شىمكەنت قالالىق مەملەكەتتىك كىرىستەر دەپارتامەنتى تاراتقان مالىمەت بويىنشا قالادا شاعىن جانە ورتا كاسىپكەرلىكپەن شۇعىلداناتىن كاسىپكەرلەردىڭ مەملەكەتكە بەرەر 300 ميلليون تەڭگە بەرەشەگى بار. بيۋدجەتكە قارىزى بارلاردىڭ باسىم بولىگى ازىق-ت ۇلىك, كيىم جانە قۇرىلىس ماتەريالدارىن ساتۋمەن اينالىسادى.
«كاسىپكەرلەر سالىق ەسەپتىلىگىن تولتىرۋدى مەڭگەرمەۋى سالدارىنان قارىز بولىپ وتىر. كەيبىرەۋلەرى قۇجاتتاردى دەر كەزىندە تاپسىرۋدان كەشىككەن. مەملەكەتتىك كىرىستەر دەپارتامەنتى تاراپىنان ولاردىڭ قۇجات دايىنداۋىنا كومەكتەسەتىن ماماندار بار», دەيدى اتالعان دەپارتامەنتتىڭ باس مامانى باۋىرجان ومارتاەۆ.
الايدا ءىشنارا كاسىپكەرلەر ءوز شىعىندارىنىڭ ۇلەسى كوپ ەكەندىگىن ايتىپ, سالىق تولەمدەرىنىڭ قارجىسىن ازايتۋدى العا تارتادى. كوتەرمە جانە بولشەك ساۋدا دۇكەندەرىن اشقاندارى جالعا العان ورىننان تىس تابىستىڭ تاعى ءبىر بولشەگىن سالىققا بەرۋگە ىنتالى ەمەس.
ال, جەر قويناۋىن پايدالانۋشى كاسىپكەرلەر ءوز سالالارىنا بايلانىستى سالىقتىڭ زاڭنامالىق بولىگىن قايتا قاراۋدى جانە تاريفتەردى تومەندەتۋدى سۇرايدى. قاتاڭ تيىمدار زاڭسىز جۇمىسشىلار سانىنىڭ ارتۋىنا الىپ كەلەدى. جەر قويناۋىن پايدالانۋشىلاردىڭ اراسىندا ادال ەڭبەك ەتىپ جۇرگەندەردى بۇل بانكروتتىققا ۇشىراتادى دەپ ەسەپتەيدى.
شىمكەنتتىك كاسىپكەر ابۋتاليپ ەرىمبەتوۆتىڭ پىكىرىنشە جەر قويناۋىن پايدالانۋشىلار ءۇشىن جاڭا سالىق ستاۆكاسى بويىنشا 96 تەڭگە الىنادى ەكەن. ماسەلەن قيىرشىق قۇمنىڭ قۇنى 300 تەڭگە بولسا, 33 پايىز سالىقتىڭ تەك ءبىر تۇرىنە جۇمسالادى, ال, كىرىس, الەۋمەتتىك جانە تاعى دا باسقا سالىقتاردى قوسقاندا بۇل تولەم قالتاعا سالماق سالادى دەيدى.
نۇرشات توكەن,
«Egemen Qazaqstan»
شىمكەنت