چەمپيوندار ليگاسىنا شولۋ: اياكس – رەال مادريد, توتتەنحەم – بورۋسسيا د

«اياكس» – «رەال مادريد»

بۇگىنگى ويىنداردىڭ باستى ماتچى – «اياكس» پەن «رەال» اراسىنداعى كەزدەسۋ ەكەنى انىق. ونىڭ بىرنەشە سەبەبى بار. بىرىنشىدەن, «رەال» وسىعان دەيىن قاتارىنان ءۇش رەت چەمپيوندار ليگاسىن جەڭىپ العان بولاتىن. كورولدىك كلۋب بۇل جولى دا قوس قۇلاقتى كۋبوكتى باسىنان اسىرا كوتەرسەك دەپ ارماندايدى. ەكىنشىدەن, «اياكس» تا وڭاي شاعىلاتىن جاڭعاق ەمەس. ءارى كەزدەسۋ امستەردامدا وتەتىنىن ەسكەرسەك, «قۇدايدىڭ بالالارىن» قالپاقپەن ۇرىپ الۋ قيىنعا اينالادى.

الداعى كەزدەسۋدە گوللانديالىق كلۋبقا شابۋىلشى باندە كومەكتەسە المايدى. ول جاراقاتىنان ءالى ايىققان جوق. سونداي-اق ورتالىق قورعاۋشى فرەنك دە يونگتىڭ ويىنعا قاتىسۋى ەكىتالاي. ال «مادريد» ساپىنان لورەنتو مەن يسكو الاڭعا شىقپايدى. قالعان فۋتبولشىلار ماتچقا ساقاداي ساي.

اسىرەسە, «رەالدىڭ» اسىعى الشىسىنان ءتۇسىپ تۇر. ماۋسىمدى الا-قۇلا باستاعان كورولدىك كلۋب اقپان كەلگەندە اشۋىنا ءمىندى. اۋەلى «كامپ نوۋدا» باستى قارسىلاسى «بارسەلونانى» ءبىراز ساستىرسا, وتكەن اپتادا مادريدتىك دەربيدە «اتلەتيكودان» ايلاسىن اسىردى. ال «اياكس» كەرىسىنشە كەيىنگى ءۇش ويىننىڭ ەكەۋىندە ۇتىلىپ قالعان-دى.

جالپى, ەكى كوماندا ءوزارا 12 مارتە كەزدەسىپتى. سونىڭ 7-ەۋىندە «رەال» باسىم تۇسسە, 4 رەت «اياكس» جەڭىسكە باستار جولدى جاڭىلماي تاپتى. ءبىر ويىن عانا تەڭ اياقتالعان ەكەن.

ايتا كەتەرلىگى, كەيىنگى وتكەن 6 ماتچتا «مادريد» قاتارىنان جەڭىسكە جەتتى. ەكى كوماندا ءۇش رەت قاتارىنان توپتىق كەزەڭدە ويناعان-تۇعىن. امستەردامدىقتار قانشا تالپىنسا دا, قارسىلاسىنان ايلاسىن اسىرا العان جوق.

 «ەگەمەن» بولجام: بۇگىنگى ماتچ «يوحان كرويف» ارەنادا وتەتىنىنە قاراماستان, «رەالدىڭ» باسىم بولۋى ىقتيمال. سوندىقتان «ەگەمەن» وسى ويىندا كورولدىك كلۋب 3:1 ەسەبىمەن جەڭىسكە جەتەدى دەپ ەسەپتەيدى.

«توتتەنحەم» – «بورۋسسيا د»

وسى كەزەڭدەگى ەڭ تارتىستى ويىن «توتتەنحەم» مەن «بورۋسسيا دورتمۋند» اراسىندا وتەتىنى ءسوزسىز. ويتكەنى ەكى كوماندا دا شابۋىلداۋدى جانى سۇيەدى. ونىڭ ۇستىنە, ەكى كوماندانىڭ ءبىر-بىرىنە كەتكەن ەسەسى جەتەرلىك.

بىلتىر چەمپيوندار ليگاسىنىڭ توپتىق كەزەڭىندە كلۋبتار ءبىر توپقا تۇسكەن-تۇعىن. وتكەن ماۋسىمداعى ەكى ويىندا دا لوندوندىقتار قارسىلاسىنا ەش مۇمكىندىك بەرمەدى. ءبىرىنشى كەزدەسۋدە 3:1 ەسەبىمەن جەڭىسكە جەتسە, قارىمتا ماتچتا 1:2 ەسەبىمەن باسىم ءتۇستى. ال ودان ءبىر جىل بۇرىن, 2015-2016 جىلعى ماۋسىمدا كوماندالار ءدال وسى 1/8 فينالدا جولى تۇيىسكەن بولاتىن. سول كەزدە «بورۋسسيا» ەكى ويىندا دا جەڭىسكە جەتىپ, شيرەك فينالعا شىققان ەدى.

وكىنىشكە قاراي, ەكى كلۋب ساپىندا دا جاراقات العان ويىنشىلار جەتەرلىك. «توتتەنحەم» كلۋبىنىڭ سۇرمەرگەنى حارري كەين, ورتالىق الاڭدا ويقاستايتىن دەللە اللي, قورعاۋشى بەن دەۆيس جاراقاتىنان جازىلعان جوق. دەنني روۋزدىڭ الاڭعا شىعۋ-شىقپاۋى ەكىتالاي.

ال دورتمۋندتىقتار ساپىنان قورعاۋشىلار اكانجي, لۋكاش پيششەك, جارتىلاي قورعاۋشى ماركو رويس پەن شابۋىلشى پاكو الكاسەر ماتچقا قاتىسپايدى. ولاردىڭ ءبارى جاراقاتىنان ايىعىپ ۇلگەرمەدى. ال يۋليان ۆايگل تۇماۋراتىپ قالعان ەكەن.

 «ەگەمەن» بولجام: ەكى كوماندا دا قارىمتا شابۋىلعا يەك ارتىپ, قارسىلاسىنىڭ وسال تۇسىن تابۋعا تىرىساتىنى ءسوزسىز. «ەگەمەننىڭ» بولجامى بويىنشا «توتتەنحەم» ءبىر دوپ ايىرماسىمەن جەڭىسكە جەتۋى مۇمكىن. ەسەپ: 1:0