جەتىسۋدىڭ قارت تۇرعىنىنىڭ ءبىرى سۇلۋحان اجە رايىمبەك اۋدانىنىڭ قاراساز اۋىلىندا تۇرادى. جالپى, ايگىلى مۇقاعالي جىرلاعان ولكەدە ۇزاق جاساعان ادامداردىڭ قاراسى ءبىر شوعىر. سولاردىڭ اراسىنداعى ەگدەلەۋى وسى – سۇلۋحان اجە.
كەيۋانا سەگىز قۇرساق كوتەرگەن ەكەن. قازىر ۇرپاعى ءبىر قاۋىم ەلگە اينالىپ, 23 نەمەرە 13 شوبەرە ءسۇيىپ وتىر. كەنجە ۇلى تولەگەننىڭ قولىندا. قارت اپانىڭ كەلىنى, اۋىلداعى مەكتەپتىڭ مۇعالىمى گۇلنار قاسقاراۋوۆا ەنەسىنىڭ قىلىعىن جىر عىپ ايتادى.
– اپامىزدىڭ سۇيەگى اسىل عوي. قۇجات بويىنشا 112 جاسقا شىعادى. ءوزىنىڭ ەسەپتەۋى بويىنشا ناق جاسى 102 شاماسىندا. قۋاتى كەمىگەن جوق. ءالى دە شارۋاعا قولعابىس جاساپ وتىر. قولىنان ينەسى تۇسپەيدى. وسى اۋلەتتەن ۇزاتىلعان قىزداردىڭ جاساۋىنا قوساتىن كورپەنى ءوزى كوكتەپ, قولىمەن جاساپ بەرەدى. ول ول ما, ءبىزدىڭ وتاعاسىنىڭ دالاداعى جۇمىسىنا كىرىسىپ كەتەتىنى بار. قىسقا دايىندىقتى, مالدىڭ جەم-ءشوبىنىڭ جەتكىلىكتى بولۋىن كوزىمەن كورىپ, تەكسەرىپ كەلمەسە تىنىم تاپپايدى, – دەيدى گۇلنار.
قالماحانبەت مۇقامەتقالي,
«Egemen Qazaqstan»
الماتى وبلىسى