ن.پوگودين اتىنداعى وبلىستىق ورىس دراما تەاترى جاسوسپىرىمدەردى اكتەرلىك شەبەرلىككە باۋليتىن بولادى.
قۇرامىندا ونەرگە بەيىمى بار 40 بالا بار تەاتر ستۋدياسى ءوز جۇمىسىن باستاپ كەتتى. جەرتولەدەگى ەسكى دايىندىق زالى كۇردەلى جوندەۋدەن ءوتىپ, بارلىق بولمەلەر جاڭارتىلدى. ءسوز ونەرى مەن ساحناداعى ەركىندىككە ورىس دراما تەاترىنىڭ اكتريساسى يرينا پاشكينا ۇيرەتەدى.
«تەاتر ساحناسىندا جۇرگەنىمە شيرەك عاسىرعا جۋىق بولدى. ومىردەن تۇيگەنىم دە, تاجىريبەم دە مول. ساحنا مادەنيەتى, قيمىل-قوزعالىس مانەرى, اكتەرلىك شەبەرلىك, شەشەندىك ونەر جىلدار بويى قالىپتاسادى. قازىر 12 مەن 18 جاس ارالىعىنداعى جاسوسپىرىمدەر كەلىپ ءجۇر», دەيدى ستۋديا جەتەكشىسى.
كوللەدجدە مۇعالىم ماماندىعىنا باۋلىنىپ جۇرگەن ءمادين باكينا بۇرىندارى كوپشىلىك الدىندا سويلەۋگە قىسىلىپ, يمەنسە, ەندى اجەپتاۋىر ىسىلىپ قالعانى بايقالادى. ونىڭ ويىنشا, تەاتر ستۋدياسىندا ءتالىم-تاربيە الۋ بولاشاق پەداگوگ ءۇشىن ارتىقتىق ەتپەيدى. ال 11 جاسار دميتري پروحوروۆتىڭ ارمانى–اكتەر بولۋ. وسى سەبەپتى بولار, تەاتر ستۋدياسىنا العاشقىلاردىڭ قاتارىندا جازىلىپتى. العاشقى اسەرى كەرەمەت.
ن.پوگودين اتىنداعى وبلىستىق ورىس دراما تەاترىنىڭ 130 جىلدىق تاريحى بار. مۇندا ساحنالاناتىن قويىلىمدار ونەرسۇيەر قاۋىمنىڭ ۇلكەن سۇرانىسىنا يە. اتا-انالاردىڭ تەاتر جانىنان بالالارعا ارنالعان ۇيىرمە اشۋ تۋرالى تىلەگىن قاناعاتتاندىرۋ ماقساتىمەن مادەنيەت باسقارماسى قاراجات بولگەن.
«بالالار جارتى جىل بويى ءدارىس الادى. سوسىن قويىلىم ازىرلەيدى سوڭىنان سەرتيفيكات تابىس ەتىلەدى. شىعارماشىلىق ماماندىقتارعا وقۋعا تۇسكەندە كومەگى تيەرى ءسوزسىز. ەڭ باستىسى ءوزىمىز ءۇشىن ءىزباسارلار دايارلاۋعا ىقپالى زور بولماق», دەيدى تەاتردىڭ كوركەمدىك جەتەكشىسى ەلەنا پوكراس.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى