اتام قازاق «جۇيرىككە دە ءبىر تومار» نەمەسە «سۇرىنبەيتىن تۇياق جوق» دەگەن ەمەس پە. مىسالى ورىستىڭ اتاقتى بالۋانى وليمپيادانىڭ ءۇش, الەمنىڭ توعىز دۇركىن, ەۋروپانىڭ 12 دۇركىن چەمپيونى, دۇنيە ءجۇزى قاۋقار-قايراتىنا تاڭدانىپ, تامسانعان وراسان كۇش يەسى الەكساندر كارەلين دە كەزىندە جەڭىلگەن. مۇنداعى وزدەرىڭىز كورىپ وتىرعان فوتو سونىڭ دالەلى.
وقيعا بىلاي بولىپتى. 1987 جىلدىڭ 22 قاڭتارىندا كلاسسيكالىق كۇرەستەن كسرو چەمپيوناتى ومبى قالاسىندا باستالادى. «ول تۇستا ەركىن جانە كلاسسيكالىق كۇرەستەن وداق جەڭىمپازى اتانۋ الەم بىرىنشىلىگىندە جۇلدە العاننان قيىن ەدى» دەپ ەسكە الادى قازاق سپورتىنىڭ تاريحشىسى قىدىربەك رىسبەك ۇلى.
جوعارىداعى چەمپيوناتتا اسا اۋىر سالماق دارەجەسى بويىنشا سىنعا تۇسكەن الىپتار اراسىنان ءوزىمىزدىڭ قاراعاندىلىق بالۋان يگور روستوروتسكي مەن جاسى 20-عا جاڭا تولعان سىبىرلىك جىگىت الەكساندر كارەلين فينالدا جولىعادى. ول تۇستا ء«سىبىر ايۋى» اسا تانىلا قويماعان, ءبىر جىل بۇرىن عانا شۆەتسيادا جاستار اراسىندا وتكەن كلاسسيكالىق كۇرەستەن الەم بىرىنشىلىگىندە توپ جارعانى بار. ال ءبىزدىڭ جەرلەسىمىز ي.روستوروتسكي بولسا جاسى 25-كە تولعان, دۇنيە ءجۇزىنىڭ ەكى دۇركىن (1985, 1987) چەمپيونى, الەم كۋبوگى مەن ەۋروپا بىرىنشىلىگىنىڭ قوس التىنىن قاتار جەڭىپ العان, قىسقاسى جەر شارىن جالعىز ءوزى ەڭسەرىپ تۇرعان شاعى.
ءبىرى الەم الىبى, ءبىرى جالىنداعان جاس ءبورى. قوس الىپتىڭ ايقاسىنا عالام كوز تىكتى. شەشۋشى تۇستا قاراعاندىلىق بالۋان 1:0 ەسەبىمەن كارەليندى جەڭدى. ال كەلەسى 1988 جىلعى قاڭتار ايىندا تبيليسيدە وتكەن كسرو بىرىنشىلىگىندە جەرلەسىمىز كارەليننەن 10:0 ەسەبىمەن ۇتىلدى. ۇتىلىپ قانا قويعان جوق, كۇرەسپەن ءبىرجولا قوشتاستى. ويتكەنى ول جان بالاسىن شاق كەلتىرمەيتىن ءبىر الىپتىڭ تۋعانىن ءتۇسىندى. ءسويتىپ يگور بالۋان 26 جاسىندا سپورتتى دوعارىپ, قاراعاندى ۋنيۆەرسيتەتىنىڭ زاڭ فاكۋلتەتىن بىتىرگەن سوڭ جايىنا كەتتى. بىراق الەمدىك سپورت تاريحىندا ء«سىبىر ايۋىن» جەڭگەن تۇڭعىش بالۋان رەتىندە تاريحتا قالدى.
بەكەن قايرات ۇلى,
«Egemen Qazaqstan»