تەننيسشىلەردىڭ بيىلعى جاڭا فورماتتاعى دەۆيس كۋبوگىنىڭ فينالدىق سايىستارى 18-24 قاراشا ارالىعىندا يسپانيا استاناسى مادريدتە وتەتىنى بەلگىلى.
قازىرگى كەزدە وسى جارىسقا جولداما العان بارلىق 18 كوماندا بەلگىلى. قازاقستان قۇراماسى ەكىنشى سەبەتكە تۇسكەن ەكەن. بۇل توپتا بىزدەن بولەك, يسپانيا, سەربيا, اۆستراليا, يتاليا جانە گەرمانيا قۇرامالارى بار. ءبىرىنشى سەبەتتى فرانتسيا,حورۆاتيا, ارگەنتينا, بەلگيا, ۇلىبريتانيا جانە اقش كوماندالارى قۇراپ وتىر. ال جاپونيا, كانادا, كولۋمبيا, گوللانديا, رەسەي جانە چيلي تەننيسشىلەرى ءۇشىنشى سەبەتتە.
ەستەرىڭىزگە سالا كەتەيىك, جاڭا ەرەجەگە ساي بۇل كوماندالار ءۇش-ۇشتەن التى توپقا ءبولىنىپ, ءوزارا كۇش سىناسادى. ءار توپتىڭ جەڭىمپازدارى مەن ەڭ جاقسى ناتيجە كورسەتكەن تاعى ەكى مەملەكەتتىڭ ورەندەرى شيرەك فينالعا جولداما الادى. ولار ەكى جەكەلەگەن جانە ءبىر جۇپتىق سايىستا مىقتىنى انىقتايتىن بولادى. ودان كەيىن - جارتىلاي فينال جانە اقتىق سىن.
عالىم سۇلەيمەن,
«Egemen Qazaqstan»