2019 جىلعى 21 اقپاندا ەكاتەرينبۋرگ قالاسىنىڭ جانىندا ورىن العان جول-كولىك اپاتى سالدارىنان قازاقستان رەسپۋبليكاسىنىڭ بەس ازاماتى زارداپ شەكتى. ىشىندە ءبىزدىڭ ازاماتتار بار Mercedes-Benz Sprinter ميكرواۆتوبۋسى قار تازالايتىن تەحنيكامەن سوقتىعىسقان. اۆتوكولىك جۇرگىزۋشىسى قازاقستان ازاماتى بولىپ تابىلادى.
قازاقستاننىڭ قازان قالاسىنداعى باس كونسۋلدىعى جەرگىلىكتى بيلىكپەن شۇعىل بايلانىسقا شىعىپ, ءبىزدىڭ ديپلوماتتار ەكاتەرينبۋرگتەگى قازاق دياسپوراسىنىڭ وكىلدەرىمەن بىرگە زارداپ شەككەن وتانداستارىمىزعا بارلىق قاجەتتى كومەك كورسەتۋدە. وعان قوسا, قر قازانداعى باس كونسۋلى ەركىن تۇقىموۆ جانە كازاق دياسپوراسى ۇيىمىنىڭ جەتەكشىسى زارداپ شەككەن ازاماتتارمەن اۋرۋحانادا كەزدەستى.
باس كونسۋلدىڭ سۆەردلوۆ وبلىسى حالىقارالىق جانە ەكونوميكالىق بايلانىستار جونىندەگى مينيسترىمەن كەزدەسۋى بارىسىندا ءبىزدىڭ ازاماتتارعا بارلىق مەديتسينالىق كومەك كورسەتۋدى سۇرادى. ءوڭىردىڭ دەنساۋلىق ساقتاۋ مينيسترلىگىنە ءتيىستى تاپسىرما بەرىلدى.
قازىرگى ۋاقىتتا ءۇش ايەل اۋرۋحانادا, ءوز ەستەرىن جيعان جانە قالپىنا كەلتىرۋ تەراپياسىنان وتۋدە. قالعان ەكى ايەل العان جاراقاتتارىنىڭ ايتارلىقتاي ەمەستىگىنە بايلانىستى اۋرۋحانادان شىعارىلعان. كولىك جۇرگىزۋشىسى جاراقاتتاردىڭ جوقتىعىنا بايلانىستى اۋرۋحاناعا جەتكىزۋدەن باس تارتتى.
اتالعان ماسەلە قازاقستاننىڭ قازان قالاسىنداعى باس كونسۋلدىعىنىڭ باقىلاۋىندا.