قازاقستان تەڭگەسى بانكنوتتارىنداعى ءماتىن ەندى تەك قازاق تىلىندە جازىلادى. بۇل تۋرالى قازاقپارات حابارلادى.
«ۇلتتىق ۆاليۋتا - قازاقستان تەڭگەسى بانكنوتتارى مەن مونەتالارى ديزاينىنىڭ تۇجىرىمداماسىن بەكىتۋ تۋرالى» قر پرەزيدەنتىنىڭ 2018 جىلعى 12 جەلتوقسانداعى № 804 جارلىعىندا تەڭگە ماتىنى قازاق تىلىندە جازىلاتىنى ايتىلعان.
«بانكنوتتار مەن مونەتالار ديزاينىندا پايدالانىلاتىن جازبالار ءماتىنى مەملەكەتتىك تىلدە رەسىمدەلەدى. ينۆەستيتسيالىق جانە كوللەكتسيالىق مونەتالار ديزاينىندا شەت تىلدەردە جازبالار پايدالانۋعا جول بەرىلەدى», - دەلىنگەن قازاقستان تەڭگەسi بانكنوتتارى مەن مونەتالارى ديزاينىنىڭ تۇجىرىمداماسىنىڭ 2- تاراۋىندا.
سونىمەن قاتار وندا ينۆەستيتسيالىق جانە كوللەكتسيالىق مونەتالار ديزاينىندا مونەتالار دايىندالعان مەتالدى, ونىڭ سىنامىن جانە ماسساسىن بىلدىرەتىن جازبالاردى پايدالانۋعا جول بەرىلەتىنى اتاپ وتىلگەن.
ايتا كەتەيىك, بۇعان دەيىن بانكنوتتار مەن مونەتالاردا مەملەكەتتىك جانە ورىس تىلدەرىندەگى جازۋلار پايدالانىلاتىنى زاڭدى كۇشىندە بولعان ەدى.
«شەت تىلىندە رەسىمدەلەتىن باسقا ەلدەردىڭ تاپسىرىستارى بويىنشا دايىندالاتىن كوللەكتسيالىق مونەتالاردى قوسپاعاندا, كوللەكتسيالىق جانە ينۆەستيتسيالىق مونەتالاردا جازۋلاردىڭ ءماتىنى مەملەكەتتىك, سونداي-اق ورىس نەمەسە شەت تىلدەرىندە رەسىمدەلەدى», -دەپ جازىلعان ەدى قۇجاتتا.