«اكىم بول, حالقىڭا جاقىن بول» دەيدى قازاق دانالىعى. ەلمەن ەتەنە ەڭبەك ەتىپ, الەۋمەتتىڭ الەۋەتىن ارتتىرۋعا كۇش سالۋ اكىمدەردىڭ مىندەتى. اۋىل احۋالىن ارتتىرۋ بۇگىنگى تاڭداعى وزەكتى ماسەلە بولعاندىقتان, بۇل تۇرعىدا بەرەكەلى ءىستىڭ باستاۋى بولعان اۋىلدار دا بار. اسىرەسە الىس اۋىلدارداعى احۋالدىڭ دۇرىستالىپ كەلە جاتقانى قالىڭ بۇقارانى قۋانتپاي قويمايدى. جامبىل وبلىسى, شۋ اۋدانى, بالۋان شولاق اۋىلدىق وكرۋگى وبلىس ورتالىعىنان جۇزدەگەن شاقىرىم قاشىقتىقتا جاتىر.دەسە دە, اۋىلدا تالاي جىلدان بەرى شەشىلمەي كەلە جاتقان ماسەلەلەر بۇگىندە وڭ شەشىمىن تاۋىپ, تۇرعىنداردىڭ تىلەگى ورىندالىپ كەلەدى.
اۋىلدىق وكرۋگ اكىمى نايمان سۇلتانباەۆتىڭ ايتۋىنشا, ەلباسىنىڭ «تۋعان جەرگە تۋىڭدى تىك!» باعدارلاماسى شەڭبەرىندە اۋىلدا تالاي تىرلىك تىندىرىلعان. كاسىپكەرلەردىڭ دەمەۋشىلىگىمەن سوعىس ارداگەرى تەمىربەك قالىقوۆتىڭ ۇيىنە ارنايى جۋىنۋ بولمەسىن جاساپ بەرەدى. بۇل ىسكە بۇگىندە الماتى قالاسىندا تۇراتىن اۋىل تۇلەكتەرى ءسابيت وسپانوۆ پەن ءانۋار وماربەكوۆ سىندى ازاماتتار قولداۋ كورسەتەدى. «تەمىربەك قالىقوۆ اتامىزدان
باتا الۋعا بارعانىمدا, ول كىسىنىڭ اسىرەسە قىستىڭ كۇنى دالاعا شىعۋى قيىنداپ كەتكەنىن كوردىم. سوندىقتان وسىنداي وي كەلدى», دەيدى اۋىل اكىمى.
وكرۋگ ورتالىعى كوكتوبە اۋىلىندا بۇرىن-سوڭدى بولماعان اركا ماسەلەسى وڭدى شەشىلىپ, ەلدى مەكەنگە كىرە بەرىس تۇسقا بارىس بەينەسى بەينەلەنگەن ەسكەرتكىش قويىلعان. تۇرعىندار بۇل تىرلىكتە دە اۋىل اكىمى قازىنا قارجىسىنا قاراماي, دەمەۋشىلەردىڭ كومەگىمەن جۇمىستىڭ جۇيەسىن تاپقان. بۇدان بولەك, اكىمنىڭ باستاماسىمەن اۋدانعا قاراستى بىردە-ءبىر اۋىلدىق وكرۋگتە جوق ەلدى مەكەننىڭ تولقۇجاتى كىرە بەرىس تۇسقا ىلىنگەن.
اۋىلدا گاز بەن ساياباق ماسەلەسى كۇنى بۇگىنگە دەيىن وزەكتى بولىپ كەلىپتى. الايدا ارادا كوپ ۋاقىت وتپەي كوكتوبە اۋىلىنان ءسانى مەن سالتاناتى كەلىسكەن ساياباق بۇقاراعا ەسىگىن ايقارا اشىپ, كوگىلدىر وتىنعا دا حالىق قول جەتكىزەدى. ساياباققا دەمەۋشىلىك كورسەتكەن اۋىلدان شىققان ۇسەنباەۆتار اۋلەتى ەكەن. «اۋىلداعى مادەنيەت ءۇيى كۇردەلى جوندەۋدەن ءوتىپ, شاعىن فۋتبول الاڭشالارى مەن مەديتسينالىق ورتالىقتار اشىلىپ, پوشتا قىزمەتى دە رەتكە قويىلعان», دەيدى اۋىل تۇرعىندارى.
اۋىلدا جىل سايىن بىرلىك كۇنى مەرەكەسىنە وراي, كاسىپكەرلەردىڭ دەمەۋشىلىگىمەن وكرۋگتەن شىققان از قامتىلعان وتباسىلاردىڭ بالالارىن, مۇمكىندىگى شەكتەۋلى جانداردىڭ, ارداگەرلەر مەن وزگە ۇلت وكىلدەرىنىڭ باسىن قوسىپ, «تاۋەلسىز قازاقستان – دوستىق مەكەنى» اتتى استانا قالاسىنا ساياحات ۇيىمداستىرىلادى. ال جىلدا جەڭىس كۇنى قىرعىز-قازاق اتبەگىلەرىنىڭ باسى قوسىلىپ, الامان تاي, قۇنان, اۋدارىسپاق, تەڭگە ءىلۋ, قىز قۋ, كوكپار تارتۋ ادەتكە اينالعان. سونداي-اق, وسى كۇنى سوعىستان قايتپاعان ساربازداردى ەسكە الۋعا ارنالعان شارا وتكىزۋ, ورتالىق مەشىتتە اس بەرىپ, ارۋاقتارعا قۇران باعىشتاۋ دا كۇنى بۇگىنگە دەيىن يگى جالعاسىن تابۋدا.
اۋىلدا مەشىت ماسەلەسى دە تالاي جىلدان بەرگى حالىقتىڭ تىلەگى بولاتىن. مۇنى ەسكەرگەن نايمان كەنجەحان ۇلى الماتىعا بارىپ, اۋىلدان شىققان كاسىپكەرلەرگە ەلدى مەكەننىڭ تىنىس-تىرشىلىگىن بايان ەتىپ, بۇقارانىڭ تىلەگىن جەتكىزەدى. كوپتىڭ ىشىنەن كوش باستاپ شىققان ماتىشەۆتەر اۋلەتىنىڭ دەمەۋشىلىگىمەن وتكەن جىلى 350 ادامعا ارنالعان مەشىتتىڭ قازىعى قاعىلادى. بۇگىندە بىرنەشە قاباتتان تۇراتىن مەشىتتە ەرلەر مەن ايەلدەرگە ارنالعان بولەك بولمە, اسحانا, جۋىنۋ, ءتىپتى تىنىعۋ ورىندارىنا دەيىن قامتاماسىز ەتىلگەن. بۇل شارالارعا قاجەتتى قارجىنىڭ بارلىعىن اۋىل تۇرعىندارى ءبىر ءۇيدىڭ بالاسىنداي جۇمىلا كوتەرىپتى. ال جاڭا سالىنعان مەشىتتىڭ ماڭىنان ورنى بەلگىلەنگەن سپورت كەشەنىنىڭ قازىعىن ماسكەۋ وليمپياداسىنىڭ چەمپيونى جاقسىلىق ۇشكەمپىروۆ قاعادى. ال اۋىلداعى وڭ وزگەرىستى كورگەن 20 جىلدىق مەكتەپ بىتىرۋشىلەردىڭ اتىنان ايتجان اشيمحانوۆ ەسىمدى ازاماتتىڭ ءوزى اكىمدى ىزدەپ كەلىپ, ەلدى مەكەننىڭ كىرە بەرىسىنە اركا ورناتۋعا ۇسىنىس جاسايدى. قازىر بالۋان شولاق اۋىلىن بەتكە العان جولاۋشىلاردى ءزاۋلىم دە, قازاقى ناقىشتى اركا قارسى الادى. جانە دەمەۋشىلەردىڭ دە سانى ارتىپ, ءاشىمحانوۆتار اۋلەتى زاماناۋي سپورت كەشەنىن سالىپ بەرۋگە نيەت بىلدىرەدى. جوبالاۋ-سمەتالىق قۇجاتتارى ازىرلەنىپ جاتقان كەشەن قۇرىلىسى «جاستار جىلىنا» ورايلاستىرىلماق. بۇدان بولەك, اۋىل تۋماسى, بۇگىندە الماتى قالاسىنىڭ تۇرعىنى نۇردان ساعىندىقوۆتىڭ دەمەۋشىلىگىمەن «جاستار» ساۋىقتىرۋ ورتالىعىن دا اشۋ كوزدەلۋدە. وعان قاجەتتى جوبالاۋ-سمەتالىق قۇجاتتارى دايىندالۋدا. مۇندا شاشتاراز, ناۋبايحانا, الەۋمەتتىك دۇكەندەرمەن قاتار, بالالار مەن جاسوسپىرىمدەرگە ارنالعان ءتۇرلى ورىندار قىزمەت كورسەتەتىن بولادى. تاعى ءبىر جانعا جىلۋ بەرەتىن نارسە, وكرۋگ ورتالىعىنان بالۋان شولاق اتىنداعى مۇراجايدىڭ دا قۇرىلىسى قولعا الىنباق. بۇل ماقساتتا اۋىل اكىمى قىزىلجار ولكەسىنە ارنايى بارىپ, اقىن, كومپوزيتور بالۋان شولاق تۋرالى تىڭ دەرەكتەر جيناپ كەلگەن. ەندى تاريحي تۇلعاعا ارنالعان مۇراجايدىڭ لەنتاسى بيىل قيىلادى دەپ كۇتىلۋدە. «ودان بولەك, «جاستار جىلىنا» وراي وكرۋگ ورتالىعىنان «ماڭگىلىك ەل» جاستار ساياباعى دا سالىنادى. وندا 12 قاناتتى كيىز ءۇي تىگىلىپ, حالىققا ۇلتتىق سۋسىندار ۇسىنىلىپ, التىباقان قۇرىلىپ, ءتۇرلى اباتتاندىرۋ جۇمىستارى دا جۇرگىزىلەدى», دەيدى اكىم.
حاميت ەسامان,
«Egemen Qazagstan»
جامبىل وبلىسى