جۋىردا عانا فۋتبولدان قازاقستان ۇلتتىق قۇراماسىنىڭ باس باپكەرلىگىنە تاعايىندالعان چەحيالىق مامان ميحال بيلەك العاشقى ءباسپاسوز ءماسليحاتىن وتكىزىپ, جۋرناليستەردىڭ سۇراقتارىنا جاۋاپ بەردى.
– مەن قازاقستان قۇراماسىنىڭ باس باپكەرى بولعانىما قۋانىشتىمىن. جىگىتتەردىڭ قارقىنىن, ويىنعا دەگەن دايىندىعىن بايقاۋ ءۇشىن ءبىر اپتالىق وقۋ-جاتتىعۋ جيىنىن وتكىزەمىز. ەرتەڭ تۇركياعا ۇشىپ, بارلىق باپكەرلەرمەن سويلەسەمىن. ولار ۇلتتىق قۇرامانىڭ ويىن ءستيلىن ايتىپ, ورتاق جۇمىس بارىسىندا ماعان كومەكتەسكەنىن قالايمىن.
– قازاقستان ۇلتتىق قۇراماسىن جاتتىقتىرۋ ءۇشىن قانشا ۋاقىت ويلاندىڭىز؟
– مەن شەشىمدى تەز قابىلدادىم. شامامەن ءۇش اپتانىڭ ىشىندە كەلىسسوز جۇرگىزىپ, ءوز كەلىسىمىمدى بەردىم. دەگەنمەن, شەشىم قابىلداۋ وڭاي بولعان جوق, ويتكەنى سول ۋاقىتتا چەحيالىق كوماندامەن كەلىسىمشارتىم بولعان ەدى. بىراق كوماندا مەنى ءتۇسىنىپ, قازاقستان قۇراماسىمەن جۇمىس ىستەۋىمە قارسىلىق بىلدىرگەن جوق.
– ۇلتتىق قۇرامانىڭ كەڭەيتىلگەن ءتىزىمى قالاي تاڭدالدى؟
– مەن ءالى فۋتبولشىلار تۋرالى تولىق مالىمەتكە يە ەمەسپىن. سوندىقتان ماعان ءالى اقپارات جيناۋ كەرەك. بۇل ءتىزىمدى كومەكشىلەرىم جاساقتاپ بەردى. مەن ولاردى ىرىكتەپ الامىن.
– ۇلتتىق قۇرامامەن كەلىسىمشارتىڭىز قانشا جىلعا جوسپارلانعان. قازاقستانعا كەلگەنگە دەيىن قانداي اقپارات ءبىلدىڭىز؟
– كەلىسىمشارت ءبىر جىلعا جوسپارلانعان. «استانانىڭ» ەۋروپا ليگاسىنداعى «سلاۆياعا» قارسى وتكەن ويىنى ەسىمدە قالىپتى. سونىمەن قاتار قازاقستاننىڭ بۇرىنعى باس باپكەرى ميروسلاۆ بەرانەكپەن دە سويلەستىم.
– كەڭەيتىلگەن قۇرامعا قورعاۋشى ەۆگەني پوستنيكوۆ پەن جارتىلاي قورعاۋشى باقتيەر زاينۋتدينوۆ نەگە ىلىنبەي قالدى؟
– سەبەبى پوستنيكوۆتىڭ جاراقاتى بار. زاينۋتدينوۆتى دا قۇراماعا شاقىرعىمىز كەلگەن. بىراق «روستوۆ» كومانداسىنىڭ رەسەي كۋبوگىندا ويىنى بار بولعاندىقتان جانە 21 اقپان فيفا كۇنتىزبەسىنە ەنبەگەن سوڭ كلۋب باپكەرى ۆالەري كارپين باقتيەردى جىبەرمەدى.
– بيلەك مىرزا, ەگەر قازاقستان قۇراماسى ەۋرو-2020 تۋرنيرىندە ءساتسىز ونەر كورسەتسە, قىزمەتىڭىزدەن كەتۋىڭىز مۇمكىن عوي. بۇدان قورىقپايسىز با؟
– ەشتەڭەدەن قورىقپايمىن. ارينە, توبىمىز قيىن. بىراق مەن قازاقستاننىڭ ۇلتتار ليگاسىنداعى بىرنەشە ويىنىن كوردىم. الداعى ۋاقىتتا قۇراماعا شاقىرىلعان فۋتبولشىلار جاسىل الاڭدا بارىن سالادى دەپ ويلايمىن. ءبىز دۇرىس تاكتيكا تاڭداي الساق, جەڭىسكە جەتۋگە مۇمكىندىگىمىز جوعارى بولماق.
جازىپ العان ءالي بيتورە,
«Egemen Qazaqstan»