جۇما, 5 قازان 2012 7:17
قازاق ەلىنەن, قازاق جەرىنەن باقىت تاپقان وزگە ۇلت وكىلدەرىنىڭ اراسىنان, اسىرەسە, جاس بۋىننىڭ مەملەكەتتىك ءتىلدى مەڭگەرۋگە دەگەن قۇلشىنىسى ارتىپ كەلەدى. بۇعان تاياۋدا اتىراۋدا «دوستىقتىڭ التىن كوپىرى» اتتى وزگە ۇلت وكىلدەرىنىڭ كوركەم ءسوز وقۋ سايىسىندا جانە ءبىر رەت كوزىمىز جەتە ءتۇستى. وسى سايىستىڭ اشىلۋ سالتاناتىندا اتىراۋ قالاسى اكىمىنىڭ ورىنباسارى ايجان قاراباەۆا «قازىرگى كەزدە كوركەم ءسوزدى مانەرلەپ وقۋعا وزگە ۇلت وكىلدەرىنىڭ دە ىنتاسى ارتا تۇسۋدە»,– دەدى.
جۇما, 5 قازان 2012 7:17
قازاق ەلىنەن, قازاق جەرىنەن باقىت تاپقان وزگە ۇلت وكىلدەرىنىڭ اراسىنان, اسىرەسە, جاس بۋىننىڭ مەملەكەتتىك ءتىلدى مەڭگەرۋگە دەگەن قۇلشىنىسى ارتىپ كەلەدى. بۇعان تاياۋدا اتىراۋدا «دوستىقتىڭ التىن كوپىرى» اتتى وزگە ۇلت وكىلدەرىنىڭ كوركەم ءسوز وقۋ سايىسىندا جانە ءبىر رەت كوزىمىز جەتە ءتۇستى. وسى سايىستىڭ اشىلۋ سالتاناتىندا اتىراۋ قالاسى اكىمىنىڭ ورىنباسارى ايجان قاراباەۆا «قازىرگى كەزدە كوركەم ءسوزدى مانەرلەپ وقۋعا وزگە ۇلت وكىلدەرىنىڭ دە ىنتاسى ارتا تۇسۋدە»,– دەدى.
ءوز تىلىنەن جەرىنگەندەي بولىپ جۇرگەن كەي قانداستارىمىزعا ۇلگى بولارلىق بۇل سايىسقا 8 ۇمىتكەر قاتىسۋعا تىلەك ءبىلدىرىپتى. ءبارى دە جوعارى جانە ارناۋلى ورتا وقۋ ورىندارىندا ءبىلىم الىپ جۇرگەندەر ەكەن. وزدەرىنىڭ انا تىلىمەن بىرگە مەملەكەتتىك ءتىلدى جەتىك مەڭگەرگەندەرىن قازاق پوەزياسىن مانەرلەپ وقۋ ارقىلى ناسيحاتتاۋدا بارىنشا تانىتا ءتۇستى. ولاردىڭ كوركەم ءسوزدى مانەرلەپ وقىعاندا قازاق ءتىلىنىڭ قۇنارىنان قانىپ ىشكەنى, جان-تانىمەن مەملەكەتتىك ءتىلدىڭ ءورىسىن كەڭەيتۋگە ۇمتىلعانى بايقالىپ-اق تۇرعان وڭ تالابىن قازىلار القاسى ورىندى باعالادى.
ناتيجەسىندە قازاق توپىراعىندا كىندىگى كەسىلگەنىن, قازاقشانى انا تىلىندەي مەڭگەرگەنىن ماقتانىش تۇتاتىن, ەندى قازاقستانداي وتانىنىڭ الەمدەگى وركەنيەتتى ەلدەر قاتارىنان ورىن الۋىنا ءوز ۇلەسىن قوسۋدى ماقسات ەتكەن تۇرىك قىزى جان مۋرادوۆانىڭ كوركەم ءسوزدى مانەرىنە كەلتىرە وقۋ شەبەرلىگى ءبىرىنشى ءجۇلدەگە لايىق دەپ تابىلدى. كورەي ۇلتىنىڭ ارۋى ۆەرونيكا ليدىڭ قازاق تىلىنە, قازاق پوەزياسىنا ەرەكشە اۋعان اڭسارى ەكىنشى جۇلدەمەن اتالىپ ءوتتى. ال ورىستىڭ تالاپتى بويجەتكەنى ولەسيا اۆدەەۆا بۇل جولى ءۇشىنشى جۇلدەنى يەلەندى. سونىمەن بىرگە, ۆلاديمير راديمينوۆيچكە قازاق ءتىلىن مەڭگەرۋگە تالپىنىسى ءۇشىن ارنايى ديپلوم بەرىلدى.
– وزگە ۇلت وكىلدەرى اراسىندا دا قازاق ءتىلىنىڭ ەڭ ادەمى, ورالىمدى قاناتتى ءسوزدەرىن قولدانىپ, ماقالداپ سويلەيتىندەرى از ەمەس. مىنە, سوندايلاردى كورگەندە توبەم كوككە جەتكەندەي, مارقايىپ تۇرامىن. ەلىمىزدىڭ ءار تۇكپىرىندەگى وزگە ۇلتتاردىڭ مۇنداي تالپىنىسى, تالابى مەملەكەتتىك ءتىلىمىزدىڭ مارتەبەسىن بيىك دەڭگەيگە جەتكەنىنىڭ دالەلى, – دەيدى عالىم, اقىن قادىر ءجۇسىپ. – مەملەكەتتىك ءتىلدى ءبىلۋ – ەلىمىزدەگى بىرلىكتى, دوستىقتى نىعايتۋعا دا سەرپىن بەرەدى.
جولداسبەك شوپەعۇل,
«ەگەمەن قازاقستان».
اتىراۋ وبلىسى.