بۇگىن ۇكىمەت وتىرىسىندا ەڭبەك جانە حالىقتى الەۋمەتتىك قورعاۋ ۆيتسە-ءمينيسترى سۆەتلانا جاقىپوۆا الەۋمەتتىك تولەمدەردىڭ پارامەترلەرىن قايتا قاراۋ بويىنشا جۇمىس جۇرگىزىلىپ جاتقانىن جەتكىزدى.
«قازىرگى تاڭدا الەۋمەتتىك ساقتاندىرۋ جۇيەسىندە الەۋمەتتىك قاتەردىڭ ءۇش ءتۇرى بويىنشا پارامەترلەردى قايتا قاراۋ ۇسىنىلادى. ولار: ەڭبەك ەتۋ قابىلەتىن جوعالتۋ, اسىراۋشىسىنان جانە جۇمىسىنان ايىرىلۋ جاعدايلارىنا تولەنەتىن الەۋمەتتىك تولەمدەر. الەۋمەتتىك تولەمدەردىڭ مولشەرى مىندەتتى الەۋمەتتىك ساقتاندىرۋ جۇيەسىنە قاتىسۋ وتىلىنە بايلانىستى بەلگىلەنەدى», دەدى س.جاقىپوۆا.
ۆيتسە-ءمينيستردىڭ سوزىنە سۇيەنسەك, مۇنداي قادام الەۋمەتتىك قاتەر تۋىنداعان كەزدە ازاماتتاردىڭ الەۋمەتتىك ساقتاندىرۋ دەڭگەيىن ارتتىرۋعا مۇمكىندىك بەرەدى, سونداي-اق ازاماتتاردىڭ مىندەتتى الەۋمەتتىك ساقتاندىرۋ جۇيەسىنە قاتىسۋعا ىنتالاندىرۋدى, ەڭبەك قاتىناستارىن فورماليزاتسيالاۋدى قامتاماسىز ەتەدى. سونىمەن قاتار س.جاقىپوۆا مۇمكىندىگى شەكتەۋلى ادامداردىڭ ءومىر ءسۇرۋ ساپاسىن جاقسارتۋ جانە قۇقىقتارىن قامتاماسىز ەتۋ جونىندەگى 2025 جىلعا دەيىنگى ۇلتتىق جوسپاردى ازىرلەۋ بارىسىمەن تانىستىردى.
«ۇلتتىق جوسپار مۇگەدەكتىگى بار ادامداردى قوعامعا تولىق ينتەگراتسيالاۋ ءۇشىن جاعدايلار جاساۋعا ارنالعان كەشەندى جانە ۆەدومستۆوارالىق ءتاسىلدى قامتاماسىز ەتۋگە ءتيىس. مۇگەدەكتىگى بار ادامداردىڭ ءومىر ءسۇرۋ ساپاسىن جاقسارتۋ جانە قۇقىعىن قامتاماسىز ەتۋ بويىنشا جەتى باسىم باعىت بەلگىلەندى», دەدى ۆيتسە-مينيستر. اتالعان ۇلتتىق جوسپار جوباسى 2019 جىلعى مامىر ايىندا ەنگىزىلەدى.