يۋري پوپوۆ كەز كەلگەن مۋزىكالىق اسپاپتا ەركىن وينايدى. ءاندى دە جاقسى شىرقايدى. ونىڭ ادامدى ءتانتى ەتەتىن باسقا دا قىرلارى بار.
ەندى قاراڭىز, نەگىزگى ماماندىعى مۋزىكانت بولعانىمەن مەكتەپتە ەلەكتر قوندىرعىلار بويىنشا ينجەنەر بولىپ جۇمىس ىستەيدى. بۇل دا ونىڭ جان-جاقتى ونەر يەسى ەكەنىن ايعاقتاسا كەرەك. ال بوس ۋاقىتىندا, قولى قالت ەتكەندە نەمەن اينالىسادى دەسەڭىزشى؟ تاڭداپ العان سۇيىكتى ءىسى, بىلايشا ايتقاندا, ەرمەگى تاڭداندىرماي قويمايدى. مەحناتقا تولى جانكەشتى, كۇردەلى ەڭبەك دەسە دە بولادى. ونىڭ ءبىراز جىلدان بەرى كەمە مودەلدەۋ ىسىمەن اينالىسادى. بىردە ينتەرنەت پاراقشالارىن اقتارىپ وتىرىپ كونە كەمە سۋرەتتەرىن كەزىكتىرىپ, كىشىرەيتىلگەن نۇسقاسىن جاساۋعا اڭسارى اۋعان. ەرەن قىزىعۋشىلىق جەتەگىندە بىرنەشە كۇن ءارى-ءسارى كۇيگە ءتۇسىپ جۇرگەن. اقىرى الدىنا ماقسات قويسا سوعان جەتكەنشە تىنىم تاپپايتىن تاباندىلىق قاسيەتى جەڭىپ, ءۇش دىڭگەكتى جەلكەندى كەمەنى جاساۋعا باقانداي ەكى ايى ۋاقىتىن سارپ ەتكەن. وي, ءپالى-اي دەسەڭشى, كۇندىز-ءتۇنى كوزدىڭ مايىن تاۋىسىپ, ءبىر كۇنى جالىعىپ كەتسەم, تاستاي سالارمىن, ودان ەشتەڭەم كەتە قويماس دەگەن ىشكى سايتاني ويدىڭ ورنىنا ەرەكشە ءبىر كۇش پايدا بولىپ, تۇما بۇلاقتاي بۇلقىنىپ الا جونەلگەنىنە ءالى كۇنگە دەيىن قايران.
«قولونەرگە بۇرىننان ءبىرتابان جاقىندىعىم بار ەد. اشەكەيلى كەزدىك, پىشاق جاساۋمەن شۇعىلداندىم. ءتىپتى تەرى وڭدەگەن كەزىم دە بولدى,»دەيدى سەگىز قىرلى, ءبىر سىرلى جان.
باستاپقىدا تۇپنۇسقادان اينىتپاۋعا تىرىسسا, قازىر وي-قيالىنا دا ەرىك بەرىپ قويادى. ماسەلەن, ەكى دىڭگەكتى بريگ كەمەسىن ءۇش دىڭگەكتى ەتىپتى. سوندا بۇرىنعىدان دا ادەمىرەك, اسەمدىرەك كورىنگەن. ونىڭ ايتۋىنشا, جەلكەندى فلوت داۋىرىندە 12-16 ادامدىق بريگتەر كوپەس كەمەلەرىن كۇزەتىپ, بارلاۋشى قىزمەتىن اتقارعان. بۇيىمدى جاساماس ءۇشىن الدىنالا تاريحىن زەرتتەپ الىپ, ۇساق-تۇيەگىنە دەيىن ەرەكشە ءمان بەرگەن. جۋىردا ونىڭ كوللەكتسياسىن تولىقتىرعان بريگتىڭ ۇزىندىعى 70 سانتيمەتر, بيىكتىگى 80 سانتيمەتر. وعان جۇقا اعاش پەن جەلىمدى عانا قولدانعاندىقتان, سالماعى جەپ-جەڭىل. ساتىسى, دىڭگەكتەرى, ءشپيلى, شتۋرۆالى, ءتىپتى زەڭبىرەكتەرىنە دە قاز-قالپىندا ورناتىلعان.
ءومىر ەسقالي,
«Egemen Qazaqstan»
سولتۇستىك قازاقستان وبلىسى