اگەنتتىكتىڭ اۋماقتىق دەپارتامەنتىندە ماڭعىستاۋ وبلىسى بويىنشا مەملەكەتتىك مەكەمەلەردىڭ كادر ماماندارىنىڭ باسىن قوسقان جيىن ءوتىپ, قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ 2017 جىلعى 21 اقپانداعى №40 بۇيرىعىنا ەنگىزىلگەن وزگەرىستەر مەن تولىقتىرۋلار تۋرالى ايتىلدى.
مەملەكەت باسشىسىنىڭ «100 ناقتى قادام» ۇلت جوسپارىن ىسكە اسىرۋ اياسىندا 2016 جىلدان باستاپ مەملەكەتتىك قىزمەتتە ءۇش ساتىلى ىرىكتەۋ جۇيەسى ەنگىزىلگەن بولاتىن. وسى ورايدا, رەسپوندەنتتەردىڭ 60%-ى مەملەكەتتىك قىزمەتكە جاڭادان تۇسۋشىلەردىڭ ءبىلىم دەڭگەيى ارتتى دەپ اتاپ وتكەن. ىرىكتەۋ بارىسىن جەتىلدىرۋ ماقساتىندا 1 قاڭتاردان باستاپ كونكۋرس وتكىزۋ قاعيدالارىنا بىرقاتار وزگەرىستەر ەنگىزىلدى.
- وزدەرىڭىز بىلەتىندەي ازاماتتار ءبىرىنشى كەزەكتە زاڭدىلىق جونىندە تەست تاپسىرىپ, ولاردىڭ ءبىلىم دەڭگەيى انىقتالادى. رەسپۋبليكا بويىنشا 2018 جىلى 53000 ادام تەست تاپسىرىپ, 46 % وڭ باعاسىن العان. جالپى بۇرىنعى جىلدارعا قاراعاندا ۇمىتكەرلەر تەستكە جاقسى دايىندالىپ جۇرگەندىگى بايقالادى. وتكەن جىلى فرانتسۋزدىق كومپانيانىڭ جانە مەملەكەتتىك قىزمەت سالاسىنداعى ايماقتىق حابتىڭ قولداۋىمەن جاڭارتۋ جۇمىستارى اياقتالعان بولاتىن. قۇزىرەتتىلىك حالىققا قىزمەت ەتۋ پرينتسيپتەرى جانە زاماناۋي مەملەكەتتىك اپپارات تالاپتارىنا تولىقتاي سايكەس كەلەدى, - دەدى اگەنتتىكتىڭ اۋماقتىق دەپارتامەنتى باسشىسى ن.جاننازاروۆا.
ايتا كەتۋ كەرەك, ۇمىتكەرلەردىڭ وزدەرى تۋرالى جالعان اقپارات بەرۋىن الدىرىپ تاستاۋ ءۇشىن, باعاعا سەنىمگەرلىك دەڭگەيىن انىقتاۋ جونىندە سۇراقتار كىرەدى. ەگەر تەست كەزىندە بەرىلگەن مالىمەتتەر 50% تومەن بولسا, وندا ۇمىتكەر تەستتەن وتپەگەن بولىپ ەسەپتەلەدى. تەستتەن سۇرىنگەندەر قايتادان تەستتەن ءوتۋ ءۇشىن ءبىر اي ۋاقىت كەرەك. وسى جىل باسىنان رەسپۋبليكا بويىنشا 400-دەن استام ادام تەستكە قاتىسىپ, ونىڭ 70% باستاپقى كەزەڭنەن سۇرىنبەي ءوتتى. سونىمەن قاتار, قاعاز تۇرىندەگى سەرتيفيكاتتار بۇدان بىلاي الىنىپ تاستالىنادى. بۇرىن ازاماتتار تەستتەن وتكەن سوڭ سەرتفيكات الاتىن جانە كونكۋرسقا قاتىسۋ ءۇشىن ونى پەرسونالدى باسقارۋ قىزمەتىنە اپارىپ بەرەتىن. بۇل ءوز كەزەگىندە بىرنەشە قيىندىقتار تۋعىزاتىن. بىرىنشىدەن, اگەنتتىك بلانكتەر ساتىپ الۋ ءۇشىن جانە باسقا دا قاجەتتىلىكتەرگە بيۋدجەتتەن قاراجات جۇمسايتىن. ەكىنشىدەن, ۇمىتكەر بىرنەشە كونكۋرسقا ءبىر مەزگىلدە قاتىسۋ ءۇشىن بلانكتىڭ كوشىرمەسىن تۇسىرۋگە جانە نوتاريۋستىڭ قولىمەن راستاۋ قاجەت ەدى. ۇشىنشىدەن, جالعان سەريفيكات جاساۋ قاۋىپى بولاتىن. بۇدان بىلاي ازاماتتاردىڭ تەستتەن وتكەن ناتيجەسى «ە-قىزمەت» جۇيەسىندە ساقتاۋلى بولادى, ناتيجەسىندە مەملەكەتتىك ورگانداردىڭ كادر قىزمەتتەرى ۇمىتكەرلەردىڭ تەست قورىتىندىسىمەن وزدەرى جەكە تانىساتىن بولادى. مۇنداي باستاما كونكۋرسقا قاتىسۋعا نيەت ءبىلدىرىپ قۇجاتتار تاپسىرۋشىلار سانىنىڭ ازايۋىنا اكەلەدى. قازىرگى ۋاقىتتا, بۇرىنعىداي پسيحياتريالىق جانە ناركولوگيالىق ۇيىمداردان انىقتاما اكەلۋ بويىنشا تالاپتى الىپ تاستاپ, ءتيىستى اقپاراتتىق جۇيە ارقىلى شەشۋ جولدارى قاراستىرىلۋدا.
سونداي-اق, مەملەكەتتىك ورگاندار اراسىندا كونكۋرس وتكىزۋ كەزىندە قاعاز اينالىم الىنىپ تاستالىندى. بۇرىنداعى كونكۋرسقا قاتىسۋ ءۇشىن مەملەكەتتىك قىزمەتشىلەر ەڭبەك ءوتىلى ءتىزىمىن الۋ ءۇشىن كادر قىزمەتىنە حابارلاساۋعا ءماجبۇر بولاتىن. سودان سوڭ ولاردىڭ مەملەكەتتىك ورگاندارعا جولدايتىن. بۇل ءبىراز قيىندىقتار تۋعىزاتىن. بۇدان بىلاي بۇل پروتسەسستەر ىشكى كونكۋرستار كەزىندە اۆتوماتتاندىرىلدى جانە "ە-قىزمەت", "ە-gov" نەمەسە مەملەكەتتىك ورگاننىڭ ەلەكتروندى مەكەنجايىنا ەلەكتروندى تۇرىندە جىبەرىلەدى.
قۇجاتتار ەلەكتروندى تۇردە مەملەكەتتىك ورگاننىڭ ەلەكتروندىق پوشتاسىنا نەمەسە "ە-gov" ەلەكتروندىق ۇكىمەت پورتالى نەمەسە "ە-قىزمەت" ينتەگرالدى اقپاراتتىق جۇيەسى ارقىلى بەرىلگەن جاعدايدا ولاردىڭ تۇپنۇسقاسى اڭگىمەلەسۋ باستالعانعا دەيىن ەكى ساعاتتان (ىشكى كونكۋرستار ءۇشىن), ءبىر كۇننەن كەشىكتىرمەي (جالپى كونكۋرستار ءۇشىن) كەشىكتىرىلمەي بەرىلەدى.
شارا سوڭىندا كادر ماماندارى وزدەرىن تولعاندىرعان سۇراقتارىنا جاۋاپ الدى.
گۇلايىم شىنتەمىرقىزى,
«Egemen Qazagstan»
ماڭعىستاۋ وبلىسى