ش.ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىندە اۋىل شارۋاشىلىعى ونىمدەرىن وندىرۋشىلەرىنە ارنالعان كۋرستار ۇيىمداستىرىلىپ, ايتۋلى عالىمدار سەمينار ساباقتار وتكىزدى.
اقمولا وبلىسى اۋىل شارۋاشىلىعى ءونىمىنىڭ كولەمى بويىنشا رەسپۋبليكادا الدىڭعى ورىنداردا. ايتسە دە, ەگىنشىلىك مادەنيەتىن جەتىلدىرۋدە شارۋا قوجالىقتارىنىڭ ولقىلىقتارعا جول بەرىپ جاتاتىنى دا بار. ورالىمسىزدىقتىڭ باستى سەبەپتەرىنىڭ ءبىرى – تىڭايتقىشتاردى ورىنسىز قولدانۋدا. الداعى ۋاقىتتا وسى ءبىر كەمشىلىكتىڭ الدىن الۋ ءۇشىن ساكەن سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ عالىمدارى ورتالىق قازاقستان مەن سولتۇستىك وڭىرلەردە كوشپەلى سەمينارلار وتكىزۋدە. سەمينارعا قاتىسۋشىلار توپىراق قۇنارلىلىعىن ارتتىرىپ, ءونىم ونىمدىلىگىن جوعارىلاتۋ بويىنشا پراكتيكالىق ءدارىس الدى.
– اقمولا وبلىسىنىڭ 150-گە جۋىق شارۋا قوجالىقتارىنىڭ باسشىلارىن جيناپ سەمينار وتكىزىپ جاتىرمىز. تسيفرلاندىرۋ بويىنشا قانداي جاڭالىقتار ەنىپ جاتىر, كەلەر جىلى اۋىل شارۋاشىلىعى سالاسىندا قانداي ەرەكشەلىكتەر ورىن الماق؟ وسى توڭىرەكتە اڭگىمە ءوربىتىپ, مامانداردى سوعان بەيىمدەۋگە اتسالىساتىن بولامىز,–دەيدى س.سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ پرورەكتورى قايرات ايتۋعانوۆ.
اگروونەركاسىپ كەشەنىنىڭ تيىمدىلىگىن انىقتاۋ ءۇشىن, ونىڭ ماقساتىن, قوعامنىڭ ماتەريالدىق جاعدايىنىڭ وڭتايلانۋىن جانە الەۋمەتتىك فاكتورلاردى قامتاماسىز ەتۋدى ەسكەرۋ كەرەك. قازاق اگروتەحنيكالىق ۋنيۆەرسيتەتىنىڭ عالىمدارى مەن ساراپشىلارى گەواقپاراتتىق جۇيەسى تەحنولوگياسىن قولدانۋ جانە اۋىل شارۋاشىلىعىندا جەردى قاشىقتىقتان بۇرعىلاۋ تۋرالى تولىق اقپارات ۇسىنىپ, ەگىنشىلىك جۇيەسى بويىنشا توپىراق قۇنارلىلىعىن ماقساتتى تۇردە باسقارۋ ادىستەرىن, تىڭايتقىشتاردى ديففەرەنتسيالداۋ, ارامشوپتەر مەن زيانكەستەردىڭ فيتوسانيتارلىق مونيتورينگى جايىندا ءسوز قوزعادى.
– قازىر جاڭا تەحنولوگيالاردى دا قولدانۋ ۇستىندەمىز. قاراپايىم تىلمەن ايتساق, تسيفرلاندىرۋ سالاعا ايتارلىقتاي سەرپىن بەرۋدك. درونمەن توپىراق جامىلعىسىنىڭ جاي-كۇيىن تەز انىقتاي الامىز. وسىمدىكتانۋ, گەواقپاراتتىق جۇيە, اگرونوم, ەكونوميست ماماندار بولىپ بىلتىردان بەرى وڭىرلەردە جۇمىس ىستەۋدە,–دەيدى اۋىل شارۋاشىلىعى عىلىمدارىنىڭ كانديداتى تىلەكقالي تۇرعىنباەۆ.
بىلىكتىلىكتى ارتتىرۋ كۋرسىنا قاتىسۋشىلارعا اتالعان دارىستەردەن بولەك, اگروونەركاسىپتىك ونىمدەردى اقپاراتتاندىرۋ جانە تسيفرلاندىرۋ جاعدايىندا ەكونوميكالىق شەشىمدەردى تالداۋمەن وڭتايلاستىرۋ ۇردىستەرى جايىندا دا اقپاراتتار بەرىلدى.
بايقال ءبايادىل,
«Egemen Qazaqstan»