سولتۇستىك قازاقستاندا جازاسىن وتەۋشىلەر جۇمىسپەن قامتىلعان

سولاردىڭ ءبىرى دانيار راحىموۆ جيھاز جاساۋدى جاقسى مەڭگەرگەن. ول وزىنە جۇكتەلگەن تاپسىرمالاردى ساپالى اتقاراتىندىقتان, اكىمشىلىك تاراپىنانا العان ماراپاتتارى از ەمەس.

ء«بىز كوبىنە مەكتەپتەر مەن ۋنيۆەرسيتەتتىڭ زاكازدارىن ورىندايمىز. قازىر جاتاقحانالارعا ارناپ جاتىنورىندار, بالاباقشالارعا كيىم ىلگىشتەر, وقۋشىلارعا پارتا, ورىندىقتار ازىرلەپ جاتىرمىز» دەيدى دانيار. ال اندرەي مايەر ناۋبايحانادا  جۇمىس ىستەيدى. ول  التى ارىپتەسىمەن بىرگە  كۇنىنە 700 بولكە نان پىسىرەدى.

وبلىس ورتالىعىنا ىرگەلەس زارەچنىي كەنتىندە جۇمىس ىستەيتىن ەس-164/3 تۇزەتۋ مەكەمەسىندە بىرنەشە تسەح جۇمىس ىستەپ تۇر. مۇندا توسەك جابدىقتارىن دا دايىندايدى. بەساسپاپ شەبەرلەر اعاشتى جونىپ, تەمىردەن ءتۇيىن تۇيەدى.

كولونيا باستىعىنىڭ ورىنباسارى رۇستەم راحمەتوۆتىڭ ايتۋى بويىنشا, مۇندا ءۇش كاسىپكەر ءوز كاسىبىن دوڭگەلەتىپ وتىر. ىسكەر ازاماتتار جازعىتۇرىم جىلىجاي اشىپ, كوكونىس ءوسىرۋ ءۇشىن 160 شارشى مەتر جەر دايىنداپ قويىپتى.

بۇگىندە 140 سوتتالۋشى جۇمىسپەن قامتاماسىز ەتىلگەن. ايلىق تابىستارى ارنايى جەكە ەسەپشوتقا اۋدارىلادى. جالاقىنىڭ جارتىسىن وزدەرىنە قالدىرىپ, قالعان قاراجاتتى بەرەشەكتەرىن وتەۋگە, بولماسا تۋعان-تۋىستارىنا, وتباسىلارىنا اۋدارۋعا قۇقىلى.

ءومىر ەسقالي,

«ەگەمەن قازاقستان»

سولتۇستىك قازاقستان وبلىسى