قالا ىرگەسىندەگى قىزىلجار اۋىلىنا بارىپ قايتتىق.ء بىزدىڭ الدىمىزدا عانا قالا اكىمى بالعاباي ىبىراەۆ بارىپ, اۋىلدىق اۋماقتى ارالاپ شىعىپتى.
جالپى, قىزىلجار اۋىلدىق اۋماعىنا قازىر قىزىلجار, بورىقتال, جاڭاشارۋا, سۋاتكول, سارىشىعاناق سياقتى 5 شاعىن اۋىل قارايدى. بارلىعىن قوسقاندا 3481 ادام تۇرادى. ۇلكەن اۋىل سانالاتىن قىزىلجار مەن سارىشىعاناقتا ورتا مەكتەپ بولسا, ال بورىقتال, سۋاتكول, جاڭاشارۋا اۋىلدارىندا باستاۋىش مەكتەپتەر عانا قالعان. قىزىلجار ورتا مەكتەبىندە 320 وقۋشى بولسا, قالعان 75 وقۋشى بورىقتال, سۋاتكول, سارىشىعاناق مەكتەپتەرىندە ء بىلىم الۋدا.
اۋىل اكىمى جەڭىس ابىكەننىڭ ايتۋىنشا, بيىل جاڭاشارۋا بولىمشەسىنىڭ وقۋشىلارى سارىشىعاناق مەكتەبىندە تاسىمالمەن كەلىپ وقيدى. بالا سانى ازايعان شاعىن مەكتەپ جابىلىپتى. قالا اكىمى بوس قالعان مەكتەپتى وڭتۇستىكتەن كوشىپ كەلەتىن وتباسىلارعا بەرۋدى تاپسىرعان ەكەن. بىراق وقۋشىسى كوپ قىزىلجار ورتا مەكتەبى 1972 جىلى سالىنعان ەسكى مەكتەپ. ءىشى-سىرتى, اۋلاسى جوندەۋدى كۇتىپ تۇر. توبەدەن سۋ اعادى. كۇردەلى جوندەۋ جۇرگىزىلمەگەنى, ەسكىنى جاڭاداي عىپ كۇتەتىن ۇقىپتى قولداردىڭ جوقتىعى بايقالادى. كىرگەن بەتتەن-اق كوڭىلسىزدىك باسادى. مەكتەپتىڭ ەكىنشى بولىگىندە اۋىلدىڭ اكىمدىگى ورنالاسقان...
– بيىل قايتا پلاستيك تەرەزەلەر ورناتىلدى. بىلتىر جىلۋ قازاندىعى جوندەلدى. ەندى بىرتە-بىرتە جوندەلەر, – دەدى مەكتەپ ديرەكتورى ايكۇمىس جالەلقىزى.
ايتپاقشى, 2013 جىلى ءساۋىر ايىندا جولساپار بارىسىندا اقسۋ قالاسىنىڭ اۋىلدارىن ارالاعانبىز. ءمامايىت وماروۆ اۋىلىنداعى مەكتەپتىڭ ءبىر بولىگى جابىلىپ, قاڭىراپ بوس تۇرعانىن كورگەن ەدىك.
– وقۋشىلارىڭىز ۇڭىرەيگەن ەسكى مەكتەپ ۇيىنەن قورىقپاي ما؟ – دەگەن ءبىز سوندا مەكتەپ ديرەكتورى بيجامال شاكىروۆاعا. وسىدان كەيىن گازەتىمىزدە سول كەزدەگى قالا اكىمى بولات باقاۋوۆ نازار اۋدارار دەپ «قالا ىرگەسىندەگى اۋىلعا كىم جاناشىر؟» دەگەن ماقالا جازدىق. بۇل جولعى جولساپار بارىسىندا ء وزىمىز جازعان سول م.وماروۆ اتىنداعى اۋىل مەكتەبىنە دە بارىپ قايتتىق.
ويتكەنى 2017 جىلى قاڭىراپ بوس تۇرعان مەكتەپكە كۇردەلى جوندەۋ جاسالعانىن ەستىپ قۋانعان ەدىك. جاقسىلىقتى كوزىمىزبەن كورگىمىز كەلدى.
– وقۋشىلاردىڭ ءبىلىم الۋىنا مۇمكىندىك جاسالدى. «وڭىرلەردى دامىتۋ-2020» باعدارلاماسى اياسىندا وبلىستىق بيۋدجەتتەن 198 ميلليون تەڭگە ءبولىندى. قازىر جاڭا مەكتەپتە س.دونەنتاەۆ, سىرلىقالا, كوكتەرەك اۋىلدارىنان كەلىپ وقيتىن 33 بالانى قوسقاندا بارلىعى 206 وقۋشى ءبىلىم الۋدا. ەلگە ورالعان اعايىنداردىڭ ۇل-قىزدارىمەن مەكتەپتەر تولۋدا, – دەگەن قۋانىشىن جەتكىزدى بيجامال شاكىروۆا.
ءبىزدىڭ ماقالامىز قازىرگى وبلىس اكىمى بولات باقاۋوۆتىڭ ەسىندە قالسا كەرەك, قالا ىرگەسىندەگى اۋىل مەكتەبىنە وسىلاي جاناشىرلىق كورسەتتى. بىراق مەكتەپتىڭ بۇرىنعى ەكىنشى بولىگى دە كۇردەلى جوندەۋدى كۇتىپ تۇرعانىن ەسكەرەيىك.
ال قىزىلجار مەكتەبىندە وقيتىن بالالاردىڭ دەنى موڭعوليادان ەلگە ورالىپ, ورنىققان وتباسىلاردىڭ ۇل-قىزدارى. بۇل وتباسىلاردىڭ قاتارىنا قالا اكىمى ايتقان وڭتۇستىك وبلىستاردان قونىس اۋدارىپ كەلەتىن وتباسىلاردىڭ بالالارى قوسىلسا, بوس مەكتەپتەر تولادى دەگەن ءسوز. ونسىز دا جۋىردا وڭىردەگى تۇرعىندارى كوشىپ كەتكەن مەكتەپتە وقيتىن بالاسى از 9 اۋىلدىق اۋماق قىسقارىپ قالدى. قونىس اۋدارۋشىلار كەلىپ, ورتا تولتىرۋ ءۇشىن تۇرعىن ءۇي, جىلى دا جايلى مەكتەپتەر كەرەك. اۋىلدى ساقتاۋ – مىندەت. اقسۋ – الىپ وندىرىستەر ورنالاسقان قالا. اۋىلدىڭ وزىندە «قىزىلجار قۇس» فابريكاسى جۇمىس ىستەيدى. بۇل رەتتە قالانىڭ, بيزنەستىڭ اۋىلدارعا قامقورلىعى جەتپەي تۇرعانداي.
جالعىز قىزىلجار مەكتەبى عانا ەمەس, قالاعا قاراستى باسقا دا اۋىلدارداعى ەسكى مەكتەپتەر كۇردەلى جوندەۋدى قاجەت ەتەدى.
فاريدا بىقاي,
«Egemen Qazaqstan»
پاۆلودار وبلىسى, اقسۋ قالاسى
سۋرەتتە: جوندەۋدەن وتكەن م.وماروۆ اۋىلىنداعى مەكتەپ. تۇگەل ەلگە ورالعان اعايىنداردىڭ ۇل-قىزى. بۇرىنعى تۇرعىنداردىڭ تۇگەلى دەرلىك قالاعا كوشىپ كەتكەن.