گامبۋرگتە قازاقستان ەكونوميكاسى كۇنى ءوتتى

قازاقستاننىڭ گەرمانياداعى ەلشىسى بولات ءنۇسىپوۆ, BVDSI پرەزيدەنتى گانس ۆان حەلدورف, قر-دىڭ گامبۋرگتەگى قۇرمەتتى كونسۋلى يوحانن كيللينگەر, سونداي-اق گەرمانيانىڭ ورتا جانە شاعىن بيزنەس وكىلدەرى قاتىسقان ءىس-شارادا پوديۋمدىق تالقىلاۋ مەن قازاقستاننىڭ ەۋرازيا قۇرلىعىنداعى ينتەگراتسيالىق پروتسەستەر اياسىنداعى ەكونوميكالىق جانە لوگيستيكالىق حاب رەتىندەگى ماڭىزدىلىعى تۋرالى قىزۋ پىكىر الماسۋ ورىن الدى.

ودان باسقا, فورۋم بارىسىندا «ازيانىڭ قازىرگى زامانعى ساياسي-ەكونوميكالىق ءرولى», «قازاقستان رەسەي, ەۋرووداق جانە ازيا اراسىنداعى ەكونوميكالىق كوپىر رەتىندە», سونداي-اق «قازاقستاندىق جانە قىتايلىق قۇرىلىس مەگاجوبالارى» تاقىرىبىندا تسيۋريح قولدانبالى عىلىم ۋنيۆەرسيتەتىنىڭ پروفەسسورى كارل پيلنىي, SOLVECON INVEST كونسالتينگتىك كومپانياسىنىڭ باس ساراپشىسى فولكەر حەلمايەر جانە اتاقتى نەمىس ساۋلەتشىسى ۆولكۆين مارگ بايانداما جاسادى. «كتج ەكسپرەسس» ۇلتتىق كومپانياسىنىڭ وكىلى الەن دجانگوزين جينالعانداردى مىسال رەتىندە «بەلدەۋ جانە جول» باستاماسى اياسىندا جۇزەگە اسىرىلىپ جاتقان اينەك زاۋىتىنىڭ قۇرىلىسى جوباسىمەن تانىستىردى.

قازاقستان مەن جىبەك جولى بويىندا ورنالاسقان بارلىق مەملەكەتتەر اراسىنداعى ەكونوميكالىق, ينۆەستيتسيالىق, كولىك-ترانزيتتىك جانە لوگيستيكالىق ىنتىماقتاستىقتى ارتتىرۋ كەلەشەگى, سونداي-اق ەلىمىزدىڭ ەۋرووداقپەن ءوزارا قارىم-قاتىناسىن ودان ارى نىعايتۋ تالقىلاۋدىڭ ارقاۋى بولدى.

گامبۋرگتەگى فورۋم اياسىندا  ب.ءنۇسىپوۆتىڭ ەۋروپاداعى اسا ءىرى مىس ءوندىرۋشى «Aurubis AG» كومپانياسىنىڭ باسقارما توراعاسى يۋرگەن شاحلەرمەن جانە ۆيتسە-پرەزيدەنتى كريستوف كونيگپەن, «BUSS Group» لوگيستيكالىق كومپانيا باسشىلىعى, «Deutsche Bahn» ءىرى تەمىرجول وپەراتورى, سونداي-اق گەرمانيانىڭ شاعىن جانە ورتا بيزنەس وكىلدەرىمەن ەكىجاقتى كەزدەسۋلەرى ءوتتى. كەزدەسۋلەر قورىتىندىسى بويىنشا تاراپتاردىڭ ناقتى جوبالارعا وڭتايلى تۇردە جەتەلەيتىن ينۆەستيتسيالىق جانە كولىكتىك-لوگيستيكالىق ىنتىماقتاستىقتى جانداندىرۋعا قاتىستى ءوزارا ۇمتىلىسى راستالدى.