قۇرلىقتىق حوككەي ليگاسىنىڭ كەزەكتى تۋرىندا «بارىس» كلۋبى «يوكەريتتى» 8-2 ەسەبىمەن تىزە بۇكتىردى.
ماتچتاعى العاشقى شايبانى «يوكەريت» ويىنشىلارى سوقتى. كەزدەسۋدىڭ 8 مينۋتىندا ساكاري ماننينەن مەرگەندىگىمەن تانىلعان. الايدا كوپ ۇزاماي «بارىس» حوككەيشىلەرى ەسەپتى تەڭەستىردى. قارىمتا شابۋىلدا ءاليحان اسەتوۆ قارسىلاس قاقپاشىسىن قاپى قالدىردى.
ويىننىڭ ەكىنشى كەزەڭىندە برەندون بوچەنسكي استانالىقتاردى العا شىعارعان. الايدا پيتەر رەگين تارازى باسىن تەڭەستىردى. بىراق ەكىنشى تايم اياقتالار تۇستا اندرە پەتەرسسون ەسەپتى 3-2-گە جەتكىزدى.
ءۇشىنشى كەزەڭ ەلوردالىقتاردىڭ بەنەفيسىنە اينالدى. «بارىس» حوككەيشىلەرى قارسىلاس قاقپاسىنا جاۋاپسىز 5 شايبا سوقتى. اۋەلى رومان ستارچەنكو مەرگەندىك تانىتسا, كەيىننەن اندرە پەتەرسسون, نيكيتا ميحايليس, ەگور پەتۋحوۆ, مەتتيۋ فرەتتين قانجىعاسىن مايلادى.
وسىلايشا, «بارىس» ويىنشىلارى قحل-دىڭ بەسىنشى ساتىسىنا كوتەرىلدى. ال شىعىس كونفەرەنتسياسى بويىنشا استانالىقتار ەكىنشى ورىنعا جايعاستى.
«بارىس» پەن «يوكەريت» بۇعان دەيىن 8 مارتە كەزدەسكەن بولاتىن. سونىڭ بەسەۋىندە ەلوردالىقتار جەڭىسكە باستار جولدى جازباي تاپسا, ءۇش ويىندا «يوكەريتتىڭ» اسىعى الشىسىنان ءتۇستى.