ارالار ماتەماتيكالىق تاپسىرمالاردى شەشە الادى

زەرتتەۋ ناتيجەسى «Science Advances» عىلىمي جۋرنالىندا جاريالانعان. ارانىڭ ميىندا بولاتىن ميلليونعا جۋىق نەيرون ماتەماتيكالىق تاپسىرمالاردى شەشىپ, ونى تۇسىنۋگە مۇمكىندىك بەرەدى ەكەن. ال ادامنىڭ ميىندا 90-95 ميلليارد نەيرون بار ەكەنىن ايتا كەتەيىك.

كەز كەلگەن ماسەلەنىڭ شەشىمىن تابۋدا ادام قىسقا مەرزىمدى جاد پەن ۇزاق مەرزىمدى جادتى قاتار قولدانا الادى. ءتۇيىندى شەشۋ جولى ۇزاق مەرزىمدى جادتا ساقتالادى. ال قىسقا مەرزىمدى جاد ۇلگى قاجەت ەتپەيتىن نارسەلەرگە جاۋاپ بەرەدى. بۇعان دەيىن مۇنداي شەشىمدى تەك ادام مەن جوعارى دەڭگەيلى پريماتتار عانا شەشە الادى دەپ كەلدىك. الايدا, ارالار دا وقيعانى ءتۇيسىنىپ, شەشىم قابىلداۋعا قابىلەتتى بولىپ شىقتى.

مەلبۋرن كورولدىك تەحنولوگيالىق ۋنيۆەرسيتەتىنىڭ عالىمدارى ءبىر كىرۋ جانە ەكى شىعۋ ەسىگى بار Y ءتارىزدى لابيرينتكە 14 ارا سالىپ, ەكسپەريمەنت جاسايدى. كىرە بەرىستە كوگىلدىر جانە سارى ءتۇستى گەومەتريالىق فيگۋرالار: كۆادرات, رومب, شەڭبەر جانە ءۇشبۇرىش بەينەلەنگەن سۋرەتتەر كورسەتىلەدى. كوك ءتۇس – قوسۋ, ال سارى ءتۇس – ازايتۋ دەگەندى بىلدىرەدى. ءلابيرينتتىڭ ىشىندە ارالارعا وڭعا نەمەسە سولعا جول اشاتىن ەكى سۋرەتتەن دۇرىس جاۋاپتى تاڭداۋ ۇسىنىلادى. ءلابيرينتتىڭ شەشىمىن تابۋعا تالپىنعان 100 ارەكەتتەن كەيىن ارالار كوك +1, ال سارى -1 دەگەندى بىلدىرەتىنىن تۇسىنگەن.

«ەكسپەريمەنت بارىسىندا ارالار اقپاراتتى وڭدەۋ بويىنشا مىندەتتەردى ورىنداپ قانا قويماي, اريفمەتيكالىق امالداردى دا ورىندادى»,  دەلىنگەن دوكتور سكارلەتت حوۆاردتىڭ باسشىلىعىمەن وتكىزىلگەن زەرتتەۋدە.

ول وتكەن جىلى ارالار ءنولدىڭ ماتەماتيكالىق ماعىناسىن تۇسىنەتىنىن دالەلدەدى. زەرتتەۋدە جاندىكتەرگە ءار ءتۇرلى سان بەينەلەنگەن ەكى كارتوچكا كورسەتىلەدى. ەگەر ارالار سانى از كارتاعا ۇشسا, وندا «سىيعا» ءتاتتى سۋ العان. ال سانى كوپ كارتاعا ۇشسا حينين قوسىلعان سۋ بەرگەن. جاندىكتەردىڭ 80%-ى ءبىرىنشى كارتوچكانى تاڭداعان.

عالىمدار الىنعان مالىمەتتەر جاساندى ينتەللەكتىڭ دامۋىنا ىقپال ەتەتىنىن, سونىمەن قاتار ادامزاتتان وزگە تىرشىلىك يەلەرىنىڭ ەسەپ پەن باسقا دا اريفمەتيكالىق امالداردى قالاي مەڭگەرگەنىن تۇسىندىرۋگە كومەكتەسەتىنىن اتاپ ءوتتى.

سالتانات شىءنادىل