18 جاسقا دەيىنگى جاسوسپىرىمدەر جينالعان ايتۋدى دودا 2 ناۋرىزعا دەيىن جالعاسادى.
ۇيىمداستىرۋشىسى سولتۇستىك قازاقستان اكىمدىگى مەن قازاقستان تەننيس فەدەراتسياسى بولىپ تابىلاتىن «ITF JuniorsG4» باسەكەسىنە رەسەي, اقش, وزبەكستان, تاجىكستان جانە قازاقستاننان جۇزدەن استام جاس تەننيسشىلەر قاتىسىپ, جەڭىمپازدار انىقتالاتىن بولادى.
ءتۋرنيردىڭ اشىلۋ سالتاناتىندا سويلەگەن سوزىندە ايماق باسشىسىنىڭ ورىنباسارى ماديار قوجاحمەت سوڭعى جىلدارى وڭىردە ۇلكەن تەننيسپەن شۇعىلدانۋشىلار قاتارىنىڭ كوبەيىپ كەلە جاتقانىن, وعان بىلتىر اتاقتى ۆەلوشاباندوز, لوندون وليمپياداسىنىڭ چەمپيونى الەكساندر ۆينوكۋروۆ اتىنداعى امبەبەپ تەننيس ورتالىعىنىڭ پايدالانۋعا بەرىلۋى ايتارلىقتاي ىقپال ەتكەنىن جەتكىزدى.
العاشقى كەزەڭدە ىرىكتەۋ جارىسى ءوتىپ, ودان سۇرىنبەگەندەرى اقتىق سايىسقا جولداما الادى.
تۋرنيرگە Orda invest, Terra Motors, Argymaq, Beeline سەكىلدى بەلگىلى فيرمالار دەمەۋشىلىك كورسەتىپ وتىر.
ءسوز اراسىندا بولات وتەمۇراتوۆ باسقاراتىن قازاقستان تەننيس فەدەراتسياسى حالىقارالىق, ايماقتىق ءىرى جوبالاردى ۇيىمداستىرىپ, قولداۋ كورسەتىپ كەلە جاتقانانىن ايتا كەتكەن ءجون.
ءومىر ەسقالي,
«Egemen Qazaqstan»
سولتۇستىك قازاقستان وبلىسى