ەلىمىزدە وقۋشىلار اراسىندا باتىرلار جىرىن جاتقا وقۋدان «Qazaq Epos» رەسپۋبليكالىق جوباسى قولعا الىندى. بايقاۋ ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» جانە « ۇلى دالانىڭ جەتى قىرى» ماقالاسىنداعى مىندەتتەردى ىسكە اسىرۋ ماقساتىندا ۇيىمداستىرىلىپ وتىر.
بۇدان بۇرىن رەسپۋبليكا كولەمىندە «تۇلپار ءمىنىپ, تۋ العان» ۇلتتىق جوباسىن قولداۋ ماقساتىندا باتىرلار جىرىن جاتقا ايتۋدان ەستافەتا ءوتىپ, ەلىمىزدىڭ يگى جاقسىلارى جاپپاي اتسالىسقانى ەسىمىزدە. ال بۇل جولى ۇيىمداستىرىلىپ وتىرعان «تۇلپار ءمىنىپ, تۋ العان» بايقاۋىنىڭ ماقساتى – ءاماندا ەل تاعدىرىن بيىك قويعان ەرلىك داستاندارىمەن وسكەلەڭ ۇرپاقتى سۋسىنداتىپ قانا قويماي, ىقىلىم زاماننان بەرى كەلە جاتقان جىرشىلىق ءداستۇردى قايتا جانداندىرۋ. جوبانىڭ جاي-جاپسارى تۋرالى وكق-دا وتكەن بريفينگتە اقپارات جانە كوممۋنيكاتسيالار ءمينيسترى داۋرەن اباەۆ, ءبىلىم جانە عىلىم ۆيتسە-ءمينيسترى ەلميرا سۋحانبەرديەۆا, «حابار» اگەنتتىگى» اق باسقارما توراعاسىنىڭ ءبىرىنشى ورىنباسارى رينات كەرتاەۆ, «Qazaq Epos» قوعامدىق قورىنىڭ باس ديرەكتورى باقىتجان تۇرلىبەكوۆ ايتىپ بەردى.
اقپارات جانە كوممۋنيكاتسيالار ءمينيسترى داۋرەن اباەۆتىڭ ايتۋىنشا, جوبا «رۋحاني جاڭعىرۋ» باعدارلاماسىندا ايتىلعان ۇلتتىق كودتى قالىپتاستىرۋ ءۇشىن ىقپالى زور.
– نەگىزگى باعىت تاريحي ەپوستاردى جاتتاۋ. ياعني, تۋىندىنى تولىق جاتقا ايتۋ, مانەرلەپ وقۋ, ەپوستاعى ءار ءسوزدىڭ ماعىناسى مەن مازمۇنىن ءتۇسىنۋ – باستى تالاپتاردىڭ ءبىرى. پوەتيكالىق ءماتىندى مەڭگەرۋ ارقىلى وقۋشى تاريحتى دا تەرەڭ تۇسىنە باستايدى. ەستە قالاتىن پوەتيكالىق ءماتىن وقۋشىنىڭ سويلەۋ مادەنيەتىن, ساۋاتتى جازۋىن قالىپتاستىرادى. وسىلايشا مەكتەپ وقۋشىسى ادەبي شىعارمالاردى تالعاممەن وقۋدى قالىپتاستىرعان بولار ەدى, – دەدى مينيستر.
اتالعان جوبانىڭ ۇيىمداستىرۋشىسى «Qazaq Epos» قوعامدىق قورىنىڭ باس ديرەكتورى باقىتجان تۇرلىبەكوۆتىڭ حابارلاۋىنشا, بايقاۋ 6-10 سىنىپ وقۋشىلارى اراسىندا وتەدى. قاتىسۋشىلار «قوبىلاندى باتىر» جىرىنىڭ ماراباي جىراۋ نۇسقاسىن جاتقا ايتىپ, جىردى ماعىنالى-كونتەكستىك تۇرعىدا تالداۋى ءتيىس. ودان بولەك, قازاق ءتىلى مەن قازاق ادەبيەتى وقۋلىعى بويىنشا ازىرلەنگەن سۇراقتارعا جاۋاپ بەرەدى.
– بايقاۋ 10 بالدىق جۇيەمەن بەلگىلەنەدى, سونداي-اق 3 كەزەڭنەن تۇرادى. ءبىرىنشى كەزەڭ – جىردان سايىس. ەكى ادام شىعىپ سايىسادى. ەكىنشى كەزەڭ – جەر-سۋ اتتارى بويىنشا. ياعني, جىرداعى بولعان وقيعا نەگىزىندە سۇرالادى. ءۇشىنشىسى – كونەرگەن سوزدەردىڭ ءمان-ماعىناسىن اشۋ. بۇلار اۋداندىق دەڭگەي. ال وبلىستىق دەڭگەيدە ءار اۋداننان 3 ادام قاتىسادى. بۇل جەردە دە اۋداندا قويىلعان سۇراقتار قويىلادى. ەڭ ءبىرىنشى, بالانىڭ جىردى تولىق جاتتاعانىنا ەرەكشە نازار اۋدارىلادى, – دەدى «Qazaq Epos» قوعامدىق قورىنىڭ باس ديرەكتورى باقىتجان تۇرلىبەكوۆ.
جوبا اياسىندا 107 بەتتەن تۇراتىن «قوبىلاندى باتىر» جىرىن 50 مىڭ وقۋشىعا تولىق جاتتاتۋ كوزدەلگەن. ال وسىناۋ تاريحي جەتىستىكتى گيننەستىڭ رەكوردتار كىتابىنا ەنگىزۋ ماقساتىندا ءوتىنىم بەرۋ دە جوسپاردا بار. بايقاۋ سۇراقتارى احمەت بايتۇرسىن ۇلى اتىنداعى ءتىل ءبىلىمى ينستيتۋتىمەن جانە الماتىداعى ادەبيەت جانە ونەر ينستيتۋتىمەن بىرلەسىپ ازىرلەنەدى. ال قازىلار القاسىن جەرگىلىكتى اتقارۋشى ورگاندارمەن, سونداي-اق ءبىلىم جانە عىلىم مينيسترلىگىمەن بىرلەسە وتىرىپ, «Qazaq Epos» قوعامدىق قورى جاساقتايدى».
بايقاۋدىڭ اۋداندىق كەزەڭىندە 1-ورىن ءۇشىن 150 مىڭ تەڭگە, 2-ورىنعا 100 مىڭ تەڭگە, 3-ورىنعا 50 مىڭ تەڭگە كولەمىندە اقشالاي جۇلدە تاعايىندالىپ وتىر. وبلىستىق كەزەڭدە 1-ورىن ءۇشىن 1 ميلليون تەڭگە, 2-ورىنعا 600 مىڭ تەڭگە, 3-ورىن يەگەرىنە 300 مىڭ تەڭگە سىياقى بەرىلمەك. وبلىستىق كەزەڭدە جەڭىمپاز اتانعان وقۋشىلاردىڭ مۇعالىمدەرىنە دە اقشالاي جۇلدە قورىن تاعايىنداۋ ءارى بىلىكتىلىك ساناتىن كوتەرۋ دە ەسكەرىلگەن. بۇرىن-سوڭدى بولماعان جىرشىلار سايىسىن ۇيىمداستىرۋعا اقپارات جانە كوممۋنيكاتسيالار مينيسترلىگى, «Qazaq Epos» قوعامدىق قورى باستاماشى بولىپ, ءوز كەزەگىندە ءبىلىم جانە عىلىم مينيسترلىگى جانە «حابار» اگەنتتىگى قولداۋ جۇمىستارىنا اتسالىسپاق. اتالعان بايقاۋدىڭ تولىق شارتى «Egemen Qazaqstan» گازەتىنىڭ سارسەنبى كۇنگى سانىندا جاريالانادى.
ايا ءومىرتاي,
«Egemen Qazaqstan»