ەلباسىنىڭ تاپسىرماسى بويىنشا ەگىستىك جەرلەردى ءارتاراپتاندىرۋ جالعاسۋدا. اۋىل شارۋاشىلىعى مينيسترى ومىرزاق شوكەەۆ ەگىستىك جەرلەرگە بايلانىستى دامىتۋ جوسپارىمەن ءبولىستى.
الدىن الا دەرەكتەر بويىنشا 2019 جىلى اۋىل شارۋاشىلىعى داقىلدارىن 22,3 ملن گەكتارعا ەگۋ جوسپارلانىپ وتىر, بۇل 2018 جىلمەن سالىستىرعاندا 290,7 مىڭ گەكتارعا كوپ. بۇل رەتتە, سۇرانىسقا يە مىناداي داقىلدار الاڭى: 1) ارپا مەن استىققا ارنالعان جۇگەرى – 57,2 مىڭ گەكتارعا; 2) قانت قىزىلشاسى – 2,6 مىڭ گەكتارعا; 3) ازىقتىق داقىلدار – 654,1 مىڭ گەكتارعا; 4) كارتوپ – 14,2 مىڭ گەكتارعا; 5) كوكونىس-باقشا داقىلدارى – 8,0 مىڭ گەكتارعا ۇلعايتىلادى.
«مەملەكەتتىك باعدارلاما اياسىندا 2021 جىلعا دەيىن 610 مىڭ گەكتار سۋارمالى جەردى اينالىمعا ەنگىزۋ كوزدەلىپ وتىر. وتكەن جىلى 65 مىڭ گەكتار جەر پايدالانۋعا ەنگىزىلسە, بيىل 124 مىڭ گەكتار جەردى اينالىمعا تارتۋ قاجەت» دەيدى اۋىل شارۋاشىلىعى ءمينيسترى.
ءمينيستردىڭ ايتۋىنشا, ازىرلەنگەن سالالىق باعدارلاما 1,5 ملن گەكتار سۋارمالى جەردى جاڭادان اينالىمعا ەنگىزۋگە مۇمكىندىك بەرەدى. وسى مىندەتتى شەشۋ ءۇشىن مەملەكەتتىك-جەكەشەلىك ارىپتەستىك سحەماسى بويىنشا قارجىلاندىرۋعا كوشۋ كەرەك. ينۆەستيتسيالاردىڭ قايتارىلۋىن قامتاماسىز ەتۋ ماقساتىندا ەكونوميكالىق نەگىزدەلگەن تاريفتىك ساياسات ەنگىزىلەتىن بولادى. بۇل تاسىلدەمە بيزنەس وكىلدەرىمەن پىسىقتالدى.
«وتىرار بيو تەح» كومپانياسى تۇركىستان وبلىسىندا جالپى الاڭى 60 مىڭ گەكتار سۋارمالى جەردى يگەرۋ ءۇشىن ينۆەستيتسيا سالۋعا دايىن. قازاقستانداعى CITIC CONSTRUCTION CO., LTD فيليالى پاۆلودار وبلىسىندا جاڭا 10 مىڭ گەكتار سۋارمالى جەردى پايدالانۋعا ەنگىزۋگە كىرىسپەك. بۇل جوباعا كومپانيا ءوز ينۆەستيتسياسىن تارتادى. الىنعان ءونىمدى وتكىزەتىن جەرى دە دايىن. جالپى, سالاعا الداعى 9-10 جىلدا 1,23 ترلن تەڭگە تارتىلىپ, سۋارمالى جەرلەر 3,5 ملن گەكتارعا جەتكىزىلەدى, ال وسى جەرلەردەن الىنعان ءونىم كولەمى 3,7 ترلن تەڭگەنى قۇرايتىن بولادى» دەيدى مينيستر ءو. شوكەەۆ.