الماتى كوشەلەرىندەگى قابىرعالاردان, كوپىر جاقتاۋلارىنان, اۆتوتۇراقتاردان, جەراستى جولدارىنان اشىق ءارى قانىق ءتۇستى بوياۋلارمەن سالىنعان سۋرەتتەردى, تۇسىنىكسىز الاباجاق جازۋلاردى كەزدەستىرگەندە, ۇيرەنشىكتى جايتقا اينالعاندىقتان, كوپشىلىك ءمان دە بەرمەيدى.
كوڭىل قويىپ قاراعاننىڭ وزىندە مۇنىڭ كوشە بۇزاقىلارىنىڭ ءىسى الدە ءوز الدىنا جەكە ونەر ەكەنىن اجىراتا الماي قاپەلىمدە ءارى-ءسارى كۇي كەشىپ قالاتىنى بار. الماتى كوشەلەرىندە ماعىناسى مەن ساپاسى ءارتۇرلى مۇنداي سۋرەتتەر مەن جازۋلاردىڭ كوپتىگى سونداي, «ستريت-ارت» نەمەسە «گراففيتي» دەپ اتالاتىن بۇل كەسكىندەردىڭ مازمۇنى كۇننەن-كۇنگە جەتىلىپ, تاقىرىپ اياسى دا اۋقىمدى تارتىپ كەلەدى. ىلگەرىدە اكىمدىكتەگىلەر كورىكتى كوشەنىڭ سيقىن قاشىرعانداردى قۋالاپ, ايىپپۇل سالىپ, سۋرەتىن ءوشىرىپ الەك بولاتىن ەدى, قازىر كەرىسىنشە, عيماراتتاردىڭ قابىرعاسى ارنايى تاپسىرىسپەن ارلەنەدى. شىنىندا دا, اراسىندا كوز توقتاتىپ قاراۋعا تۇرارلىق سۋرەتتەر دە كەزدەسەدى. مۇنىمەن اينالىساتىندار كورمەگە, مۋزەيگە بارۋعا ۋاقىتى جوق ادامدارعا ونەر تۋىندىسىن كوشەدە دە تاماشالاۋعا بولاتىنىن دالەلدەپ, كورسەتكىسى كەلەتىندەي.
ءدال ورتالىقتاعى, ن.نازارباەۆ داڭعىلى مەن قۇرمانعازى كوشەلەرىنىڭ قيىلىسىنداعى ءۇيدىڭ تۇتاس ءبىر قابىرعاسىنا سالىنعان ەر ادامنىڭ «ستريت» بەينەسىنىڭ وشپەي تۇرعانىنا ءبىرتالاي جىلدىڭ ءجۇزى بولدى. و باستا قوعامعا, قانداي دا ءبىر الەۋمەتتىك تەڭسىزدىكتەرگە بايلانىستى قارسىلىق قۇرالى رەتىندە پايدا بولعان باتىس جاستارىنىڭ اۋەستىگى ونەر دارەجەسىنە دەيىن ءوسىپ, الماتى كوشەسىنىڭ كوركىنە اينالا باستاعانى, وسى جولى راس, تاڭىرقاتتى. «المانىڭ اتاسى» دەپ اتالاتىن بەلگىسىز ازاماتتىڭ ءدال وسى جەردەن الماتىلىقتارعا قاراپ تۇرۋىنا «ArbatFest»-ءتىڭ ناتيجەسى بويىنشا قالا اكىمدىگى زاڭدى تۇردە رۇقسات بەرىپ وتىر. ەندىگى جەردە ءتۇن قاراڭعىسىن جامىلىپ, قابىرعاعا بوياۋ شاشىپ شيمايلاۋدىڭ قاجەتى جوق, كوشەدە تۋعان ونەردىڭ كوشە قالتارىسىندا قالماي, دەربەس شىعارماشىلىققا دەيىن وسكەنىن دالەلدەيدى بۇل. سۋرەتتىڭ اۆتورلارى – رەسەي شەبەرلەرى. ەرەكشە ادىسپەن سالىنعان سۋرەت بالكىم, ادەمى بولار, بىراق ستريتشىلەر ونەرىن ءدال وسىلاي دامىتۋدى ماقسات تۇتار بولسا, وندا تۇرعىن ۇيلەردىڭ قابىرعاسىنا سۇرانىپ تۇرعان ءوزىمىزدىڭ دە تاۋ تۇلعالارىمىز بەن قازاقى ورنەكتەرىمىز جەتەرلىك-اۋ. ستريتشىلەر سۋرەتىن قىمباتقا باعالاپ سالعانىمەن, ول جەڭىل قابىلداناتىن ونەردىڭ ارزان ءتۇرى بولىپ ەسەپتەلەدى. ادام تانىمايتىن اتى جوق بەلگىسىزدەر قاپتاپ, الماتىنى ارزان سۋرەت باسىپ, الاباجاق قالاعا اينالماسا ەكەن دەگەن قاۋىپتەن تۋعان ءبىر وي – وسى.
ايگۇل احانبايقىزى,
«Egemen Qazaqstan
الماتى