تارباعاتاي اۋدانىنىڭ اقسۋات اۋىلىندا قۇسبەگىلىكتەن قازاقستان رەسپۋبليكاسىنىڭ ءحىىى چەمپيوناتى وتۋدە. اۋداننىڭ كاسىپكەرلەرى, ەرلان سىدىقوۆ, بادەلحان سابۋروۆ سياقتى ازاماتتاردىڭ قولداۋىمەن جانە «شىعىس-التاي» بۇركىتشىلەر فەدەراتسياسىنىڭ ۇيىمداستىرۋىمەن ءوتىپ جاتقان سايىسقا ەلىمىزدىڭ 12 وبلىسىنان قۇسبەگىلەر (40 بۇركىت, 3 قارشىعا, 4 يتەلگى) قاتىسىپ, جارىستىڭ كورىگىن قىزدىرۋدا.
كەشە قاتىسۋشىلار قىران قۇستاردى قولعا شاقىرۋ, ەركىن ۇشىرۋ, بۇركىتتى شىرعاعا سالۋ, سۇڭقارلاردى دالبايعا شاقىرۋ سىندى كەزەڭدەردەن تۇراتىن قىزىقتى ساتتەردى جۇرتشىلىق نازارىنا ۇسىنسا, بۇگىن بۇركىتتى اۋەلى قويانعا, سوڭىنان فينالعا وتكەندەردى تۇلكى مەن قاسقىرعا, قارشىعا, سۇڭقارلاردى كەپتەر مەن قىرعاۋىلعا سالۋ سايىستارى ۇيىمداستىرىلادى دەپ كۇتىلۋدە.
وسى جارىستى تاماشالاۋ ءۇشىن تارباعاتايعا اتتانعان وسكەمەندىك ارىپتەسىمىز مۇراتحان كەنجەحان ۇلىمەن ۇيالى تەلەفون ارقىلى حابارلاسقانىمىزدا 40 بۇركىتتىڭ 13-ءى فينالعا وتكەنىن ايتتى.
ەستەرىڭىزگە سالا كەتەيىك, بۇركىتشىلەردىڭ سوڭعى ءۇش چەمپيوناتى دا ءبىزدىڭ وبلىستا وتكەن بولاتىن. 2016, 2018 جىلدارى ءۇرجار, 2017 جىلى اياگوز اۋدانىندا ۇيىمداستىرىلعان-دى. «قۇسبەگىلەردىڭ چەمپيوناتىن تارباعاتاي اۋدانىندا العاش رەت ۇيىمداستىرىپ وتىرمىز. ۇلتتىق داستۇرىمىزگە جۇرتتىڭ قىزىعۋشىلىعى, ىنتا-ىقىلاسىنىڭ زور ەكەنىن بايقادىق. سوندىقتان الداعى جىلى وسى چەمپيوناتتى حالىقارالىق دەڭگەيدە, ياعني ىرعىزباي دوسحانا ۇلى اتىنداعى حالىقارالىق بۇركىتشىلەر سايىسى دەپ وتكىزسەك پە دەگەن ويىمىز بار. سونىمەن قاتار اۋدانداعى ونەر مەكتەبى ىشىنەن بۇركىتشىلەر سىنىبىن اشۋدى جوسپارلاپ وتىرمىز», - دەيدى تارباعاتاي اۋدانىنىڭ اكىمى دىلدابەك ورازباەۆ.
ازامات قاسىم,
«Egemen Qazaqstan»
شىعىس قازاقستان وبلىسى, تارباعاتاي اۋدانى