ماحامبەت وتەمىس ۇلى اتىنداعى باتىس قازاقستان مەملەكەتتىك ۋنيۆەرسيتەتىندە «ەۋرازيالىق جول» اتتى حالىقارالىق جيىن ءوتتى. بۇل شارا قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ زاماناۋي ەۋرازيالىق يدەياسىنىڭ 25 جىلدىعىنا ارنالعان.
باتىس قازاقستان وبلىسىنىڭ اكىمدىگى مەن م.وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتى ۇيىمداستىرعان حالىقارالىق دوڭگەلەك ۇستەل جيىنىنا رەسەي فەدەراتسياسى ورىنبور مەملەكەتتىك ۋنيۆەرسيتەتىنىڭ وڭتۇستىك ورال تاريحى مەن ەتنوگرافياسى عزي ماماندارى مەن زيالى قاۋىم وكىلدەرى قاتىسىپ, وي-پىكىر الماستى.
ەۋرازيالىق جوبا – 1990 جىلدارى قازاقستان باسشىسى ۇسىنعان تۇجىرىمدامالىق ءىلىم, ەگەمەندى قازاقستاننىڭ ۇلتتىق-مەملەكەتتىك ستراتەگياسىنىڭ ماڭىزدى بولىگى. پرەزيدەنت «حالىقارالىق بىرلەستىكتەر تاجىريبەسىن ۇزاق زەرتتەپ, تمد ەلدەرىندەگى جاعدايدى جەتە تالداپ» «ىقپالداسۋ ۇدەرىسىن جىلدامداتۋ كەرەك» دەگەن قورىتىندى جاسادى. 1994 جىلدىڭ 29 ناۋرىزى كۇنى رەسەي فەدەراتسياسىنا رەسمي ساپارى شەڭبەرىندە نۇرسۇلتان نازارباەۆ م.ۆ.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىندە ءسوز سويلەپ, وندا قازاقستان باسشىسى جاڭا ايماقتىق بىرلەستىك – «ەۋرازيالىق وداق» قۇرۋ جونىندەگى يدەيانى دامىتتى. نازارباەۆتىڭ باستاماسى عىلىمي ورتادا ۇلكەن قىزىعۋشىلىق تۋدىردى. الەم ەلدەرى ەۋرازيالىق جوبانى تالقىلاعان كەزدە قازاقستاندى پوستكەڭەستىك رەسپۋبليكا رەتىندە ەمەس, قازىرگى حالىقارالىق دامۋدا وزىندىك جەكە ورنى بار مەملەكەت رەتىندە قاراستىرادى.
- ەلباسىنىڭ ەۋرازيالىق وداق قۇرۋ يدەياسىنىڭ نەگىزىندە ەڭ الدىمەن قازاقستاننىڭ ەكونوميكالىق مۇددەسى, ەلدىڭ ەكونوميكالىق دامۋ بولاشاعى تۇرعاندىعى اقيقات. سونىمەن بىرگە, ەۋرازيالىق وداق تەك قانا قازاقستان مەن رەسەي اراسىندا ەمەس, بۇل كەلەشەكتە ەۋرازيا كەڭىستىگىنە تۇگەل تارالاتىن ۇلكەن يدەيا دەپ ويلايمىن, – دەيدى باتىس قازاقستان وبلىسى قازاقستان حالقى اسسامبلەياسى توراعاسىنىڭ ورىنباسارى عايسا قاپاقوۆ.
دوڭگەلەك ۇستەل بارىسىندا ورىنبورلىق عالىمدار دا ەكى ەل اراسىنداعى مادەني-عىلىمي بايلانىستاردىڭ ومىرشەڭدىگىنە سەنىم ءبىلدىردى. وسى جىلى ماۋسىم ايىندا ورال قالاسىندا وتكەلى وتىرعان بيزنەس فورۋمعا رەسەي فەدەراتسياسىنىڭ كوپتەگەن ايماعىنان كاسىپكەرلەر كەلۋگە نيەت بىلدىرگەن.
- بۇل فورۋمعا ورىنبور وبلىسىنان عانا 50-دەن استام كاسىپكەرلىك نىسانى قاتىسادى. ويتكەنى ىسكەرلىك بايلانىستار, ەكى ەل كاسىپكەرلەرىنىڭ تاجىريبە الماسۋى ەكى جاققا دا ءتيىمدى بولماق, - دەيدى ورىنبور وبلىسى مادەني جانە سىرتقى بايلانىستار مينيسترلىگىنىڭ شەكارالىق ارىپتەستىك جانە سىرتقى بايلانىستار باسقارماسى توراعاسى, ۆيتسە-مينيستر الەكساندر كالينين.
«ەۆرازيالىق كەڭىستىكتە ينتەگراتسيا ماسەلەلەرى وتە وزەكتى. ەكونوميكالىق, ساياسي, قاۋىپسىزدىك تۇرعىسىنان الىپ قاراساق تا ەۋرازيالىق مەملەكەتتەردىڭ وداعىنىڭ بولاشاعى زور, - دەيدى بقمۋ-داعى قازاقستان حالقى اسسامبلەياسى كافەدراسىنىڭ مەڭگەرۋشىسى, وسى جيىندى ۇيىمداستىرۋشىلاردىڭ ءبىرى تۇرار شايحيەۆ.
قازبەك قۇتتىمۇرات ۇلى,
«Egemen Qazaqstan»
باتىس قازاقستان