سەيسەنبى, 5 ماۋسىم 2012 6:50
كەشە مادەنيەت جانە اقپارات مينيسترلىگى ءتىل كوميتەتىنىڭ ۇيىمداستىرۋىمەن «ءتىل – تاتۋلىق تىرەگى» دەگەن تاقىرىپتا دوڭگەلەك ۇستەل وتكىزىلدى.
دوڭگەلەك ۇستەلدى كوميتەت توراعاسى ماقسات سقاقوۆ ءجۇرگىزدى. وعان ەلىمىزدىڭ بارلىق ءوڭىرلەرىنەن كەلگەن مەملەكەتتىك ءتىلدى بىلەتىن جيىرماعا تارتا وزگە ۇلت وكىلدەرى قاتىستى.
سەيسەنبى, 5 ماۋسىم 2012 6:50
كەشە مادەنيەت جانە اقپارات مينيسترلىگى ءتىل كوميتەتىنىڭ ۇيىمداستىرۋىمەن «ءتىل – تاتۋلىق تىرەگى» دەگەن تاقىرىپتا دوڭگەلەك ۇستەل وتكىزىلدى.
دوڭگەلەك ۇستەلدى كوميتەت توراعاسى ماقسات سقاقوۆ ءجۇرگىزدى. وعان ەلىمىزدىڭ بارلىق ءوڭىرلەرىنەن كەلگەن مەملەكەتتىك ءتىلدى بىلەتىن جيىرماعا تارتا وزگە ۇلت وكىلدەرى قاتىستى.
دوڭگەلەك ۇستەل بارىسىندا وعان قاتىسۋشىلاردىڭ دەنى مۇعالىمدەر, باق وكىلدەرى, مادەنيەت سالاسىنىڭ قىزمەتكەرلەرى ەكەنىن بايقادىق. مىسالى, «استانا» تەلەارناسىندا قىزمەت ءىستەيتىن ماكسيم روجين, «مەرەي» حالىقتىق ءانسامبلىنىڭ ءانشىسى سەرگەي سەمىگين, قىزىلوردا قالاسىنداعى «قوعام تۆ» تەلەارناسىنىڭ ءجۋرناليسى ەلەنا رىبينا كوپكە تانىلىپ قالعان جاندار دەسەك قاتەلەسپەيمىز. سونداي-اق, دوڭگەلەك ۇستەلدە قاراعاندى وبلىسىنان كەلگەن قازاق ءتىلى ءپانىنىڭ مۇعالىمى تاتيانا احمەتوۆا, وسكەمەن قالاسىنداعى مەملەكەتتىك ءتىلدى ۇيرەتۋ ورتالىعىنىڭ وقىتۋشىسى نادەجدا شۋشانيكوۆا, توتەنشە جاعدايلار مينيسترلىگى ءباسپاسوز قىزمەتىنىڭ وكىلى ليۋبوۆ شاپوچنيكوۆا سىندى جاستار دا مەملەكەتتىك ءتىلدى دامىتۋعا قاتىستى ءوز ويلارىن ورتاعا سالدى.
م.روجين قازاق ءتىلىنىڭ تاعدىرىنا الاڭدايتىن جاندار ءۇشىن كوڭىل قۋانتاتىن شارۋالار اتقارىلىپ جاتقانىمەن, ونىڭ ءناتيجەسى ءالى دە تومەن ەكەنىن ايتتى. «قازىرگى كەزدە ءتىلدى ناسيحاتتاۋ جۇمىستارى كۇشەيتىلدى. ءناتيجەسىندە «قازاقستان» تەلەارناسى تەك قازاق تىلىندە حابار تاراتاتىن بولدى. قازاق تىلىندەگى وقۋلىقتاردىڭ سانى كوبەيدى. قازاق ءتىلىنە اۋدارىلىپ جاتقان فيلمدەر كوبەيدى. بىراق بۇل ءالى دە جەتكىلىكسىز» دەگەن ول قازاق ءتىلىنىڭ يميدجىن كوتەرۋ تۋرالى ءوز ۇسىنىسىن جەتكىزدى. ونىڭ ويىنشا, قازاق تىلىنە ەڭ ءبىرىنشى كەزەكتە جاعىمدى جارناما جاسالۋ كەرەك. ەكىنشىدەن, ءتىلدى ناسيحاتتايتىن ەرىكتىلەر توبى پايدا بولىپ, ولار ورىس ءتىلدى ورتالاردا مەملەكەتتىك ءتىلىمىزدى ناسيحاتتاۋمەن اينالىساتىن بولۋى شارت. «ەرىكتىلەر باسقا ءبىر جاقتان كەلمەيدى, ارينە, ءتىل جاناشىرلارى وسى قاتاردان تابىلسا», – دەيدى م.روجين.
وسكەمەندەگى مەملەكەتتىك ءتىلدى ۇيرەتەتىن ورتالىقتا وقىتۋشىلىق قىزمەت اتقاراتىن نادەجدا شۋشانيكوۆا نەگىزىنەن ءوز ورتالىقتارىنىڭ جۇمىسى جايىندا باياندادى. حالقىنىڭ 40 پايىزى وزگە ۇلت وكىلدەرىن قۇرايتىن ءوسكەمەن قالاسىنداعى بۇل مەكەمەگە وسى كۇنگە دەيىن ءتىل ءۇيرەنۋ ءۇشىن 18 مىڭعا جۋىق ادام تىركەلگەن. ورتالىقتىڭ «قازاق ءتىلىن ۇيرەنەيىك» اتتى سايتىنا 68 مىڭنان اسا ادام تىركەلىپتى. سونداي-اق ورتالىق جانىنان وزگە ۇلت وكىلدەرىنەن قۇرالعان پىكىرسايىس كلۋبى اشىلىپتى. بۇنىڭ دا ماقساتى بىرەۋ – قازاق ءتىلىن ۇيرەتۋ. نادەجدا قازاق ءتىلىن بىلمەيتىن قازاقتاردىڭ ءوزىنەن ساباق الاتىنىن قىنجىلا وتىرىپ اڭگىمەلەدى. «ءبىز نەگىزىنەن ەرەسەكتەرگە ءتىل ۇيرەتەمىز. ولار وي-پىكىرلەرى قالىپتاسقان جاندار. سوندىقتان ولارعا ءتىل ءۇيرەتۋ قيىنىراق. تەك دۇرمەككە ىلەسىپ, ساياسات ءۇشىن ءتىل ۇيرەنەم دەۋ اۋرەشىلىك. باستىسى, تىلگە دەگەن سۇيىسپەنشىلىك كەرەك», – دەيدى ول.
ايگۇل سەيىلوۆا,
«ەگەمەن قازاقستان».