مەملەكەت باسشىسى «بولاشاققا باعدار: رۋحاني جاڭعىرۋ» باعدارلامالىق ماقالاسىنداعى «تۋعان جەر» جوباسىندا ءاربىر ازاماتتى كىندىك قانى تامعان جەرىنە, وسكەن اۋىلىنا, قالا مەن وڭىرىنە قىزمەت ەتۋگە شاقىرعان بولاتىن. وسىناۋ ەلدىك دەڭگەيدەگى باستاماعا شىمكەنت قالاسىنداعى كاسىپكەرلەر دە ءوز ۇلەستەرىن قوسۋدا. ناتيجەسىندە ءۇشىنشى مەگاقالادا 84 جوبا جۇزەگە اسىرىلدى.
شىمقالانى شىرايلاندىرۋ ءۇشىن جاسالىنعان 32 جوبا «تۋعان جەر» ارنايى جوباسىنىڭ «اتامەكەن» كىشى باعدارلاماسى شەڭبەرىندە جۇزەگە اسىرىلعان. بۇل ماقساتتا دەمەۋشىلەر مەن مەتسەناتتار ەسەبىنەن 1,6 ملرد تەڭگە بولىنگەن. يگى باستامالاردىڭ باسىندا «وتاۋ گرۋپپ» جشس مەن «اتامەكەن» كورپوراتسياسى تۇر. اتالعان مەكەمە مەملەكەت-جەكەمەنشىك ارىپتەستىك اياسىندا قۇنى 280 ملن تەڭگەنى قۇرايتىن, 110 ورىندىق ينكليۋزيۆتى ءبىلىم بەرۋ ورتالىعىن سالىپ بەردى. ال «اتامەكەن» كورپوراتسياسى 547 ملن تەڭگەنى قۇرايتىن 320 ورىندىق بالاباقشا قۇرلىسىنا كومەك كورسەتكەن.
ەلباسىنىڭ باعدارلامالىق ماقالاسىنداعى «تاربيە جانە ءبىلىم» باعىتى بويىنشا شىمقالادا 138 ءىس-شارا ۇيىمداستىرىلىپ, قالاداعى 94 مەكتەپتە روبوت-تەحنيكاسى كابينەتى اشىلدى. 164 مۇعالىم ءتيىستى كۋرستا ءبىلىمىن جەتىلدىردى. سونىمەن قوسا «رۋحاني قازىنا» باعدارلاماسى بويىنشا شىمكەنتتەگى قاسيەتتى, كيەلى ورىندار مەن تۋريستىك ماڭىزى بار ەسكەرتكىشتەرگە, جالپى سانى 18 نىسانعا QR كودتار ورناتىلدى. «وتىرار» كىتاپحاناسىنان كوۆوركينگ ورتالىعى اشىلدى. «ادەبي ولكەتانۋ» جوباسى اياسىندا ءتۇرلى كونكۋرستار, كەزدەسۋلەر, ايتىستار, اشىق ساباقتار, كونفەرەنتسيالار مەن سەمينارلار وتكىزىلىپ, كىتاپتار باسىپ شىعارىلدى.
نۇرشات توكەن,
«Egemen Qazaqstan»
شىمكەنت