بۇگىن ۇكىمەت وتىرىسىندا قارجى ءمينيسترى ءاليحان سمايىلوۆ 2019 جىلعى 30 قاڭتاردا ۇكىمەتتىڭ كەڭەيتىلگەن وتىرىسىندا مەملەكەت باسشىسىنىڭ بەرگەن تاپسىرمالارىن ىسكە اسىرۋ بويىنشا قارجى مينيسترلىگى قابىلداعان شارالار تۋرالى باياندادى.
«ەڭ الدىمەن, ۇكىمەتتىڭ كەڭەيتىلگەن وتىرىسىندا مەملەكەت باسشىسى ەلدەگى ەكونوميكانى دامىتۋ ماسەلەسىنە جانە جوسپارلى وبەكتىلەردى جەكەشەلەندىرۋ ىسىنە نازار اۋداردى. بۇل تاپسىرما ازىرگە حاتتامالىق تاپسىرماعا ەنگەن جوق. قازىرگى ۋاقىتتا 470 ملرد تەڭگە سوماسىنا 473 وبەكت (898 نىساننىڭ ىشىندە) ىسكە اسىرىلدى. سونداي-اق 280 نىسان قايتا قۇرۋعا جانە جويۋعا جىبەرىلدى. كەشەندى جوسپاردىڭ ورىندالۋى 84% قۇرايدى» دەدى قارجى ءمينيسترى.
ونىڭ ايتۋىنشا, اعىمداعى جىلى كەشەندى جوسپار بويىنشا رەسپۋبليكالىق, كوممۋنالدىق مەنشىك پەن كۆازيمەملەكەتتىك سەكتوردىڭ 123 وبەكتىسىن ىسكە اسىرۋ مىندەتى تۇر. مەملەكەتتىك م ۇلىك ءتىزىلىمىنىڭ ۆەب-پورتالىندا جەكەشەلەندىرۋ جونىندەگى جول كارتالارىنا ءتيىستى تۇزەتۋلەر ەنگىزۋ, جەكەشەلەندىرۋ وبەكتىلەرىن ساتۋ الدىنداعى دايىندىق پەن باعالاۋدى جانداندىرۋ, نىسانداردى ساۋدا-ساتتىققا جەدەل تارتىپپەن شىعارۋ جۇمىستارىن قولعا الۋ كەرەك.
«جەكە تۇلعالار ءۇشىن سالىقتىق راقىمشىلىق بويىنشا قازاقستان رەسپۋبليكاسى پرەزيدەنتىنىڭ وسى تاپسىرماسىن ورىنداۋ كەشەندى جانە ۆەدومستۆوارالىق سيپاتقا يە ەكەنىن ەسكەرە وتىرىپ, مينيسترلىك جەكە تۇلعالار ءۇشىن سالىقتىق راقىمشىلىق جۇرگىزۋ جونىندەگى جول كارتاسىن ازىرلەدى» دەدى مينيستر.
ونىڭ ايتۋىنشا, جول كارتاسى جەكە تۇلعالاردىڭ ولشەمدەرىن جانە سالىقتىق راقىمشىلىق جاساۋ جۇرگىزىلەتىن بەرەشەك سومالارىن ازىرلەۋگە, زاڭناماعا تۇزەتۋلەر ازىرلەۋگە, سونداي-اق سالىقتىق راقىمشىلىق جۇرگىزۋ جونىندەگى ءىس-شارالارعا باعىتتالعان بىرقاتار ءىس-شارالاردى قاراستىرادى. وسى ماسەلەگە بايلانىستى 2019 جىلعى ناۋرىزدا پارلامەنتكە تۇزەتۋلەر ەنگىزۋ جوسپارلانعان. بۇل تۋرالى زاڭ ماۋسىم ايىندا قابىلدانىپ, سالىقتىق راقىمشىلىق جۇرگىزۋ جۇمىستارى جىل سوڭىنا دەيىن جالعاسادى.