرى سپورتتىق وقيعا العاش رەت وتكەلى وتىر. ودان بولەك, جانكۇيەرلەر الەم كۋبوگى كەزەڭدەرىنىڭ جەڭىمپازىن ماراپاتتاۋ ساتىنە كۋا بولادى. ۇزدىك سپورتشىلارعا حرۋستال گلوبۋس تابىس ەتىلەدى. ەكى كۇن بويى بىزدەگى تاۋ-شاڭعى كۋرورتى الەمدىك فريستايلدىڭ وتانى بولماق. 

سونداي-اق, 2011/2012 جىلعى ماۋسىمنان بەرى الەم كۋبوگىنىڭ جالپى ەسەبىندە جەڭىلىپ كورمەگەن كانادالىق ميكاەل كينگسبەري دە جانكۇيەرلەر ءۇشىن قىزىقتى بولارى ءسوزسىز. الماتىدا ول قاتارىنان سەگىزىنشى رەت ۇزدىك اتانۋى مۇمكىن. 

الەمدىك رەيتينگتەگى ۇزدىكتەر كىمدەر؟

ايەلدەر:

1. پەررين لاففون (فرانتسيا);

2. ەنتوني دجاكارا (اۆستراليا);

3. دجەيلين كاۋف (اقش);

4. يۋليا گالىشەۆا (قازاقستان);

5. تەسس دجونسون (اقش).

ەرلەر:

1. ميكاەل كينگسبەري (كانادا);

2. بەندجامين كاۆەت (فرانتسيا);

3. يكۋما حوريشيما (جاپونيا);

4. ۋولتەر ۋولبەرگ (شۆەتسيا);

5. مەتت گرەم (اۆستراليا).

قازاقستاندىق دميتري رەيحەرد جاراقاتىنا بايلانىستى بەسىنشى ورىننان جەتىنشى ساتىعا تومەندەدى.