استانادا ءوتىپ جاتقان «نۇر وتان» پارتياسىنىڭ XVIII سەزىندە ءسوز سويلەگەن حالىقارالىق تۇركى اكادەمياسىنىڭ پرەزيدەنتى دارحان قىدىرالى تاۋەلسىزدىك جىلدارىنداعى جەتىستىككە توقتالىپ, قازىرگى تاڭدا قازاق اتانۋدىڭ ماقتانىش ەكەنىن جەتكىزدى.
«وسى جەڭىستى, جەمىستى جيىرما جىلدىڭ ەل شەجىرەسىنە التىن ارىپتەرمەن جازىلارى انىق. ازاتتىقتىڭ ارايلى تاڭىنان كوشىڭىز قۇيىلدى, جۇرتىڭىز جيىلدى! اسقاق استانا تورتكۇل دۇنيەگە تورەلىك ايتاتىن, تۇگەل تۇركىنىڭ ءتورى دەپ تانىلدى. ويداعى ورناپ, كوڭىل جايلاندى. بەرەكە-بىرلىگى بەكەم بايتاعىڭىزعا باقىت بايلاندى. ەڭ باستىسى, قازاق بولۋ – ۇلكەن ماقتانىشقا اينالدى! پارتيا قاشاندا وسى تاعدىرشەشتى تاريحي ىستەردىڭ بەل ورتاسىندا ءجۇردى. وزەگىن ءوزىڭىز سالىپ بەرگەن ۇلكەن ءۇردىس جالعاسا بەرەدى دەپ سەنەمىز!» دەدى د.قىدىرالى.
سونداي-اق حالىقارالىق تۇركى اكادەمياسىنىڭ پرەزيدەنتى «نۇر وتان» پارتياسىنىڭ باعدارلاماسى ەلباسىنىڭ قوعامدىق كەلىسىم تۋرالى ايتقان يدەياسىمەن ساي كەلەتىنىن جەتكىزدى.
«2011 جىلى تۇركىستاندا زيالى قاۋىم وكىلدەرىمەن كەزدەسكەندە قوعامدىق كەلىسىمنىڭ كەپىلى ەلىمىزدەگى بارلىق ەتنوستاردىڭ قازاق ءتىلى, قازاق تاريحى جانە مادەنيەتىن مەڭگەرۋمەن تىكەلەي بايلانىستى ەكەنىن باسا ايتقان ەدىڭىز. بۇگىنگى مەرەيلى مەزەتتە قابىلدانعان پارتيا باعدارلاماسى وسى يدەياڭىزبەن قابىسىپ وتىر. پارتيانىڭ «قازاق حالقىنىڭ ءتىلىن, تاريحىن, داستۇرلەرىن, گۋمانيتارلىق جانە يماندىلىق قاعيداتتارىن ەلىمىزدە تۇراتىن بارلىق ەتنوستىق توپتاردىڭ وكىلدەرى اراسىندا كەڭىنەن ناسيحاتتاۋ» تۋرالى باستاماسى جاستاردى پاتريوتيزمگە تاربيەلەۋمەن بىرگە, ۇلتتىق بىرەگەيلىكتى قامتاماسىز ەتەدى دەپ ويلايمىز» دەدى د.قىدىرالى.
بۇدان بولەك, د.قىدىرالى ەلباسىنىڭ « ۇلى دالانىڭ جەتى قىرى» ماقالاسى بايقالدان بالقانعا دەيىنگى باۋىرلاس ەلدەردە جىلى قابىلدانعانىن اتاپ ءوتتى.
ء«سىز بولات بالقىتىپ, قۇرىشتاي شىڭدالعان كوشباسشى رەتىندە تەمىردى قامىرشا يلەپ, اعاشتان ءتۇيىن تۇيگەن, تەرىنى تۇرلەندىرىپ, كيىزدى كەستەلەگەن دانا بابالارىمىزدىڭ الەمدىك وركەنيەتكە قوسقان ۇلەسىن تاپ باسىپ, تانىدىڭىز! وسى ورايدا, « ۇلى دالانىڭ جەتى قىرى» جىلقىنىڭ جالىندا وسكەن جاۋىنگەر جۇرتتىڭ قالعىپ كەتكەن پاسسيونارلىق رۋحىن قايتا وياتقانداي بولدى! سوندىقتان ماقالاڭىزدى بايقالدان بالقانعا دەيىنگى باۋىرلاس ەلدەر «ۇلتتىق كود», «رۋحاني يممۋنيتەت» رەتىندە قابىلدادى. ازىرەت قونعان ءاز قالا – تۇركىستان قايتا تۇلەپ, ورتالىق ازياداعى ىنتىماقتىڭ رۋحاني ۇيىتقىسى اتاندى. ۇلى دالا – الەمدىك تۇركولوگيانىڭ جاڭا باعىتىنا اينالدى!» دەدى د.قىدىرالى.
ايتا كەتەيىك, بۇگىن استانادا نۇر وتان» پارتياسىنىڭ XVIII سەزى ءوتىپ جاتىر. جيىنعا ەلباسى نۇرسۇلتان نازارباەۆ قاتىسۋدا.