ەڭبەك جانە حالىقتى الەۋمەتتىك قورعاۋ ءمينيسترى ءمادينا ابىلقاسىموۆا ورتتەن قازا تاپقان 5 بالانىڭ اتا-اناسىنا بارىپ, كوڭىل ايتتى. بۇل تۋرالى بۇگىن ۇكىمەت وتىرىسىنان كەيىن ەڭبەك جانە حالىقتى الەۋمەتتىك قورعاۋ ۆيتسە-ءمينيسترى سۆەتلانا جاقىپوۆا ايتتى.
ء«بىز, مينيسترلىك وكىلدەرى قارا جامىلعان وتباسىنا بارىپ, كوڭىل ايتتىق. كەشە باردىق. ءمينيستردىڭ (ەڭبەك جانە حالىقتى الەۋمەتتىك قورعاۋ ءمينيسترى ابىلقاسىموۆا) ءوزى دە باردى», - دەدى سۆەتلانا جاقىپوۆا.
ايتا كەتۋ كەرەك, بۇگىنگى ۇكىمەت وتىرىسىنا مينيستر قاتىسقان جوق. ونىڭ ورنىنا پرەمەر-ءمينيستردىڭ الدىندا ۆيتسە-مينيستر سۆەتلانا جاقىپوۆا ەسەپ بەرگەن ەدى. ۆيتسە-ءمينيستردىڭ سوزىنە قاراعاندا, مينيستر م.ابىلقاسىموۆا وتكەن اپتادان بەرى سىرقاتتانۋىنا بايلانىستى ەم الىپ جاتىر.