بۇگىن قازاقستان رەسپۋبليكاسى ۇكىمەتىنىڭ وتىرىسىندا پرەمەر-مينيستر باقىتجان ساعىنتاەۆ كۇن ءتارتىبىنىڭ ماسەلەلەرىن قاراستىرار الدىندا ءورت كەزىندە قازا تاپقان بەس بالانىڭ اتا-اناسى مەن تۋعان-تۋىستارىنىڭ قايعى-قاسىرەتىنە ورتاقتاسىپ, كوڭىل ايتتى.
جان تۇرشىگەرلىك جاعداي استانادا 4 اقپان كۇنى ورىن الدى.
ء«بىر وتباسىنىڭ باسىنا تۇسكەن اۋىر قايعى. اي-كۇننىڭ امانىندا بەس بىردەي بالاسىنان ايىرىلىپ قالعان اتا-اناسىنا قۇداي كۇش-قۋات بەرسىن. مارقۇم بولعان بالالاردىڭ اتا-اناسىنا, تۋعان-تۋىستارىنا, بارشا اعايىندارىنا قايعىرىپ, كوڭىل ايتامىز», — دەدى ب. ساعىنتاەۆ.
استانا قالاسىنىڭ اكىمى ب. سۇلتانوۆتىڭ جانە قر ىشكى ىستەر ءمينيسترى ق. قاسىموۆتىڭ اتالعان وتباسىعا قولداۋ كورسەتۋ بويىنشا اتقارىلىپ جاتقان جۇمىستار مەن الداعى ۋاقىتتا وسىنداي جاعدايلاردىڭ ورىن الماۋى ءۇشىن قابىلدانىپ جاتقان شارالار تۋرالى باياندامالارى تىڭدالدى.
قر پرەمەر-ءمينيسترى ب. ساعىنتاەۆ الداعى تاۋلىكتەردە بىرقاتار وڭىرلەردە كۇننىڭ قاتتى سۋىتاتىنىنا وراي, اكىمدىكتەردىڭ, ءورت ءسوندىرۋ جانە توتەنشە جاعدايلار قىزمەتتەرىنىڭ نازارىن ءورت قاۋىپسىزدىگى ماسەلەسىنە اۋداردى. ويتكەنى, جىلۋ جەلىلەرىندە جىلۋ بەرۋ تەمپەراتۋراسى ارتادى, جەكە ۇيلەردە پەش جاعۋ دا كۇشەيە تۇسەدى. سوندىقتان, قاۋىپسىزدىك تەحنيكاسىنىڭ ساقتالۋىنا ەرەكشە نازار اۋدارۋ تاپسىرىلدى.
قر ىشكى ىستەر مينيسترلىگىنە جەرگىلىكتى اتقارۋشى ورگاندارمەن بىرلەسىپ, جىلۋ بەرۋ ماۋسىمى اياقتالعانشا ءورت قاۋىپسىزدىگى ايلىعىن قايتا باستاۋ تاپسىرىلدى. جىلۋ مەن ەنەرگيا بەرەتىن بارلىق ۇيىمدار, اكىمدىكتەردىڭ تۇرعىن-ءۇي كوممۋنالدىق قىزمەتتەرى تۇتىنۋشىلاردى جەتكىلىكتى دەڭگەيدە جىلۋمەن جانە جارىقپەن قامتاماسىز ەتۋى ءتيىس. بارلىق قىزمەتتەر ىركىلىسسىز جانە اپاتسىز جۇمىس ىستەۋى قاجەت. بۇل ماسەلەنى اكىمدىكتەرگە ەرەكشە باقىلاۋعا الۋ تاپسىرىلدى.
سونىمەن قاتار, وبلىس اكىمدىكتەرى مەن قر ءىىم-گە قايعىلى وقيعالاردىڭ الدىن الۋ ماقساتىندا جەكە ۇيلەردەگى ءورت قاۋىپسىزدىگىنە جۇرگىزىلەتىن تەكسەرىستەر ساپاسىنا ەرەكشە كوڭىل ءبولۋ تاپسىرىلدى. قاتاڭ تالاپ بولۋى ءتيىس.