كونفەرەنتسياعا رەسەي, گەرمانيا, قىرعىزستاننان بەلگىلى عالىمدار, پارلامەنت دەپۋتاتتارى, مەملەكەتتىك جانە قۇقىق قورعاۋ, ۇكىمەتتىك ەمەس ۇيىمداردىڭ وكىلدەرى قاتىستى.
بۇل كونفەرەنتسيا قر عىلىمى مەن تەحنيكاسىنا ەڭبەگى سىڭگەن قايراتكەر, زاڭ عىلىمدارىنىڭ دوكتورى, پروفەسسور ەلەگەن ىزتىلەۋ ۇلى قايىرجانوۆتى ەسكە الۋعا دا ارنالدى. كونفەرەنتسيا مودەراتورى پارلامەنت ءماجىلىسىنىڭ دەپۋتاتى نۇرلان ءابدىروۆ جانە باسقالار مارقۇم ەلەگەن ىزتىلەۋ ۇلىنىڭ ەڭبەگى مەن ۇستازدىق جولى تۋرالى ەسكە الدى.
حالىقارالىق ماماندار مەن عالىمداردىڭ باسىن قوسقان كونفەرەنتسيا «قازاقستان-2050» ستراتەگياسىنىڭ كونتەكسىندەگى قىلمىستىق ساياسات پەن زاڭدىلىق دەڭگەيىن ارتتىرۋدى, قۇقىقتىق ءتارتىپ پەن قىلمىستىق قاۋىپسىزدىكتى جۇزەگە اسىرۋ اياسىنداعى قۇقىقتىق – سوت رەفورماسىن, 2010 – 2020 جىلدار ارالىعىنداعى قازاقستان رەسپۋبليكاسىنىڭ قۇقىقتىق ساياسات كونتسەپتسياسىن, 2017 – 2020 جىلدارعا ارنالعان قۇقىق قورعاۋ ورگاندارىن ودان ءارى جەتىلدىرۋ جونىندەگى مەملەكەتتىك باعدارلامانى, «100 قادام» ۇلتتىق جوسپارىن, ەكونوميكالىق بىرلەستىك پەن دامۋ ۇيىمىنىڭ (ەبدۇ) ستاندارتتارى مەن ينديكاتورلارى دەڭگەيىندە زاڭنىڭ ۇستەمدىك ەتۋى جونىندەگى پرەزيدەنت باعدارلامالارىن ادىسنامالىق جانە تۇعىرنامالىق جاعىنان مودەرنيزاتسيالاۋدى قامتاماسىز ەتۋگە ىقپال جاساۋدى ءوز جۇمىسىنىڭ ماقساتىنا اينالدىردى. ويتكەنى قازىر قىلمىس ساياساتىن ىزگىلەندىرۋمەن بىرگە بار مۇمكىندىگىنشە قىلمىستىڭ الدىن الۋ نەگىزگى باعدار بولىپ تابىلادى. كونفەرەنتسياعا قاتىسقان قر پارلامەنتى ءماجىلىسىنىڭ دەپۋتاتى, ونداعى زاڭناما جانە سوت-قۇقىقتىق رەفورما كوميتەتىنىڭ مۇشەسى اسىلبەك سماعۇلوۆ تا قوعامداعى قىلمىستىڭ الدىن الۋ عانا بۇل سالادا تۇپكى ناتيجە بەرەتىندىگىن ايتتى.
«ەلباسى تاپسىرماسى دا قىلمىستىڭ الدىن الۋعا سايادى. ول ءۇشىن نە ىستەۋ كەرەك؟ ەڭ الدىمەن پروفيلاكتيكالىق جۇمىستارمەن اينالىسۋ كەرەك. ونىڭ جولدارى دا, جۇمىسى دا كوپ. قىلمىسقا الىپ كەلەتىن جانە قىلمىستى بولدىرماۋدىڭ جولدارىن ىزدەستىرۋىمىز قاجەت. بۇل كۇردەلى دە كوپ جۇمىس, ونىڭ تارماعى وتە كوپ. بۇل تەك پوليتسەيلەردىڭ, زاڭگەرلدەرىڭ عانا ەمەس, بۇكىل قوعامنىڭ قىزمەتى بولۋى ءتيىس, وسى جۇمىسقا عالىمدار مەن ماماندار بارلىق قوعامدى جۇمىلدىرا ءبىلۋى ءتيىس. ءبىز سونىڭ مەحانيزمىن تاپساق, قوعامدا قىلمىس ازايادى» دەدى اسىلبەك ايجارىق ۇلى.
كونفەرەنتسيادا سويلەگەن عالىمدار, كريمينولوگتار قىلمىس ساياساتىن ىزگىلەندىرۋ مەن قىلمىستىڭ الدىن الۋ ءۇشىن وزدەرىندەگى ۇزدىك تاجىريبەلەردى, پىكىرلەرىن, جاقسى جاڭالىقتاردى ورتاعا سالدى.
ءنازيرا جارىمبەت,
«Egemen Qazaqstan»
قوستاناي