الماتىنىڭ مادەني ومىرىندەگى ەلەڭدەتەرلىك جاڭالىقتىڭ ءبىرى – «مۋزا DIOR. اللا يلچۋننىڭ تاريحى. قازاقتان شىعىپ, ءسان الەمىن مويىنداتقان» اتتى كىتابىنىڭ اۆتورى بەرلين يريشەۆپەن وتكەن كەزدەسۋ بولدى.
مەگاپوليستەگى «الماتىكىتاپ» وقىرماندار كلۋبىندا وتكەن جاڭا كىتاپتىڭ تۇساۋكەسەرىنە قاتىسۋعا مۇددەلىلىك تانىتقان جاندار كوپتەپ تابىلدى.
جاڭا كىتاپ 20 جىل بويى ءپاريجدىڭ ءسان الەمىندە سالتانات قۇرعان اللا يلچۋننىڭ ءومىرىن عانا ەمەس, بۇرىن-سوڭدى بەلگىسىز بولىپ كەلگەن دەرەكتەر مەن مۇراعاتتىق قۇجاتتاردى دا قامتيدى.
دەرەكتى كىتاپتىڭ جارىققا شىعۋىنا دوسىم ساتپاەۆتىڭ جەكە مادەني-اعارتۋشىلىق قورى ىقپال ەتكەن.
كىتاپ اۆتورىنا كەلسەك, بەرلين يريشەۆ – ەكونوميست, ديپلومات. 1996 جىلدان بەرى فرانتسيا مەملەكەتىندە تۇرادى. ال بۇرىنعى ديپلوماتقا ءوز قانداسى جايلى كىتاپ جازۋ يدەياسى كۇتپەگەن جاعدايدا پايدا بولادى. 2018 جىلدىڭ جازىندا كورمەدەن اللا يلچۋننىڭ سۋرەتشى لەون زەيتلەن سالعان پورترەتىن كورىپ, ساتىپ الىپ قازاقستاندىقتارعا ماقتانىشپەن كورسەتپەك بولادى. ارتىنشا 60-قا كەلگەندە اكەسىنىڭ قازاق ەكەندىگىن مويىنداپ كەتكەن مودەل تۋرالى كىتاپ جازۋعا شەشىم قابىلدايدى.
اۆتور كىتاپتى جازۋ جانە دەرەكتەر جيناقتاۋ بارىسىندا ميستيكالىق وقيعالار مەن سايكەستىكتەردىڭ وتە كوپ بولعانىن ايتادى. بۇل دا بولسا ءسان الەمىندە «شىعىس مارجانى» اتانىپ, ەرەكشە جاراتىلىسىمەن ەۋروپانى وزىنە جالت قاراتقان ءتۇبى قازاق قىزىنىڭ اۆتورعا ءارى قانداسىنا دەگەن تىلسىم قولداۋى بولسا كەرەك.
اۆتور وسى كىتاپتىڭ قالاي جارىققا شىققانىن, ونى جازۋ بارىسىندا ەل جادىنان ۇمىت بولۋعا اينالعان ءسان تۋرالى اڭىز تۋرالى مالىمەتتەردى, ءسان الەمىنىڭ پاديشاسىنا اينالعان قازاق قىزى تۋرالى اقيقاتتى تىرىلتۋگە كىمدەردىڭ قولۇشىن بەرگەنى تۋرالى قىزىقتى باياندادى.
قازىرگە ورىس تىلىندە جارىق كورگەن كىتاپتا اللا يلچۋن, ياعني اللا قۋانتحانقىزى ەلشىن قىتاي ەلىندە تۋىپ, ەكىنشى دۇنيەجۇزىلىك سوعىس كەزىندە فرانتسيادا پارتيزان بولعانىن, ودان كەيىن كريستيان ديوردىڭ №1 مودەلى بولعانى تاريحي دالەلدەرمەن سۋرەتتەلەدى.
ايناش ەسالي,
«Egemen Qazaqstan»
الماتى