سىرتقى ىستەر ءمينيسترى بەيبىت اتامقۇلوۆ گەرمانيا فەدەراتيۆتىك رەسپۋبليكاسىنىڭ قازاقستان رەسپۋبليكاسىنداعى ەلشىسى تيلو كليننەرمەن كەزدەستى.
كەزدەسۋ بارىسىندا سۇحباتتاسۋشىلار ساياسي جانە ساۋدا-ەكونوميكالىق سالاداعى قازاقستان-گەرمان ىنتىماقتاستىعىنىڭ قازىرگى جاعدايى مەن كەلەشەگىن تالقىلادى. ەكى ەل اراسىنداعى ىلگەرىلەمەلى ديناميكاسى اتاپ ءوتىلىپ, ەكىجاقتى قارىم-قاتىناستاردى ودان ءارى كەڭەيتۋگە جانە نىعايتۋعا ءوزارا مىندەتتەمە راستالدى.
تاراپتار قازاقستان مەن گەرمانيا اراسىنداعى ىنتىماقتاستىقتىڭ بارلىق ماسەلەلەرىن ءارى قاراي دامىتۋدى, سونداي-اق 2017 جىلدىڭ شىلدەسىندە استانا قالاسىندا قازاقستان پرەزيدەنتى نۇرسۇلتان نازارباەۆ پەن گەرمانيانىڭ فەدەرالدىق پرەزيدەنتى فرانك-ۆالتەر شتاينمايەر اراسىندا وتكەن كەلىسسوزدەردىڭ ناتيجەسىندە قول جەتكىزىلگەن ۋاعدالاستىقتاردى جۇزەگە اسىرۋ ماسەلەلەرىن ناقتى تالقىلادى.
گەرمانيا قازاقستاننىڭ ەۋروپالىق وداقتاعى ماڭىزدى جانە ستراتەگيالىق ارىپتەسى بولىپ تابىلادى. ء«بىز ەكىجاقتى ىنتىماقتاستىق اياسىن كەڭەيتۋگە, اتاپ ايتقاندا قازاقستان نارىعىنا نەمىس ينۆەستيتسيالارىن جانە تەحنولوگيالارىن تارتۋعا مۇددەلىمىز. سىرتقى ىستەر مينيسترلىگىنە جۇكتەلگەن جاڭا مىندەتتەر اياسىندا ءبىزدىڭ ىنتىماقتاستىعىمىز جاڭا سەرپىن الادى», - دەدى ب. اتامقۇلوۆ.
نەمىس ەلشىسى استانامەن قارىم-قاتىناستاردى دامىتۋ گەرمان ديپلوماتياسىنىڭ ورتالىق ازيا ايماعىنداعى باسىمدىقتارىنىڭ ءبىرى بولىپ تابىلاتىنىن اتاپ ءوتتى. ت. كليننەر قازاقستان ەكونوميكاسىن ودان ءارى جاڭعىرتۋ جوسپارلارىن قۇپتاپ, بىرلەسكەن جوبالاردى جۇزەگە اسىرۋعا جاردەمدەسۋگە دايىن ەكەنىن ءبىلدىردى.
گەرمانيا قازاقستانداعى نەگىزگى ەۋروپالىق ينۆەستورلاردىڭ ءبىرى بولىپ تابىلادى. 2005 جىلدان باستاپ 2018 جىلدىڭ قاراشا ايىنا دەيىن گەرمانيادان قازاقستانعا ينۆەستيتسيالار كولەمى 8,6 ملرد. اقش دوللارىن قۇرادى. 2018 جىلدىڭ قاڭتار-قاراشا كەزەڭىندە تاۋار اينالىمى 1,9 ملرد. اقش دوللارىن, ال 2017 جىلى - 1,9 ملرد. اقش دوللارىن قۇرادى. بۇگىنگى كۇنى قازاقستاندا نەمىس كاپيتالىمەن 450 كاسىپورىن جۇمىس اتقارۋدا.