ب.ساعىنتاەۆ ءورت قاۋىپسىزدىگىن قايتا تەكسەرۋگە تاپسىرما بەردى

«الداعى تاۋلىكتەردە بىرقاتار وڭىردە كۇن سۋىتادى دەپ كۇتىلۋدە. سول سەبەپتى اكىمدىكتەردىڭ, ءورت ءسوندىرۋ جانە توتەنشە جاعدايلار قىزمەتتەرىنىڭ نازارىن ءورت قاۋپى ماسەلەسىنە اۋدارامىن. جىلۋ بەرۋ جۇيەلەرىندە جىلۋ تەمپەراتۋراسى ارتادى. جەكە ۇيلەردە پەش جاعۋ كۇشەيەدى. سوندىقتان قاۋىپسىزدىك تەحنيكاسىنىڭ ساقتالۋىنا ەرەكشە ءمان بەرىڭىزدەر. ءىىم جەرگىلىكتى اتقارۋشى ورگاندارمەن بىرلەسىپ, جىلۋ بەرۋ ماۋسىمى اياقتالعانشا ءورت قاۋىپسىزدىگى ايلىعىن قايتا باستاسىن. قالمۇحانبەت نۇرماحانبەت ۇلى, بۇل ماسەلە ءسىزدىڭ جەكە باقىلاۋىڭىزعا»,  دەدى باقىتجان ساعىنتاەۆ ىشكى ىستەر ءمينيسترى قاسىموۆقا.

سونداي-اق ۇكىمەت باسشىسى جىلۋ مەن ەنەرگيا بەرەتىن بارلىق ۇيىمدار, اكىمدىكتەردىڭ تۇرعىن ءۇي-كوممۋنالدىق قىزمەتتەرى تۇتىنۋشىلاردى جەتكىلىكتى دەڭگەيدە جىلۋمەن جانە جارىقپەن قامتاماسىز ەتسىن دەگەن تاپسىرما بەردى. «بارلىق قىزمەتتەر ىركىلىسسىز جانە اپاتسىز جۇمىس ىستەۋى قاجەت. اكىمدىكتەردىڭ ەرەكشە باقىلاۋىنا الىنسىن»,  دەدى باقىتجان ساعىنتاەۆ.  پرەمەر-مينيستر ءورت قاۋىپسىزدىگىن تەكسەرۋشىلەردىڭ نەگىزسىز قىلىقتارىن الەۋمەتتىك جەلىدە سىنعا الۋ كۇشەيىپ تۇرعانىنا دا توقتالدى. «الەۋمەتتىك جەلىلەردە ايتىلىپ جاتىر, تەكسەرۋشىلەر جەكە ۇيلەرگە ءورت قاۋىپسىزدىگىن تەكسەرۋگە كەلگەن كەزدە ۇيگە كىرەدى ەكەن دە: «ەشتەڭە تەكسەرمەي-اق قويايىن, اقشا بەرسەڭ كەتە بەرەمىز» دەيدى ەكەن. ماسەلەنىڭ بارلىعى سودان باستالىپ وتىر. وسىعان باسا كوڭىل اۋدارىڭىزدار. قاتاڭ تالاپ بولۋى كەرەك. سوندا عانا كەشەگىدەي بولعان قايعىلى جاعدايعا جول بەرمەيمىز», - دەدى ول. سونىمەن قاتار باقىتجان ساعىنتاەۆ ورتتەن قازا تاپقان 5 بالانىڭ اتا-اناسىنا كوڭىل ايتتى.

ەسكە سالا كەتەيىك, 4 اقپان كۇنى تۇندە استاناداعى «كوكتال-1» مولتەك اۋدانىندا جەكە ءۇيدىڭ اۋلاسىندا تۇرعىزىلعان ۋاقىتشا باسپانادا ءورت شىقتى. ءورتتى ءسوندىرۋ بارىسىندا 13 جاسار, 11 جاسار, 5 جاسار, 3 جاسار جانە 3 ايلىق - 5 قىز بالانىڭ دەنەسى تابىلدى. وقيعا ورىن العان ۋاقىتتا بالالاردىڭ  اتا-اناسى تۇنگى جۇمىستا بولعان.