2018 جىلدىڭ قورىتىندىسى بويىنشا تۇرعىن ءۇي قۇرىلىس جيناق بانكىنىڭ («بايتەرەك» حولدينگىنىڭ ەنشىلەس ۇيىمى) 1 038 869 سالىمشىسىنا مەملەكەت سىيلىقاقىسى تولەندى. قارجىلىق ۇيىم كليەنتتەرىنىڭ شوتىنا جالپى العاندا 28,6 ميلليارد تەڭگە اۋدارىلدى. بۇل وتكەن جىلعى بانك سالىمشىلارىنا تولەنگەن قاراجاتتان 5,6 ملرد تەڭگەگە ارتىق.
مەملەكەت سىيلىقاقىسىن تولەۋگە ارنالعان سومانىڭ ۇلعايۋى بانك كليەنتتەرى سانىنىڭ وسۋىنە بايلانىستى بولىپ وتىر. ماسەلەن, وتكەن جىلى 20% كولەمىندەگى سىيلىقاقى 896 620 ادامعا بەرىلگەن ەدى.
ال, 96 200 تەڭگەنى قۇرايتىن ەڭ جوعارعى مەملەكەت سىيلىقاقىسىن 202 900 بانك كليەنتى الدى. ياعني, اتالعان ازاماتتار 2018 جىلى شوتتارىنا كەمىندە 481 000 تەڭگەنى نەمەسە 200 ايلىق ەسەپتىك كورسەتكىشتى قۇرايتىن قاراجات سوماسىن جيناعان. دەپوزيتىندە بۇدان دا ۇلكەن قاراجات سوماسىن جيناعان كليەنتتەر سىيلىقاقى تولەنبەگەن جيناق سوماسى بويىنشا مەملەكەتتىك بونۋستى 2019 جىلدىڭ ناتيجەسىندە الاتىن بولادى.
- تۇرعىن ءۇي قۇرىلىس جيناق بانكى – تۇرعىن ءۇي قۇرىلىس جيناق جۇيەسىن جۇزەگە اسىراتىن قازاقستانداعى جالعىز بانك. زاڭ بويىنشا بۇل جۇيەگە قاتىسۋشىلارعا ارناپ مەملەكەت جىل سايىن سىيلىقاقى تولەيدى. اتالعان بونۋس قازاقستاندىقتاردىڭ ءوز باسپاناسىن ساتىپ الۋلارى ءۇشىن تەزىرەك قاراجات جيناقتاپ, قونىس تويىن وتكىزۋگە مۇمكىندىك بەرەدى. قولجەتىمدى شارتتار بويىنشا پاتەر نەمەسە ءۇي ساتىپ الۋ ءۇشىن تۇرعىن ءۇي قۇرىلىس جيناق جۇيەسىنە قاتىسۋعا نيەت بىلدىرۋشىلەر سانى جىلدان جىلعا ارتۋدا. 2018 جىلدىڭ قورىتىندىسى بويىنشا مەملەكەت 1 ميلليوننان استام قازاقستاندىقتىڭ جيناق سوماسىن كوبەيتۋگە كومەگىن تيگىزدى. سالىستىرا كەتەر بولساق, وسىدان ءۇش جىل بۇرىن مەملەكەت سىيلىقاقىسى بۇدان ەكى ەسە از ادامعا, ياعني, 537 مىڭ سالىمشىعا تولەنگەن بولاتىن,- دەپ اتاپ ءوتتى تۇرعىن ءۇي قۇرىلىس جيناق بانكى باسقارما ءتورايىمى ءلاززات يبراگيموۆا.
2019 جىلدىڭ قورىتىندىسى بويىنشا مەملەكەت سىيلىقاقىسى بەرىلەتىن ەڭ جوعارعى سالىم سوماسى – 505 000 تەڭگە (200 اەك) . وسىعان سايكەس, ماكسيمال مەملەكەت سىيلىقاقىسى 101 000 تەڭگەنى قۇرايدى. جىل قورىتىندىسى بويىنشا اتالعان سومانى الۋ ءۇشىن بانك سالىمشىلارىنا اي سايىن دەپوزيتتەرىنە ورتا ەسەپپەن 42 000 تەڭگەدەن سالىپ وتىرۋ كەرەك.
ال تۇرعىن ءۇي قۇرىلىس جيناق بانكى كليەنتى كوبىرەك قاراجات سوماسىن جيناعىسى كەلسە, ەڭ جوعارعى مولشەردەگى كىرىسكە قول جەتكىزۋ ءۇشىن وتباسى مۇشەلەرىنىڭ اتىنا بىرنەشە دەپوزيت اشىپ, ولارعا قاراجاتتى تەڭدەي ءبولىپ, سالىپ وتىرا الادى. بۇل جاعدايدا مەملەكەت سىيلىقاقىسى اشىلعان ءار شوت بويىنشا تولەنەدى. ال تۇرعىن ءۇي زاەمىن الۋعا قاجەت سوما جينالعان كەزدە, شوتتاردى بىرىكتىرىپ, باسپانا ساتىپ الۋعا بولادى. بۇل وپتسيانى تۇرعىن ءۇي قۇرىلىس جيناق بانكىندە «وتباسىلىق پاكەت» دەپ اتايدى.
تۇرعىن ءۇي قۇرىلىس جيناق بانكى دەپوزيتى بانك سىياقىسى مەن مەملەكەت سىيلىقاقىسىنىڭ ارقاسىندا ەڭ تابىستى سالىمداردىڭ ءبىرى بولىپ سانالادى. دەپوزيت بويىنشا جىلدىق ءتيىمدى سىياقى مولشەرلەمەسى 13%-عا دەيىن بارادى.