باتىس قازاقستان وبلىسىنىڭ دەنساۋلىق ساقتاۋ سالاسىنا قازىرگى تاڭدا 200 دارىگەر جەتىسپەيدى. جەرگىلىكتى بيلىك الماتى, استانا, اقتوبە قالالارىنداعى مەديتسينالىق وقۋ ورىندارىمەن بىرىگىپ, مامان تاپشىلىعىن جويۋدىڭ كوپجىلدىق جوسپارىن جاساعان.
بۇل جونىندە باتىس قازاقستان وبلىستىق قوعامدىق كەڭەس وتىرىسىندا ەسەپ بەرگەن ءوڭىر باسشىسى التاي كولگىنوۆ حابارلادى. كەيبىر سيرەك مامانداردى دايىنداۋ ءۇشىن وبلىس بيۋدجەتىنەن 16 ملن تەڭگە ءبولىنىپ, بۇگىندە 28 باتىسقازاقستاندىق ەلىمىزدىڭ ءتۇرلى مەديتسينالىق جوعارى وقۋ ورنىندا ءبىلىم الىپ جاتىر. ال 20 مامان «Alma University» فيليالىنىڭ وقۋ-كلينيكالىق بازاسىنىڭ ماگيستراتۋراسىندا وقيدى.
باتىس قازاقستان وبلىسى – ەلىمىز بويىنشا مەديتسينا سالاسىندا قاعازسىز قۇجات اينالىمىنا الدىمەن كوشكەن ءوڭىردىڭ ءبىرى. بۇگىندە وسى سالاداعى 121 ءتۇرلى قۇجات تولىعىمەن ەلەكتروندى فورماتقا كوشىرىلگەن. وڭىردەگى ءار ادامنىڭ ەلەكتروندى دەنساۋلىق تولقۇجاتى بار. 22 مىڭ تۇرعىن «k-vrachu.kz» ءموبيلدى قوسىمشاسىن قولدانادى. مەديتسينا مەكەمەلەرىندە «Kazmedinform» اقپاراتتىق جۇيەسى, ەلەكتروندى كەزەك جانە جەدەل جاردەمگە ارنالعان «اديس» اۆتوماتتى جۇيەسى ەنگىزىلگەن.
- وسىنداي جۇيەلى جۇمىستىڭ ناتيجەسىندە 2016-2018 جىلدار ارالىعىندا انا ءولىمى – 67%-عا, ءسابي شەتىنەۋى – 20%-عا, قاتەرلى ىسىككە شالدىعۋ – 6%-عا ازايدى. مەملەكەت پەن جەكەمەنشىكتىڭ ارىپتەستىگى ارقاسىندا وبلىستىق كلينيكالىق اۋرۋحاناعا ماگنيتتى-رەزونانستى توموگرافيا اپپاراتىن الدىق. شىڭعىرلاۋ اۋدانىنىڭ اقشات اۋىلىندا جاڭا دارىگەرلىك امبۋلاتوريا سالىندى, - دەدى التاي كولگىنوۆ.
سونىمەن بىرگە ورال قالاسىندا كارديوورتالىقتىڭ جاڭا عيماراتىنىڭ قۇرىلىسى باستالماق.
قازبەك قۇتتىمۇرات ۇلى,
«Egemen Qazaqstan»
باتىس قازاقستان